Mateu 27 - Mukanda Wa Zambi 1970

Yesu ku meso ja Pilatu

¹ Chichamene cheswe, mahako a lutwe a Zambi eswe ni makulwana ja Ayuda yaatwama Yesu punga hanga amushihise.

² No yaamukasa, yaamutwala nikumukunjika kuli mukwa kuyula, Pilatu.

Yudase yalisukika

³ Muze Yudase, yoze wamukunjikile kuli akwa kole jenyi, hamona ngwenyi, Yesu haamuhisa, yevwa chinyengo, yahilwisa makumi atatu a mbongo kuli mahako a lutwe ni kuli makulwana,

⁴ yamba ngwenyi: “Hinavulumuna ni kukunjika yoze keshi chitela cha kufwa.” Alioze yaamukumbulula ngwo: “Mba ayo milonga yetu, nyi? Ayize yinakutale yena mwene!”

⁵ Yudase yambila mbongo mu zuwo lia Zambi, yaya yalisukika.

⁶ Mahako a lutwe yaanda je mbongo nikwamba ngwo: “Kuchalitele kujisa mu mushete wa mu zuwo lia Zambi, mumu jili ndando ja manyinga.”

⁷ Muze haalitesa, yaalanda munda wa tengi ni mbongo jize, ya kufunda mo yilambala.

⁸ Kashika munda uze akuuvuluka ngwo; “Munda wa Manyinga” ndoo ni musono.

⁹ Chenacho chamanunukine liji lize ahanjikile Zambi kuli mukwa munanyi wenyi, Jeremia, ngwenyi: “No yaatambula makumi atatu a mbongo (ndando yize mbunga ya Israele anyongene ya kumulanjisa.)

¹⁰ No yaalanda najo munda wa tengi ngwe chize angushikile Mwene Zambi.”

Pilatu yahula Yesu yihula

¹¹ Yesu yamana ku meso ja mukwa kuyula Pilatu. Neye yamuhula ngwenyi: “Mwe mwanangana wa Ayuda yena, nyi ka?” Yesu ngwenyi: “Kuwamba.”

¹² Alioze kakumbulwile ko nichimwe ku kusuma cha mahako a lutwe a Zambi ni makulwana ja Ayuda.

¹³ Hohene Pilatu yamuhula ngwenyi: “Kuushi kwivwa yuma yibwa haha anakusumu nayo, nyi?”

¹⁴ Alioze Yesu kakumbulwile liji nilimwe. Ha chino mwe mukwa kuyula yalishimwoka kuhiana.

Pilatu yakunjika Yesu ku kufwa

¹⁵ Ha chiwanyino cheswe cha Kubalika mukwa kuyula ndako abwile nayo ya kutusula funge umuwika, yoze te mbunga meeta.

¹⁶ Ha tangwa lize, funge abwile nenyi wa lufuma mubi, jina lienyi te Yesu Baraba.

¹⁷ Pilatu yahula mbunga yize akungulukile ngwenyi: “Iya nunazange ngunutuswile, Yesu Baraba, hanji Yesu yoze anavuluka ngwo, Kristu?”

¹⁸ Mumu te kananyingika pundu ngwenyi, haakunjika Yesu mumu ha ukwa.

¹⁹ Shimbu te Pilatu machitwama ha chitwamo cha ubatwilo, mwazovu wenyi yamutumina liji ngwenyi: “Kanda Ulinga nichimwe kuli yono mukwa ululi, mumu ufuku wa musono nabindanga kuhiana mu chilota hakutwala kuli iye.”

²⁰ Mahako a lutwe ni makulwana ja Ayuda yaakununa mbunga hanga ete atuswile Baraba ni kushihisa Yesu.

²¹ Mukwa kuyula yaahula ngwenyi: “Iya mukachi ka wano aali nunazange ngunutuswile?” No yaakumbulula ngwo: “Baraba.”

