Mateu 20 - Mukanda Wa Zambi 1970

Chishima cha njimi mu munda wa vinyu

¹ “Wanangana wa mwilu uli ngwe chino. Umwe mwenya vinyu watuhukile chichamene cheswe ni kutetela milimo kuli njimi.

² Yalitesa kwafeta nikulita ni Shimbi, lumbongo umuwika mu tangwa limuwika. Mba yaatuma ni kulinga milimo mu munda.

³ Yatuhuka nawa ha ola ya mu chilivwa ya chichamene, yamona akwo te anamana mu yitanda ni kulelumioka,

⁴ yaamba ngwenyi: ‘Ni yenu nawa, yeenu ku munda wami wa vinyu. Mungunufweta cheswacho chinalite.’

⁵ Atu waze yaaya. Mwenya munda yatuhuka nawa tangwa ha muchima, ni ha ola ya muchitatu ya chingoloshi yalinga nawa chizechene.

⁶ Mba ngwe ha ola ya muchitano ya chingoloshi yatuhuka, yawana akwo te anamana, yaahula ngwenyi: ‘Kuchi nunamana hano tangwa heswe nganganga ni kulelumioka?’

⁷ No yaakumbulula ngwo: ‘Mutu niumwe watwahanga milimo.’ Mwenya munda yaamba ngwenyi: ‘Ni yenu nawa, yeenu ku munda wami wa vinyu nulinge.’

⁸ “Muze te tangwa hiliendala chikolo, mwenya munda yambila kafufuchi kenyi ngwenyi: ‘Tambika akwa milimo, wafwete fweto yo. Butuka kuli akwa kusula ndoo kuli atangu.’

⁹ Atu waze ahele milimo ha ola ya muchitano ya chingoloshi yeeza, yaatambula mutu ni mutu lumbongo.

¹⁰ Muze waze atangu heeza, yaanyonga ngwo, maatambula kuhiana. Hindu ni ayo nawa yaafweta mutu ni mutu lumbongo.

¹¹ Ha kumutambula, yaalinyenyeta ku meso ja mwenya munda, ngwo:

¹² ‘Puu! Waze asula ola yimuwika lume haalinga. Alioze yena hiwaafweta ngwe yetu twalinganga tangwa lia muundu mu chivukuminya cha tangwa!’

¹³ Alioze mwenya munda yakumbulula kuli umwe mukachi ko ngwenyi: ‘Mukwetu, chakulakile. Twalitesanga kulinga milimo ha lumbongo mu tangwa limuwika, cheka nyi?

¹⁴ Anda yoze niwe, yako kwe. Ngunazange kumwaha yono mukwa kusula ngwe chize hinakwaha yena.

¹⁵ Chishi chiyulo cha kulinga chize ngunazange ni ubite wami, nyi? Hanji Unevu ukwa mumu hinaaha jinji, nyi?’ ”

¹⁶ Mba Yesu yaweza ho liji ngwenyi: “Akwa kusula kumaakabwa atangu, ni atangu kumaakabwa akwa kusula.”

Yesu yambulula chisuho cha muchitatu kufwa chenyi ni uhindukilo wenyi

¹⁷ Shimbu te Yesu machikanduka ku limbo lia Yerusaleme, yatwala tumbaji kumi ni aali ku tenga, muze te anende, yaamba ngwenyi:

¹⁸ “Banjikenu! Tunayi ku Yerusaleme. Kwenako maakakunjika Mwana Mutu kuli mahako a lutwe a Zambi ni alongeshi a Shimbi. No maakamuhisa hanga akafwe,

¹⁹ maakamukunjika kuli yilambala. No maakamukekuna, maakamulamba ni fimbo (shikote), maakamuhata ha kulusu. Alioze ha tangwa lia muchitatu Zambi makamuhindwisa.”

Chihula cha naye ya Tiangu (Jake) ni Yoano

²⁰ Hohene naye ya ana ja Zebedeu a malunga yakundama kuli Yesu hamwe no, yafulamana ku meso jenyi ni kumwita chimwe Chuma.

²¹ Yesu yamuhula ngwenyi: “Yika unazange?” Neye ngwenyi: “Tayiza kama hanga ana jami wano atwame umuwika ku chindume che, mukwo ku chimeso mu Wanangana we.”

²² Yesu ngwenyi: “Kunwanyingikine chize nunechi. Munuhasa kunwa musenge wa lamba uze mungunwa yami, nyi?” No yaamukumbulula ngwo: “Mutuhasa.”

²³ Yesu ngwenyi: “Kumunukanwa musenge wami, alioze hi cha yami ko kubatula yoze makatwama ku chindume chami hanji ku chimieso. Mihela yize yili ya waze Tata hanaalulikila yo.”

²⁴ Muze tumbaji akwo kumi haachivwa, yeevwila asongo ni mutu wuli.

²⁵ Mba Yesu yaatambika eswe nikwamba ngwenyi: “Nunanyingika ngwenu, akwa kuyula ja atu kaakuyula ni tachi, ni anene jo kaakuyula ni chiyulo cheswe.

²⁶ Alioze hi chocho ko hakachi kenu. Nyi umwe hakachi kenu mazanga kubwa munene, chamutamba kubwa kavumbi kenu.

²⁷ Nyi umwe hakachi kenu mazanga kubwa mutangu chamutamba kubwa ndungo yenu,

²⁸ ngwe chize Mwana Mutu kejile ko akamulingile alioze akalingile atu ni kuhana mwono wenyi ngwe ndando ya kukula atu anji.”

Yesu, yalawisa meso ja tupuputa aali

²⁹ Shimbu maachituhuka mu limbo lia Yeriku, mbunga yinene yaakaula Yesu.

³⁰ Tupuputa aali te anatwama ku sesa lia jila. Muze heevwa ngwo, Yesu kanabalika, yaabutuka kukololoka ngwo; “Mwene, Mwana wa David, tuvwile kama keke!”

³¹ E mbunga yaakanjisa hanga ahole, alioze yaakololoka kuhiana ngwo: “Mwene, Mwana wa David, tuvwile kama keke!”

³² Yesu yamana, yaatambika, yaahula ngwenyi: “Yika nunazange ngunulingile?”

³³ Yaamukumbulula ngwo: “Mwene meso jetu alaule kama!”

³⁴ Yesu yeevwila keke, yasa moko ha meso jo. Hazehene yaalaula, yaamukaula.