Mateu 14 - Mukanda Wa Zambi 1970

Kufwa cha Yoano Chipapachisa

¹ Ha tangwa lize, Herode, mwanangana wa chifuchi cha Galilea, yevwa sango ja Yesu.

² Neye yambila tuvumbi twenyi ngwenyi: “Awu mwe Yoano Chipapachisa. Hahinduka ku kufwa, kashika kali ni chiyulo cha kulinga yilayi.”

³ Mumu Herode yahana Shimbi ya kukwata Yoano, yamukasa, yamusa mu zuwo lia lamba. Herode yachilinga mumu hali Herodia, pwo lia mwanakwo Filipe.

⁴ Yoano te hambila Herode ngwenyi: “Kuchalitele ni Shimbi kumumbata!”

⁵ Herode yazanga kumushiha, alioze yevwila mbunga woma, mumu eswe yaatayiza ngwo: “Yoano kali mukwa munanyi wa Zambi.”

⁶ Ha chiwanyino cha kusemuka cha Herode, mwana wa Herodia wa pwo yahangana ku meso ja mbunga. Herode yachimona kubema.

⁷ Kashika yamulakenya ni Shingo kumwaha cheswacho meta.

⁸ Naye yamulweza mana, mba mwana pwo yeta mwanangana ngwenyi: “Ngwehe hanohene mutwe wa Yoano Chipapachisa ha chenga.”

⁹ Mwanangana yevwa chinyengo, alioze mumu ha mashingo jenyi ku meso ja atu waze atambikile, yahana Shimbi ya kumwaha wo.

¹⁰ Yatuma mutu ni kutapa Yoano mu zuwo lia lamba.

¹¹ Neye yaneha mutwe wa Yoano ha chenga, yamwaha wo mwe mwana pwo, neye yautwalila naye.

¹² Tumbaji twa Yoano yeeza ni kwanda mujimba wenyi, yaaufunda, mba yaaya ni kwambulwila Yesu.

Yesu yalisa atu tununu atano

¹³ Ha kwivwa sango jino, Yesu yakatuka ko, yanjila mu wato, yaya kuma kwa ukawenyi. Alioze mbunga yaachinyingika, yaatuhuka mu membo, yaamukaula hashi.

¹⁴ Ha kutuhuka mu wato, Yesu yamona mbunga yize yinene, yeevwila keke, yabutuka kuwuka mieji jo.

¹⁵ Muze te tangwa hiliendala chikolo, tumbaji yaakundama kuli Yesu nikwamba ngwo: “Kuma kuno kwa ukawetu, ni tangwa hiliendala chikolo. Shikenu mbunga hanga aye mu yihunda akalilanjile yakulia.”

¹⁶ Yesu ngwenyi: “Kuchalitele aye, ahenu yenwene yakulia.”

¹⁷ No yaamwamba ngwo: “Tuli lume ni mbolo jitano ni yishi aali.”

¹⁸ Yesu ngwenyi: “Jinehenu kuli yami.”

¹⁹ Mba yambila mbunga atwame ha mwambu. Neye yanda mbolo jitano ni yishi aali, yatala kwilu, yasakwila, yabalula mbolo, yajihana kuli tumbaji. No yaajianyina mbunga.

²⁰ Eswe yaalia, yaakuta. Tumbaji yaazalisa tupaya kumi ni aali a yibalubalu yize yasalile ho.

²¹ Waze alile, kwoka cho ngwe tununu atano a malunga, kuweza mapwo ni ana.

Yesu yenda ha chitende

²² Hazehene Yesu yanjisa tumbaji twenyi mu wato hanga atetekele musali lia chitende, shimbu iye mwene machishika ni mbunga.

²³ Muze haashika, Yesu yakanduka ha mulundu ukawenyi mu kulemba. Muze te tangwa hiliatoka kulu yabwa ko ukawenyi.

²⁴ Wato te hiwabwa kulu mukachi ka chitende nikubinda ni miavu ya meya, mumu fuji yilimika nawo.

²⁵ Muze himukucha, Yesu yakundama kuli tumbaji twenyi nikwenda ha meya.

²⁶ Alioze ha kumumona kanende ha meya, tumbaji yatungumuka, ngwo: “Mujimu!” Yeevwa woma, yaateta.

²⁷ Hazehene Yesu yahanjika no ngwenyi: “Hamukenu! Yami mwene, kanda nwivwa woma!”

²⁸ Mba Petulu yamwamba ngwenyi: “Mwene, nyi mwe yena, ngwambe ngwize kuli yena ha meya.”

²⁹ Yesu ngwenyi: “Tweya!” Petulu yatuhuka mu wato, yabutuka kwenda ha meya nikuya kuli Yesu.

³⁰ Alioze ha kumona fuji ya tachi, yevwa woma, yabutuka kushimbama mu meya, yateta ngwenyi: “Mwene, ngulamwine!”

³¹ Hazehene Yesu yolola kwoko, yamukwata, yamwamba ngwenyi: “Ufulielo we ukepe! Kuchi te unayambashana?”

³² Eswe aali yaanjila mu wato, mba fuji yiihola.

³³ Waze abwile mu wato yaawayila Yesu. Ngwo: “Chamwenemwene, mwe Mwana Zambi yena!”

Yesu yawuka mieji mu Genezare

³⁴ No yaazauka chitende, yaaheta ku tunda mu chifuchi cha Genezare.

³⁵ Akwa chifuchi yaanyingika Yesu, yaamwanga sango mu chifuchi chize cheswe, yaamunehena mieji eswe,

³⁶ nikuliumba kuli iye atayize chibwe kukwata kama ku songo lia hina lienyi. Eswe waze amukwachile yaahindwoka.