Mateu 22 - Mukanda Wa Zambi 1970

Chishima cha chiteleka cha umbachiso

¹ Yesu yahanjika nawa ni yishima kuli atu ngwenyi:

² “Wanangana wa mwilu uli ngwe chino. Umwe mwanangana walulikile umbachiso wa mwanenyi wa lunga.

³ Mba yatuma tuvumbi twenyi ni kutambika waze alakenyene ku umbachiso. Alioze kaatayile ko kwiza.

⁴ Mba yatuma tuvumbi akwo ni liji lino ngwenyi: ‘Ambilenu waze nalakenyene ngwenu, haliabwila chiteleka chami hichahia; kuji a ngombe jami ni yimuna ya maji hinaashiha. Yeswe hiyaswa. Tweyenu ku umbachiso!’

⁵ Alioze waze alakenyene yaachilelesa, yaayaya ku milimo yo, awu ku munda wenyi, awu ni kulanjisa yuma yenyi,

⁶ akwo yaakwata tuvumbi twenyi, yaalamba, yaashiha.

⁷ Mwanangana yatenuka, yatuma tujita twenyi mu kushiha akwa kushiha waze ni kwocha limbo lio.

⁸ Hohene yambila tuvumbi twenyi ngwenyi: ‘Chiteleka cha umbachiso hichahia, alioze waze nalakenyene katelele kuchilia.

⁹ Yeenu, kashika, mu majila anene anene nutambike ku umbachiso eswe waze munuwana.’

¹⁰ E tuvumbi yaaya mu majila, yaakungulula eswe waze awanyine, abi ni abema. Chenacho zuwo lia umbachiso yilizala ni atu.

¹¹ “Mwanangana yanjila ni kutala waze alakenyene, yamona mo mutu yoze te kazalile ko mazalo ja umbachiso,

¹² yamwamba ngwenyi: ‘A mbayi, ngwe kuchi wanjilanga muno kuushi mahina ja umbachiso?’ Alioze mwe mutu yahola kuluu.

¹³ Hohene mwanangana yambila tuvumbi ngwenyi: ‘Mukasenu moko ni molu, mumbilenu mu milima, haze. Kwenako atu maakalilila ni kulicheka ku mazo.’ ”

¹⁴ Yesu yaweza ho liji ngwenyi: “Mumu Zambi kakutambika anji, alioze kakutongola akepe.”

Chihula hakutwala ku lijimu

¹⁵ Hohene Afariseu yaaya ni kutwama punga ngwe chize maahasa kutela Yesu muheto ni chihula.

¹⁶ Yaamutumina tumbaji two ni amwe a kuli Aherode, ngwo: “Longeshi, tunanyingika ngwetu, yena kuuli wamwenemwene, wakulongesa Shimbi ja Zambi ni umwenemwene. Kuushi woma ha chize akunyonga atu, kuushi kutala ulemu wo.

¹⁷ Tulweze kama kuchi Unanyongo, muchilita ni Shimbi jetu kulambula mwanangana wa Aroma lijimu, nyi ka?”

¹⁸ Alioze Yesu yanyingika manyonga jo abi, yaamba ngwenyi: “Yenu yilembekese! Kuchi kevwe nunangweseka?

¹⁹ Ngulwezenu mwe lumbongo wa lijimu.” No yaamulweza lumbongo umuwika.

²⁰ Mba Yesu yaahula ngwenyi: “Chizulie chino ni Chisoneko chino yaaya?”

²¹ No yaakumbulula ngwo: “Ya mwanangana wa Aroma.” Yesu ngwenyi: “Hilwisenu mwanangana wa Aroma yize niyenyi, Zambi neye yize niyenyi.”

²² Muze heevwa kumbululo lino, yaalishimwoka kuhiana, yaamuhichika, yaaya kwo.

Chihula hakutwala ku uhindukila wa afu

²³ Tangwa lizeliene amwe Asaduseu yeeza kuli Yesu. (Waze akwamba ngwo: “Afu keeshi kuhinduka.”)

