Mateu 18 - Mukanda Wa Zambi 1970

Iya munene Wahiana?

¹ Mwabwamuze tumbaji yaakundama kuli Yesu nikumhula ngwo: “Iya munene Wahiana mu Wanangana wa mwilu?”

² Yesu yatambika kanuke, yamumika mukachi ko,

³ yamba ngwenyi: “Chamwenemwene ngunanwambulwila ngwami, nyi kunwalumukine ku mbunge ni kubwa ngwe twanuke, kunuchi kanjila mu Wanangana wa mwilu.

⁴ Yoze malikehesa ni kubwa ngwe kanuke yono, mwe munene Wahiana mu Wanangana wa mwilu.

⁵ Ni yoze matambula kanuke umuwika ngwe yono, mu jina liami, mangulambula yami.”

Yeseko ya uvulumwino

⁶ “Yoze mavulumwisa umwe wa kuli twanuke wano akepe waze akungufuliela, chinalite amukase liwe linene ha kota ni kumumbila ha jinga lia kalunga lwiji.

⁷ Lamba lio akwa hashi mumu ha yuma yize yakuvulumwisa atu! Yuma yize muyikabwa matangwa eswe, alioze lamba lienyi mukwa kuvulumwisa!

⁸ “Nyi kwoko lie hanji kulu lie liakukuvulumwisa, libatule, ulimbile. Shinoho ukanjile mu mwono wamwenemwene ni kwoko limuwika hanji ni kulu limuwika, kuhiana chize muufunga moko eswe aali ni molu eswe aali akakumbile mu kahia ka miaka yeswe.

⁹ Nyi liso lie likukuvulumwisa, litombongone, ulimbile. Shinoho ukanjile mu mwono wamwenemwene ni liso limuwika, kuhiana chize muufunga meso eswe aali akakumbile mu kahia.”

Chishima cha panga wakutoka, yasoloka nawa

¹⁰ “Kanyamenu, kanda nulelesa umwe wa kuli twanuke wano akepe. Ngunanwambulwila ngwami, tunganda two a mwilu kaakumana matangwa eswe ku meso ja Tata wa mwilu. (

¹¹ Mumu mwe Mwana Mutu haneza mu kulamwina yoze watokele.)

¹² “Kuchi nunanyongo? Mutu, nyi mabwa ni kulakaji lia mapanga, mba umuwika matoka, kechi kuhichika makumi livwa ni livwa akwo ha mulundu ni kuya ni kufupa yoze watokanga, nyi?

¹³ Muze mamuwana, chamwenemwene ngunanwambulwila ngwami, mawahilila mumu hali panga yoze kuhiana waze makumi livwa ni livwa katokele.

¹⁴ Chimuwika nawa, Tatenu wa mwilu keshi kuzanga umuwika wa kuli wano akepe akatoke.”

Mukwenu yoze unavulumuna

¹⁵ “Nyi mukwenu makuvulumuna, yako Umulweze chitela chenyi, alioze ukawenu lume. Nyi makwivwa, muuzuka mukwenu.

¹⁶ Alioze, nyi kasolo kukwivwa, twala hamwe ni yena umuwika hanji akwo aali, hanga ‘kusuma cheswe chikabwe ni shindakenyo kuli yela aali chibwe atatu,’ ngwe chize unambe Mukanda wa Zambi.

¹⁷ Alioze, nyi kasolo kweevwa, chambulule ku Chikungulwila. Nyi kasolo kwivwa Chikungulwila, mupwisenu ngwe chilambala hanji ngwe mukwa kulambwisa lijimu.”

Kukanjisa ni kutayiza

¹⁸ “Chamwenemwene ngunanwambulwila ngwami, cheswacho munukalituna hano hashi, Zambi mwilu halituna cho kulu, ni cheswacho munukatayiza hano hashi, Zambi mwilu neye hachitayiza kulu.

¹⁹ “Chamwenemwene ngunanwambulwila nawa ngwami, nyi aali hakachi kenu hano hashi maalikunda ni kwita chimwe Chuma ha kulemba, Tata wa mwilu makaaha cho.

²⁰ Mumu yami nakubwa mukachi ka atu waze analikungulula mu jina liami, chibwe aali hanji atatu.”

Chishima cha kavumbi yoze te kasolo kukonekena mukwo

²¹ Hohene Petulu yakundama kuli Yesu, yamuhula ngwenyi: “Mwene, yisuho yingahi Changutamba kukonekena mukwetu nyi manguvulumuna? Ndoo yisuho shimbiali, nyi?”

²² Yesu ngwenyi: “Ka, Chishi kwamba ngwami, ndoo yisuho shimbiali, alioze ndoo yisuho makumishimbiali ha shimbiali.

²³ Mumu Wanangana wa mwilu uli ngwe chino. Umwe mwanangana wanyongene kwalula ubite wenyi hamwe ni tuvumbi twenyi.

²⁴ Muze te anabutuka kwalula, yaamunehena mutu yoze te umukwete kongo lia tununu ni tununu twa mbongo.

²⁵ Mutu yono nichimwe kabwile nacho cha kufweta mbongo jize. Mwene wenyi yamba akamulanjise ngwe ndungo, hamwe ni pwo lienyi, ni ana jenyi, ni yize yeswe abwile nayo, hanga ahase kumanununa kongo lize.

²⁶ Mwe kavumbi yafulamana ku molu ja mwanangana wenyi mbuu, nikuliumba ngwenyi: ‘Lihumikize kama ni yami, mungukufweta jeswe!’

²⁷ Mwe mwanangana yamuvwila keke, yamukonekena kongo lienyi, yamutusula.

²⁸ “Mwe kavumbi yatuhuka, yatakana ni umwe wa kuli tuvumbi ni akwo yoze te umukwete kongo lia kulakaji lia mbongo, yamukwata, yamwoka ha muliwu ni kwamba ngwenyi: ‘Ngufwete kongo liami!’

²⁹ Kavumbi ni mukwo yafulamana ni kuliumba ngwenyi: ‘Lihumikize kama ni yami, mungukufweta!’

³⁰ Alioze katayile ko. Yamumbila mu zuwo lia lamba ndoo muze makafweta kongo lienyi.

³¹ Muze tuvumbi ni akwo haamona chize alingile, yeevwa kubihia kuhiana, yaaya ni kwambulwila mwanangana wo.

³² Hohene mwanangana yatambika mwe kavumbi yoze, yamwamba ngwenyi: ‘Yena kavumbi wamokomoko, nakukonekenene kongo lie mumu waliumbile kuli yami.

³³ Kuma kuchatambile yena nawa kukonekena kavumbi ni mukwenu ngwe chize ngunakakukonekena yena, nyi?’

³⁴ Mwe mwanangana yevwa ufwatulo, yatuma kavumbi yoze mu zuwo lia lamba amubinjise ndoo makafweta kongo lienyi lieswe.”

³⁵ Yesu yaweza ho ngwenyi: “Chenacho Tata wa mwilu makanulinga nyi umwe wa kuli yenu kasolo kukonekena mukwo ni mbunge yenyi yeswe.”