²² Pilatu yaahula ngwenyi: “Mba kuchi mungulinga ni Yesu, yoze anavuluka ngwo, Kristu?” Eswe yaakumbulula ngwo: “Muhachile ha kulusu!”

²³ Alioze Pilatu ngwenyi: “Chibi chika kevwe anakalinga?” Hohene atu yaabutuka kukololoka chikolo ngwo: “Muhachile ha kulusu!”

²⁴ Muze Pilatu hamona ngwenyi, kahashile kulinga nichimwe, alioze muukubwa Vunda kuhiana, yanda meya, yasana ku moko ku meso ja mbunga nikwamba ngwenyi: “Kufwa cha mutu yono ami ngunasambe kwami. Ayo milonga yenu!”

²⁵ Atu eswe yaakumbulula ngwo: “Uhiso ubwe wa yetu ni ana jetu!”

²⁶ Hohene Pilatu yatuswila Baraba, yalambisa Yesu ni fimbo (shikote), yamukunjika hanga amuhate ha kulusu.

Tujita yaakekuna Yesu

²⁷ Hazehene tujita twa Pilatu yatwala Yesu ku yiize ya mukwa kuyula. Mbunga yeswe ya tujita yaamukunguluka,

²⁸ yaamuzula mahina jenyi, yaamujika hina lia chizele lichila.

²⁹ Yaayinda chipangula cha mbimbo, yaachijika ha mutwe wenyi, yaasa lukanda mu kwoko lienyi lia chindume, yaaliondela ha makungunwa ku meso jenyi nikwamba ngwo: “Vulie, mwanangana wa Ayuda!”

³⁰ Yaamufwila mate, yaatambula lukanda ni kumulambalamba ha mutwe.

³¹ Muze haamanununa kumukekuna, yaamuzula hina lia chizele lichila, yaamujika mahina jenyi, mba yaamutwala haze lia limbo hanga amuhate ha kulusu.

Tujita yaahata Yesu ha kulusu

³² Shimbu maachituhuka mu limbo, yaatakana ni umwe mutu wa ku Sirene, jina lienyi Simone. No yaamwaha kulusu ya Yesu ni tachi hanga ayimbate.

³³ Yaaheta kumwe kuma akuvuluka ngwo, Golgota, kulumbunuka “Homa lia Palanga lia Mutwe.”

³⁴ Yaamwaha vinyu yakuchinga ni kasashisa. Alioze muze hayipaka, kayinwine ko.

³⁵ No yaamuhata ha kulusu, mba yaalitetela mahina jenyi ha kuta chela.

³⁶ Hohene yaatwama ko nikumutala.

³⁷ Helu lia mutwe wenyi yaanangika ho Chisoneko chize chalumbunwine chitela chize amusumine nacho, ngwo: “Yono Yesu mwe Mwanangana wa Ayuda.”

³⁸ Hohene yaahata mihuza aali ha makulusu hamwe nenyi, umuwika ku chindume, mukwo ku chimeso.

³⁹ Atu waze abaliekele kuze yaalihunga mitwe nikumuchoka ngwo:

⁴⁰ “Ehee! Yena wazangile kwonona zuwo lia Zambi, ni kulitunga nawa ha matangwa atatu! Lilamwine yena mwene, nyi mwe Mwana Zambi yena! Sunuka ha kulusu!”

⁴¹ Chimuwika nawa mahako a lutwe a Zambi, ni alongeshi a Shimbi, ni makulwana ja Ayuda yaamukekuna ngwo:

⁴² “Walamwinyine atu akwo, alioze mwene kahashile kulilamwina. Nyi kali mwanangana wa Israele, asunuke haliabwila ha kulusu, mba mutumufuliela!

⁴³ Te kakushachila hali Zambi ni te kakwamba ngwenyi: ‘Nguli Mwana Zambi.’ Matumone chize Zambi mamulamwina!”

⁴⁴ Chibwe mihuza waze ahachiwile hamwe nenyi ha makulusu yaamuchoka nawa chizechene.