²⁴ Yaamwambangwo: “Longeshi, Mose hanalongesa Shimbi yino ngwenyi: ‘Nyi umwe lunga hafwa, kahichikile mwana, mwanakwo chamutamba kumbata pwo yoze hanga asemene yayo ana.’

²⁵ Yikubwa amwe asongo ni atu shimbiali mukachi ketu. Mutangu yambata pwo. Mwe lunga yafwa, kahichikile ko mwana. Chenacho yahichika pwo kuli chihata chenyi.

²⁶ Chimuwika nawa ni yoze wa muchaali, ni wa muchitatu, ndoo ni wa muchishimbiali.

²⁷ Hakusula, mwe pwo neye yafwa.

²⁸ Ha tangwa lia uhindukilo wa afu, makabwa pwo liaya? Mumu eswe shimbiali yaamumbata.”

²⁹ Yesu ngwenyi: “Nwakubinda, mumu kunwanyingikine Mukanda wa Zambi, chibwe ndundo ja Zambi.

³⁰ Mumu ha uhindukilo wa afu, atu maakabwa ngwe tunganda a mwilu, malunga ni mapwo keechi kalimbata, ni keechi kalihangisa malo.

³¹ Alioze hakutwala ku uhindukilo wa afu, kanda nuchitanga kama nilimwe tangwa, chize anwambile Zambi, nyi? Ngwenyi:

³² ‘Nguli kwami Zambi ya Abrahama, ni ya Isake, ni ya Yakoba.’ Kulumbunuka ngwo: Zambi kali Zambi ya akwa mwono hi Zambi ya afu ko.”

³³ Muze mbunga jize achivwile, yaalishimwoka kuhiana ha longeso lienyi.

Shimbi yilemu yahiana

³⁴ Muze Afariseu heevwa ngwo. Yesu haholesa Asaduseu kulungungaa, yaalikungulula.

³⁵ Mba umwe wa kuli ayo, longeshi ya Shimbi, yazanga kweseka Yesu, yamuhula ngwenyi:

³⁶ “Longeshi, Shimbi yika yilemu yahiana mukachi ka Shimbi jeswe?”

³⁷ Yesu ngwenyi: “Zanga Mwene Zambi ye ni mbunge ye yeswe, ni mwono we weswe, ni manyonga je eswe.

³⁸ Yenayo ye Shimbi yitangu ni yilemu kuhiana.

³⁹ Shimbi ya muchaali yinalifu nayo ngwo: ‘Zanga mwenyembo we ngwe chize wakulizanga yena mwene.’

⁴⁰ Shimbi jeswe ja Mose ni longeso heswe lia akwa munanyi a Zambi jinaswila mu Shimbi jino jaali.”

Chihula hakutwala kuli David ni Chilamwina yoze Zambi alakenyene

⁴¹ Muze Afariseu haalikungulula, Yesu yaahula chihula chino ngwenyi:

⁴² “Kuchi nunashinginyeka hakutwala kuli Chilamwina yoze Zambi alakenyene, kali mwana waya?” No yaamukumbulula ngwo: “Mwana wa David.”

⁴³ Yesu yaahula ngwenyi: “Mba kuchi David, ku tachi ja Mwiku wa Linanga, yamuvuluka ngwenyi: ‘Mwene’? Mumu David yamba ngwenyi:

⁴⁴ ‘Mwene Zambi hanambila Mwene wami ngwenyi: Twama ku chindume chami ndoo mungukasa akwa kole je kushi lia molu je.’

⁴⁵ Nyi David yamuvuluka ngwenyi: ‘Mwene,’ mba ngwe kuchi Chilamwina yoze Zambi alakenyene mahasa kubwa mwanenyi?”

⁴⁶ Niumwe wa kuli ayo wahashile kumukumbulula, chibwe ni liji limuwika ka. Chize ku tangwa lize, mutu niumwe wahamukine nawa kumuhula yihula.