Mateu 24 - Mukanda Wa Zambi 1970

Yesu yambulula kubuzuka cha zuwo lia Zambi

¹ Yesu yatuhuka mu zuwo lia Zambi lia Ayuda. Muze te anayi, tumbaji twenyi yaamukundama nikumulweza chize chatungiwile zuwo lia Zambi.

² Mba Yesu yaamba ngwenyi: “Nunamono yeswe ayize? Chamwenemwene ngunanwambulwila ngwami, liwe nilimwe kulichi kasala liakunangika helu lia likwo, eswe kumaakabuzula”.

Kabutu ka lamba

³ Shimbu Yesu machitwama ha mulundu wa Olive, tumbaji yaamukundama ku tenga nikwamba ngwo: “Twambulwile kama mwiji muka yize yeswe muyikabwa ko. Chilayi chika muchikalweza kwiza che ni songo lia mwakono?”

⁴ Yesu yaakumbulula ngwenyi: “Kanyamenu, nyi ka, maakanupiangula.

⁵ Mumu anji maakeza mu jina liami nikwamba ngwo: ‘Yami mwe Chilamwina yoze Zambi alakenyene.’ Kumaakapiangula anji.

⁶ Munukevwa lundunjila wa jita hakamwihi ni sango ja jita kusuku, alioze kanda nukasungalala. Chatamba yino yeswe kubwa, alioze songo kanda lichibwa.

⁷ Vungu ni vungu kumaakasa jita. Wanangana kumuukalimika ni wanangana ukwo. Zala yinji muyikabwa, ni minyiko ya hashi kweka ni kweka.

⁸ Yuma yino yeswe muyikalifwa ngwe kabutu ka yikola ya kusema.

⁹ “Hohene atu maakanukwata, maakanumwesa lamba, maakanushiha. Eswe maakanuvutwokela mumu ha jina liami.

¹⁰ Ha matangwa waze, anji maakalikala ufulielo wo, maakalikunjika amwe ni akwo, maakalivutwokela amwe ni akwo.

¹¹ Akwa munanyi a kupiangula anji maakasoloka, maakapiangula anji.

¹² Uhulia muukoka. Ha chino zango lia atu anji mulikekema.

¹³ Alioze yoze makanyongonona ndoo ku songo, kumakamulamwina.

¹⁴ Sango jino Jipema ja Wanangana kumaakajambujola hashi heswe hanga ajishindakenye kuli atu eswe, mba songo mulikabwa.”

Lamba linji

¹⁵ “Munukamona: ‘Chipupu cha Kuvwisa Woma’, chinamana muma mwa chijila yoze Zambi ambile kuli mukwa munanyi wenyi Daniel.” (Yoze wakutanga ase yuma yino chinyingi!)

¹⁶ “Hohene waze maakabwa mu Yudea chaatamba kuchinyina ku milundu.

¹⁷ Yoze makabwa ha fulumba lia zuwo lienyi akasunuke, alioze kanda akanjila mu zuwo akande yuma yize yili mo.

¹⁸ Yoze makabwa ku minda kanda akahiluka akande cikuto chenyi.

¹⁹ Ha matangwa waze tufumbakaji lamba linji maakamona ni waze maakamwisa ana.

²⁰ Lembenu Zambi hanga kuchina chenu kanda chikabwa kama ha mwaka wa chishika chibwe ha tangwa lia kuhwima.

²¹ Mumu ha matangwa waze lamba linji mulikabwa ko. Chize ku kutanga cha hashi ndoo musono uno lamba ngwe lize kanda lichibwa kama, ni kulichi kabwa nawa nichimwe ngwe lize kulutwe.

²² Nyi Zambi kachijile ko amwe matangwa waze a lamba, kachi mutu niumwe makalilamwina. Alioze matangwa akwo Zambi hanaachiza mumu hali atu jenyi waze atongwele iye mwene.

²³ “Hohene, nyi umwe mutu makanwamba ngwenyi: ‘Talenu, Chilamwina yoze Zambi alakenyene kuno kwali!’ hanji ngwenyi: ‘Kwali akuze!’ kanda nukamufuliela.

²⁴ Mumu yilamwina a mahuza ni akwa munanyi a kupianguka kumaakasoloka ni kulweza yilayi yinene ni yipupu hanga apiangule, nyi muchihasa kubwa, chibwe waze Zambi hanatongola.

²⁵ Ivwenu hinalianga kunwambulwila cho.

²⁶ “Nyi maakanwamba ngwo: ‘Talenu, mu puya ali!’ kanda nukaya ko. Hanji ngwo: ‘Talenu, kanaswame kuno!’ kanda nukachifuliela.

