Mateu 2 - Mukanda Wa Zambi 1970

Kwiza cha akwa mana

¹ Yesu yasemuka mu Betleheme, limbo lia mu Yudea, muze te Herode abwile mwanangana. Muze Yesu hasemuka, akwa mana waze te akuhengula matongonoshi, yaakatuka ku chivumbuko, yeeza ku Yerusaleme.

² Yaahula ngwo: “Ulihi mwana yoze unakasemuka, yoze makabwa mwanangana wa Ayuda? Tunakamona lutongonoshi wenyi nikusoloka ku chivumbuko. Hitweza ni kumuwayila.”

³ Muze mwanangana Herode hachivwa, yalibikala kuhiana, ni akwa Yerusaleme eswe.

⁴ Yakungulula mahako a lutwe a Zambi eswe ni alongeshi a Shimbi. Yaahula ngwenyi: “Chilamwina yoze Zambi alakenyene, kulihi chamutamba kusemukina?”

⁵ Yaamukumbulula ngwo: “Ku Betleheme, mu Yudea, mumu Chenacho asonekene mukwa munanyi wa Zambi ngwenyi:

⁶ ‘Yena Betleheme, mu chifuchi cha Yuda, hi uli mukepe kuhiana ko mukachi ka akwa kuyula a mu Yuda. Mumu muli yena mumukatuhuka tetekeli. Mwenawo makasongwela atu jami Aisraele.’ ”

⁷ Mba Herode yatambika akwa mana ku tenga, yaahula pundu tangwa lize asolokele lutongonoshi.

⁸ Henaho yaatuma ku Betleheme nikwamba ngwenyi: “Yeenu nukahulehule hakutwala kuli mwe mwana. Muze hinwamuwana, nukeze nukangwambulwile, hanga ni yami ngukaye ni kumuwayila.”

^9-10 Muze heevwa maliji ja mwanangana, yaakatuka, yaaya, yaamona lutongonoshi yoze amwene ku chivumbuko. Ha kumumona yaawahilila kuhiana. Lutongonoshi yatetekela kulutwe lio ndoo yamana helu lia homa haze habwile mwe mwana.

¹¹ Akwa mana yaanjila mu zuwo, yaamona mwana hamwe ni naye Maria, yaafulamana, yaawayila mwe mwana, yaabakula yikashi yo, yaamulambula milambu ya oru, ni maji a vumba libema libano, ni mira.

¹² Zambi yaatoweza mu chilota ngwenyi, kanda ahiluka maha Herode. Kashika, yaaya jila yeka nikuhiluka ku chifuchi cho.

Kuchinyina ku Egiptu

¹³ Muze akwa mana haaya, kanganda ka mwilu yasolokela Josefe mu chilota, yamwamba ngwenyi: “Katuka, anda mwana ni naye uchinyine ku chifuchi cha Egiptu. Ukabwe ko ndoo mungukakutambika, mumu Herode kanafupu mwana akamushihe.”

¹⁴ Mba Josefe yakatuka, yanda mwana ni naye, yaya no ha ufuku ku Egiptu.

¹⁵ Yaatwama ko ndoo ku kufwa cha Herode. Chino chabwile hanga chikamanunune liji lize Mwene Zambi ahanjikile kuli mukwa munanyi wenyi ngwenyi: “Hingunatambika mwanami akatuke ku Egiptu.”

Kushiha cha ana akemba

¹⁶ Muze Herode hanyingika ngwenyi, akwa mana haamulenya, yevwa ufwatulo, yahana Shimbi ya kushiha ana malunga a mu Betleheme ni a mu chifuchi cha kusulangana a miaka yaali ni waze kanda achiheta ku miaka yaali, nikulita ni tangwa lize amulwezele akwa mana.

¹⁷ Chenacho chamanunukine liji lize Zambi ahanjikile kuli mukwa munanyi wenyi, Jeremia, ngwenyi:

¹⁸ “Atu kaanevu milolo mu Rama, malilo ni kunenganyana kuhiana. Rashele kanalili ana jenyi. Katayile amulembejeke, mumu haanafu.”

Kuhiluka ku Israele

¹⁹ Muze Herode hafwa, kanganda ka mwilu yasolokela Josefe mu chilota mu chifuchi cha Egiptu.

²⁰ Yamwamba ngwenyi: “Katuka, anda mwana ni naye, uhiluke ku chifuchi cha Israele, mumu waze afupile kushiha mwana haanafu.”

²¹ Josefe yahinduka, yanda mwana hi naye, yahiluka ku Israele.

²² Alioze muze Josefe hevwa ngwo, Arkelau hahinga tato Herode mu chifuchi cha Yudea, yevwa woma kuhiluka ko. Zambi yamulongesa nawa mu chilota, kashika yaya ku chifuchi cha Galilea.

²³ Yaya ni kutwama mu limwe limbo jina lialio Nazare. Chenacho chamanunukine liji lize Zambi ahanjikile kuli akwa munanyi jenyi ngwenyi: “Kumakamuvuluka ngwo, Kanazare!”