Mateu 13 - Mukanda Wa Zambi 1970

Chishima cha chikuwa

¹ Ha tangwa lizeliene Yesu yatuhuka mu zuwo, yaya ni kutwama ku mbumbulu ya chitende.

² Mbunga yinene yaamukunguluka. Kashika Yesu yanjila mu wato, yatwama mo, ye mbunga yaamana ku mbumbulu.

³ Neye yaalongesa yuma yinji ni yishima ngwenyi: “Achivwenu! Umwe mutu watuhukile mu kukuwa.

⁴ Muze akuwile mbuto, yimwe yiiholokela ku sesa lia jila. Tujila yeeza, yaayilia.

⁵ Yikwo yiiholokela homa ha mawe, haze kuhabwile ko mavu anji. Mbuto yiisoka nikawashi, mumu te kuheshi ndama ya mavu.

⁶ Alioze muze tangwa hiliasasaminya, yibuta yilekama, yiyuma chau, mumu te kuyishi miji.

⁷ Mbuto yikwo yiiholokela mukachi ka mingonga. Ye mingonga yiitatuka, yiikeketesa yibuta.

⁸ Alioze mbuto yikwo yiiholokela ha mavu abema, yiiyima mihuko; yimwe kulakaji, yikwo makumi asambano, yikwo makumi atatu.”

⁹ Yesu yaweza ho ngwenyi: “Banjikenu kanawa, nyi nuli ni matwi!”

Chikuma chize Yesu atelele yishima

¹⁰ Tumbaji yaamukundama nikumuhula ngwo: “Kuchi unahanjika no mu yishima?”

¹¹ Neye yakumbulula ngwenyi: “Yenu hananwehe cho kunyingika yijimbikilo ya Wanangana wa mwilu, alioze ayo ka.

¹² Mumu yoze ukwete, makamuwezela yikwo, hanga akabwe nayo yakulumbama. Alioze yoze keshi nayo, makamuchiza chibwe yize yikepe ali nayo.

¹³ Nakuhanjika no mu yishima, mumu kaakutala alioze keeshi kumona; kaakubanjika, alioze keshi kwivwa, chibwe keeshi kunyingika.

¹⁴ Chenacho chinamanunuka hakutwala kuli ayo maliji waze ahanjikile mukwa munanyi wa Zambi, Izaya, ngwenyi: ‘Munukatala kubanjika, hindu kunuchi kunyingika. Munukatala kutala, hindu kunuchi kumona.

¹⁵ Mumu mbunge ja atu wano hijinaleme. Matwi jo haanafulamana ha kwivwa, Meso jo haanafukiwa ha kumona, Kuchina meso jo maamona, Matwi jo meevwa, Mbunge jo mujinyingika, Mba maatewuluka kuli yami hanga ngwawuke. Chenacho anambe Zambi.’

¹⁶ Alioze yenu nunawaha, mumu meso jenu kaakumona, ni matwi jenu kaakwivwa.

¹⁷ Chamwenemwene ngunanwambulwila ngwami, akwa munanyi a Zambi anji ni akwa ululi anji evwile usona ha kumona yize nwakumona yenu, alioze kaayimwene ko, ni kwivwa yize nwakwivwa yenu, alioze kaayivwile ko.”

Yesu yalumbununa chishima cha chikuwa

¹⁸ “Ivwenu ulumbunwiso wa chishima cha chikuwa.

¹⁹ Waze akubanjika ku longeso lia Wanangana wa Zambi, alioze kulialumbunukine, kaalifwa ngwe sesa lia jila kuze kwakuholokela mbuto. Sakwonga kakwiza ni kuchanga yize akuwile mu mbunge jo.

²⁰ Akwo kaalifwa ngwe mavu a ha mawe kuze kwakuholokela mbuto. Enoo akwivwa longeso, akulitambula hazehene ni uwahililo.

