Mateu 28 - Mukanda Wa Zambi 1970

Uhindukilo wa Yesu ku kufwa

¹ Muze te tangwa lia kuhwima hiliabalika, mu lumingu, ha kuvumbuka cha tangwa, Maria Kamandala ni Maria mukwo yaaya ni kutala fuka.

² Susumuku kwabwile munyiko unene hashi. Kanganda ka mwilu yahulumuka, yalangumuna liwe ku sesa lia fuka, yatwama ho.

³ Yahenya ngwe muhenyo, mahina jenyi yaabwa atoma ngwe chiwe.

⁴ Tufunga yeevwa woma unji, yaachikima, yaabwa ngwe afu.

⁵ Kanganda ka mwilu yambila mapwo ngwenyi: “Kanda nwivwa woma. Ngunanyingika nunafupu Yesu, yoze anakahachila ha kulusu.

⁶ Amuno keshimo, hahinduka ngwe chize ambile. Tweyenu nutale homa haze te anabombo.

⁷ Yeenu nikawashi nulweze tumbaji twenyi ngwenu: ‘Hahinduka ku kufwa. Haliabwila kananutetekela ku chifuchi cha Galilea. Kwenako munukamumona!’ Hinanwambulwila yo.”

⁸ No yaakatuka nikawashi ku fuka, yeevwa woma unji ni uwahililo unji, yaazomboka ni kulweza tumbaji twenyi.

⁹ Susumuku Yesu yatakana no, yamba ngwenyi: “Mwoyo wenu.” No yaamukundama, yaamukwata ku molu, yaamuwayila.

¹⁰ Hohene Yesu yaamba ngwenyi: “Kanda nwivwa woma. Yeenu nulweze akwetu aye ku Galilea. Kwenako maakangumona.”

Sango ja tufunga twa fuka

¹¹ Shimbu mapwo maachiya, amwe a kuli tufunga waze afungile fuka, yeeza mu limbo, yaambulwila mahako a lutwe yize yeswe yabwile ko.

¹² Mahako a lutwe yaakunguluka hamwe ni makulwana. Muze haalitesa, yaahana mbongo jinji kuli tufunga,

¹³ mba yaamba ngwo: “Ambenu ngwenu: ‘Tumbaji twenyi ezanga ha ufuku, eyanga mujimba wenyi muze te tuli mu tulo.’

¹⁴ Nyi kachi mukwa kuyula machivwa, mutumukununa. Kunuchi kabwa ni mulonga chibwe ukepe.”

¹⁵ Tufunga yaatambula mbongo, yaalinga ngwe chize aalongesele. Chenacho sango jize jinafumana mukachi ka Ayuda ndoo ni musono.

Yesu yasolokela tumbaji twenyi, yaashika

¹⁶ Tumbaji kumi ni kashi yaaya ku Galilea ku mulundu uze aalwezele Yesu.

¹⁷ Muze amumwene, yaamuwayila, alioze amwe hakachi ko yaayambashana.

¹⁸ Yesu yaakundama, ngwenyi: “Tata hanangwehe yiyulo yeswe mwilu ni hashi.

¹⁹ Kashika, yeenu ku mavungu eswe, nukaapwise tumbaji twami, ni kwapapachisa mu jina lia Tata, ni lia Mwana, ni lia Mwiku wa Linanga,

²⁰ ni kwalongesa kwononokena yeswe yize nanuhele Shimbi. Nyingikenu ngwenu, nguli hamwe ni yenu matangwa eswe ndoo ku kumanunuka cha mwaka.”