²⁷ Mumu ngwe muhenyo muuhenya chize ku chivumbuko ndoo ku chitokelo Chenacho muchikabwa nawa kwiza cha Mwana Mutu.

²⁸ Kuze kuli mujimba unafu, kwenako nawa maakakunguluka pupa.”

Kwiza cha Mwana Mutu

²⁹ “Hazehene, kulutwe lia lamba lia matangwa waze, tangwa mulikalaa, kakweji kechi katwa nawa mweji, matongonoshi maakaholoka kwilu, ni ndundo ja mwilu mujikanyikumuka.

³⁰ Hohene chilayi cha mwe Mwana Mutu muchikasoloka kwilu. Mba mavungu eswe a hashi maakalila, maakamona Mwana Mutu kaneza ha malelwa ni ndundo jinji ni uhenya Wahiana.

³¹ Chitavi chinene muchikahanjika. Hohene Zambi makatuma tunganda twenyi a mwilu ku mbango jeswe jiwana ja hashi, no maakakungulula waze Zambi hanatongola chize ku songo limwe lia hashi ndoo ku songo likwo.”

Chishima cha mutondo mukuyu (figu)

³² “Lilongesenu chishima cha mutondo mukuyu. Muze mitango yawo hiyovula ni mafwo jawo haabutuka kusokoloka, nwakunyingika ngwenu, kuma lwiza habwa hakamwihi.

³³ Chimuwika nawa, muze munukamona yuma yino yeswe, munukanyingika ngwenu, kali hakamwihi, ku yikolo.

³⁴ Chamwenemwene ngunanwambulwila ngwami, atu waze ali ni mwono haliabwila, keechi kafwa eswe ndoo yuma yize yeswe muyikabwa.

³⁵ Lilu ni hashi muyikahwa, alioze maliji jami keechi kwiza kuhwa nichimwe.”

Tata Zambi wika Unanyingika tangwa ni ola

³⁶ “Alioze hakutwala ku tangwa lize ni ola yize, niumwe unayinyingika, chibwe tunganda a mwilu, chibwe Mwana ka, shina Tata wika unayinyingika.

³⁷ Ngwe chize chabwile ha matangwa ja Noa Chenacho muchikabwa nawa ha kwiza cha Mwana Mutu.

³⁸ Mumu ha matangwa waze shimbu te sanga lia meya kanda lichiza, atu yaahaha, yaanwanwa, yaalimbatambata, yaalihangisahangisa ku malu, ndoo ku tangwa lize Noa anjilile mu ulungu,

³⁹ te kaanyingikine nichimwe ndoo sanga ha meya liejile ni kwonona eswe. Chenacho muchikabwa nawa ha kwiza cha Mwana Mutu.

⁴⁰ Ha ola yize, malunga aali maakabwa ku minda. Makanda umuwika, makahichika mukwo.

⁴¹ Mapwo aali maakatwa ku utwilo. Makanda umuwika, makahichika mukwo.

⁴² Kashika kanyamenu, mumu kunwanyingikine ola yize Mwene wenu meza.

⁴³ Nyingikenu chino ngwenu, nyi te mwenya zuwo kananyingika kama ola yize ya ufuku mwiji meza, kachi te manongama, kechi kumutayiza kulokola zuwo lienyi.

⁴⁴ Kashika, ni yenu nawa kanyamenu, mumu ha ola yize kunushi kunyonga ngwenu, Mwana Mutu meza.”

Kavumbi wakushishika hanji keshi kushishika

⁴⁵ “Iya kevwe kavumbi wakushishika kanda wakukanyama? Yoze mwata wenyi hanamwehe chiyulo cha kutetela tuvumbi akwo, a ku zuwo lienyi, yakulia ha ola yize yinalite.

⁴⁶ Kawaha kavumbi yoze, nyi mwata wenyi muze mahiluka, mamuwana kanalingi Chenacho!

⁴⁷ Chamwenemwene ngunanwambulwila ngwami, mwata makamwaha kavumbi yoze yilemu ya yikumba yenyi yeswe.

⁴⁸ Alioze, nyi kavumbi yoze kali mubi, malihanjikisa ngwenyi: ‘Mwata wami kanashimbula,’

⁴⁹ mba mabutuka kulamba tuvumbi ni akwo, ni kuliaha ni kunwanwa ni akwa kuzengewa,

⁵⁰ hohene mwata wenyi meza ha tangwa lize kavumbi kachinyongene ni ha ola yize kachinyingikine.

⁵¹ Mba makamubatwila ni kumwaha Chihanda chenyi hamwe ni yilembekese. Kwenako makalila nikulicheka ku mazo.”