²¹ Hindu ye mbuto miji kuyishi kuya kusuku. Kaakunyongonona ha shimbu likepe, mba muze luyinda hanji yihungumiona yakwiza mumu ha longeso, hazehene maatalinga.

²² Akwo akutambula mbuto mukachi ka mingonga. Enoo akwivwa longeso, alioze yibikalo ya hashi hano ni kwonga cha ubite yakukeketesa longeso, mba muliseka.

²³ Atu akwo akutambula mbuto ha mavu abema. Kaakwivwa longeso, kaakulinyingika pundu, kaakwima mihuko, amwe kulakaji, akwo makumi asambano, akwo makumi atatu.”

Chishima cha mwambu wamokomoko

²⁴ Yesu yaatela chishima chikwo ngwenyi: “Wanangana wa mwilu walifwa ngwe mutu yoze wakuwile mbuto yibema mu munda wenyi.

²⁵ Umwe ufuku, shimbu te atu anabombo mu tulo, mukwa kole yenyi yeza, yatumba mwambu wamokomoko mukachi ka tiriku yize yibema, mba yaya kwenyi.

²⁶ Muze mbuto hiyasoka ni mieho hiyakola, mwambu wamokomoko neyo yiisoka.

²⁷ Akwa milimo a mwenya munda yeeza ni kumuhula ngwo: ‘Mwata, kuwatumbile mbuto yibema mu munda we, nyi? Kulihi mba unakatuka mwambu wamokomoko?’

²⁸ Neye yaakumbulula ngwenyi: ‘Mukwa kole halinga chino.’ Mba akwa milimo yaamuhula ngwo: ‘Unazange tuye tukatukule mwambu uze wamokomoko, nyi?’

²⁹ Neye ngwenyi: ‘Ka, kuchina muze munukatukula mwambu uze wamokomoko, munukatukula nawa tiriku kumuwika.

³⁰ Yechenu yitatuke hamuwika ndoo ha tangwa lia kubatula. Ha tangwa lize mungukambila akwa kubatula ngwami tukulenu hatangu mwambu wamokomoko, yikasenu yichita nukayoche, mba kungilenu tiriku mu machila jami.’ ”

Chishima cha lunona wa chibuta cha mostarde

³¹ Yesu yaatela chishima chikwo ngwenyi: “Wanangana wa mwilu walifwa ngwe lunona wa chibuta cha mostarde, yoze anijile mutu ni kumutumba mu munda wenyi.

³² Mwenawo mukepe Wahiana nona jeswe. Alioze muze hichasoka, chakubwa chinene chahiana yibuta yeswe. Mba tujila kaakwiza ni kutunga yaswa ku mitango yawo.”

Chishima cha yitumbo ya mbolo

³³ Yesu yaatela chishima chikwo ngwenyi: “Wanangana wa mwilu walifwa ngwe yitumbo ya mbolo yize anjile umwe pwo. Yayichinga mu njongo jitatu ja wunga, ndoo weswe yiufutunuka.”

Chikuma chize Yesu atelele yishima

³⁴ Yesu yalongesa mbunga yuma yize yeswe ni yishima. Kahanjikile no liji nilimwe shina ni yishima.

³⁵ Yalinga chino hanga chikamanunune liji lize Zambi ahanjikile kuli mukwa munanyi wenyi, ngwenyi: “Munguhanjika no ni yishima. Mungwalumbunwina yuma ya kuhengeka chize ku kutangiwa cha hashi.”

Yesu yalumbununa chishima cha mwambu wamokomoko

³⁶ Yesu yahichika mbunga, yanjila mu zuwo. Tumbaji twenyi yaamukundama nikumuhula ngwo: “Tulumbunwine kama chishima cha mwambu wamokomoko wa mu munda.”

³⁷ Yesu ngwenyi: “Yoze wakutumba mbuto yibema, mwe Mwana Mutu,

³⁸ Munda, he hashi. Mbuto yibema, e atu ja Wanangana. Mwambu wamokomoko, e atu ja Sakwonga.