Kufwa cha Yesu

⁴⁵ Tangwa ha muchima, chifuchi cheswe yichibwa ni milima bwii, yiitwama ndoo ola jitatu.

⁴⁶ Ha ola ya muchitatu, Yesu yakololoka chikolo ngwenyi: “Eli, Eli, lema sabaktani!” Kulumbunuka ngwo: “Zambi yami, Zambi yami, kuchi mba hiwangwehuka?”

⁴⁷ Amwe waze amanyine ko, muze haachivwa, yaamba ngwo: “Kanatambika Eliya.”

⁴⁸ Hazehene umuwika hakachi ko yazomboka, yanda shiponja, yayizalisa ni vinaigre, yayisa ku songo lia lumbungu, yamweseka yo hanga anwe.

⁴⁹ Alioze akwo yaamba ngwo: “Matumone nyi Eliya meza ni kumulamwina.”

⁵⁰ Yesu yakololoka nawa chikolo, mba yasutula mwono wenyi.

⁵¹ Ha shimbu lizeliene, chikalakala cha hina cha mu zuwo lia Zambi yichibulika mukachi, chize kwilu ndoo hashi. Hashi yihanyika, mawe yaabulika,

⁵² mafuka yaabakuka, ni akwa kufuliela, waze afwile kulu, Zambi yaahindwisa.

⁵³ No yaatuhwoka, ni muze Yesu hahinduka ku kufwa, yaanjila mu Limbo lia Chijila kuze atu anji aamwene.

⁵⁴ Muze mwata wa tujita ni e tujita waze afungile Yesu haamona kunyika cha hashi ni yize yeswe yabwile ko, yeevwa woma unji, yaamba ngwo: “Chamwenemwene yono mwe Mwana Zambi.”

⁵⁵ Mapwo anji yaamana kusuku nikutala. Enoo akatukile ku chifuchi cha Galilea, te kaakukaula Yesu ni kumukwasa.

⁵⁶ Hakachi ko te hali Maria Kamandala, ni Maria naye ya Tiangu (Jake) ni Josefe, ni naye ya ana ja Zebedeu a malunga.

Kufunda cha Yesu

⁵⁷ Muze te tangwa hiliendala, umwe pichi, wa ku limbo lia Arimatea, yeza, jina lienyi Josefe. Neye te kambaji ka Yesu.

⁵⁸ Yaya maha Pilatu nikumwita mujimba wa Yesu. Pilatu yatayiza kumwaha wo.

⁵⁹ Josefe yasunwisa we mujimba, yauvunga mu hina litoma liaha,

⁶⁰ yausa mu fuka lienyi liaha, lize atotele mu liwe, yalangumuna liwe linene ku chikolo cha fuka, mba yaya kwenyi.

⁶¹ Maria Kamandala ni Maria mukwo kwe abwile, te kaanatwama talanganyi ni fuka.

Tufunga ku fuka

⁶² Muze hikwacha, kafwa ngwe tangwa lia kuhwima, mahako a lutwe a Zambi ni Afariseu yaakunguluka maha Pilatu,

⁶³ yaamba ngwo: “Mwanangana, tunewuluka mukwa kwonga yoze, muze abwile ni mwono, kwamba chenyi ngwenyi: ‘Ha tangwa lia muchitatu mungukahinduka.’

⁶⁴ Hana Shimbi hanga atu afunge fuka ndoo tangwa lia muchitatu, kuchina tumbaji twenyi meeza ni kwiya mujimba ni kwambila atu ngwo: ‘Hahinduka ku kufwa.’ Mba kwonga chize chakusula muchihiana chitangu.”

⁶⁵ Pilatu yaamba ngwenyi: “Andenu tufunga, yeenu ni kukoleka fuka ngwe chize nunahase.”

⁶⁶ No yaaya, yaakoleka fuka, yaakolesa liwe ni chinyingi, mba yaasa tufunga.