³⁹ Mukwa kole yoze watumbile mwambu wamokomoko, mwe Sakwonga. Kubatula cha tiriku, che kumanunuka cha mwaka. Akwa kubatula tiriku, e tunganda a mwilu.

⁴⁰ Ngwe chize akungile mwambu wamokomoko ni kuwocha mu kahia, Chenacho muchikabwa ha kumanunuka cha mwaka.

⁴¹ Mwe Mwana Mutu makatuma tunganda twenyi a mwilu. Enoo maakachiza mu wanangana wenyi eswe waze akuvulumwisa akwo ni waze akulinga yibi.

⁴² Maakambila mu jiko lia kahia. Kwenako atu maakalila ni kulicheka ku mazo.

⁴³ Hohene akwa ululi maakatemuka ngwe tangwa mu Wanangana wa Tato. Banjikenu kanawa nyi nuli ni matwi.”

Chishima cha ubite wakuhengeka

⁴⁴ “Wanangana wa mwilu walifwa nawa ngwe ubite uze wakuhengeka mu munda. Mutu yawana ubite uze, yausweka, yawahilila, yaya ni kulanjisa yeswe yize abwile nayo, yahiluka, yalanda munda uze.”

Chishima cha kakanga

⁴⁵ “Nawa, Wanangana wa mwilu walifwa ngwe mukwa kulanjisa yoze unafupu kakanga wa ndando yinji.

⁴⁶ Muze hawana umuwika, yaya, yalanjisa yeswe yize abwile nayo, yalanda kakanga yoze.”

Chishima cha Wanda wa yishi

⁴⁷ “Nawa, wanangana wa mwilu walifwa ngwe Wanda uze atele mu chitende ni kukunga yishi eka ni eka.

⁴⁸ Muze hiwazala too, akwa kutela yishi yaaukoka ku mbumbulu ya meya, yaatwama ni kusakula yishi, yaasa abema mu yikashi, yaambila waze abi.

⁴⁹ Chenacho muchikabwa ha kumanunuka cha mwaka. Tunganda wa mwilu maakaya ni kuhandununa yingulungulu ni akwa ululi.

⁵⁰ Maakambila yingulungulu mu jiko lia kahia. Kwenako atu maakalila ni kulicheka ku mazo.”

Ubite Waha ni Ukulu

⁵¹ Yesu yaahula ngwenyi: “Yuma yino nwayivwa kanawa, nyi?” No yaamukumbulula ngwo: “Ewa.”

⁵² Mba yaamba ngwenyi: “Chenacho longeshi mweswe wa Shimbi yoze mabwa kambaji mu Wanangana wa mwilu walifwa ngwe mwenya zuwo yoze matuhwisa mu chibatulo muze akuswekela ubite wenyi, yuma yaha ni yikulu.”

Akwa Nazare yaalituna Yesu

⁵³ Muze Yesu hamanununa kuta yishima yize, yakatuka ko,

⁵⁴ yahiluka ku limbo kuze akolelele, yabutuka kulongesa mu zuwo lio lia kuwayila. Atu eswe yaalishimwoka kuhiana, yaahula ngwo: “Kulihi yono awana mana wano? Ngwe kuchi anahase kulinga yikomokeso yino?

⁵⁵ Awu hi mwana wa mukwa kusonga mabaya ko, nyi? Naye hi Maria ko, nyi? Anakwo hi Tiangu (Jake) ni Josefe ni Simone ni Yudase ko, nyi?

⁵⁶ Mandumbu jenyi eswe keeshi hakachi ketu, nyi? Kulihi awana yuma yino yeswe?”

⁵⁷ Mba yaalituna ye. Yesu yaamba ngwenyi: “Kuma kweswe mukwa munanyi wa Zambi kaakumulemesa, alioze mu limbo lienyi mwene ni mu zuwo lienyi keeshi kumusa vumbi.”

⁵⁸ Kalingile ko yikomokeso yinji mumu kaafulielele ko.