Mateu 12 - Mukanda Wa Zambi 1970

Chihula hakutwala ku tangwa lia kuhwima

¹ Ha matangwa waze, Yesu yabalikila mu minda ya tiriku ha tangwa lia kuhwima. Tumbaji twenyi yeevwa zala, yaabutuka kumakuna mitwe ya tiriku ni kuyilia.

² Muze Afariseu achimwene, yaambila Yesu ngwo: “Tala, tumbaji twe kaanalingi ha tangwa lia kuhwima chize kuchalitele ni Shimbi jetu.”

³ Yesu ngwenyi: “Kunwatangile nilimwe tangwa chize alingile mwanangana David, iye mwene ni atu jenyi, muze evwile zala, nyi?

⁴ Yanjila mu zuwo lia Zambi, yalia mbolo ja kutumbieka ku meso ja Zambi, jize Shimbi kujatayijile iye chibwe atu jenyi kujilia—shina mahako a Zambi wika.

⁵ Hanji kunwatangile mu Shimbi ja Mose ngwo, ha tangwa lia kuhwima mahako keeshi kufunga Shimbi ya tangwa lia kuhwima muze akulinga mulimo mu zuwo lia Zambi, nyi? Hindu keeshi kwo chitela.

⁶ Ngunanwambulwila ngwami, munene Wahiana zuwo lia Zambi hano hali.

⁷ Hichinasonewa mu Mukanda wa Zambi ngwo: ‘Chishi kuzanga atu angulambule milambu ya tushitu, alioze ngunazange alivwile keke.’ Nyi kunwanyingika longeso lino, kachi kunwahishile waze keeshi chitela.

⁸ Mumu yami, Mwana Mutu, nguli Mwene wa tangwa lia kuhwima.”

Mukwa kwoko liasosewa

⁹ Yesu yakatuka ko, yanjila mu limwe zuwo lia kuwayila.

¹⁰ Yimubwa umwe mukwa kwoko liasosewa. Amwe waze abwile mo yaazanga kusuma Yesu mulonga. Kashika, yaamuhula ngwo: “Muchilita ni Shimbi kuwuka mutu ha tangwa lia kuhwima, nyi?”

¹¹ Yesu ngwenyi: “Nyi umwe hakachi kenu mabwa ni panga umuwika, yoze maholokela mu wina usuku ha tangwa lia kuhwima, kuma mutu yoze kechi kuya ni kumutuhwisa mo, nyi?

¹² Alioze ulemu wa mutu kuwahianyine wa panga, nyi? Kashika, chinalite ni Shimbi kulingila mutu yibema ha tangwa lia kuhwima.”

¹³ Yesu yambila mweji ngwenyi: “Olala kwoko lie.” Neye yaliolola, mba yilibwa lingunu ngwe likwo.

¹⁴ Afariseu yaatuhuka, yaatwama punga amone chize maahasa kushiha Yesu.

Kavumbi yoze atongwele Zambi

¹⁵ Muze Yesu hachivwa, yakatuka ko. Mbunga yinene yaamukaula. Yesu yawuka mieji eswe.

¹⁶ Alioze yaakanjisa chikolo ngwenyi: kanda akamusolola.

¹⁷ Yachilinga hanga chikamanunune liji lize Zambi ahanjikile kuli mukwa munanyi wenyi Izaya, ngwenyi:

¹⁸ “ ‘Talenu kavumbi kami yoze natongwele, yoze nakuzanga kuhiana, ni yoze nakuwahilila nenyi. Mungukasa Mwiku wami muli iye, mba makambulula ubatwilo wami kuli waze hi Ayuda ko.

¹⁹ Kechi kalitachika ni mutu, chibwe kechi kakololoka. Mutu niumwe kechi kevwa liji lienyi mu majila.

²⁰ Kechi kamakuna lumbungu wa kufwenya, kechi kajima ndeya yize yinafwinji mwishi. Makanyongonona ndoo ululi muukumba.

²¹ Mavungu eswe maakasa mbunge ha jina lienyi.’ ”

Yesu ni Belzebu

²² Atu yaanehena Yesu kapuputa kanda kanaye, mumu te mwiku wa luchisa akwete. Yesu yamuwuka, mba mwe mutu yabutuka kuhanjika ni kumona.

²³ Mbunga jeswe yaalishimwoka, ngwo: “Yono hi Mwana wa David ko, nyi?”

²⁴ Muze Afariseu haachivwa, yaamba ngwo: “Mutu yono kakutuhwisa mwiku wa luchisa shina ni tachi ja Belzebu, mwata wo.”

²⁵ Yesu, ha kunyingika manyonga jo, yaamba ngwenyi: “Nyi akwa wanangana maalihandununa ni kulitachika ene, wanangana uze muukabwa wahululu. Nyi akwa limwe limbo hanji akwa limwe jiko maalihandununa ene, jiko lize hanji limbo lize mulikafwa.

²⁶ Nyi Sakwonga matuhwisa Sakwonga, kachi malitachika iye mwene. Ngwe kuchi wanangana wenyi muukalinduluka?

²⁷ Nyi yami nakutuhwisa mwiku wa luchisa ni tachi ja Belzebu, ngwe chize nunambe, mba atu jenu ni tachi jaya akuutuhwisa? Atu jenu ayo ene kaananuhisa ha manyonga jenu.

²⁸ Alioze, nyi ni tachi ja Mwiku wa Zambi nakutuhwisa najo mwiku wa luchisa, chinalumbunuka ngwo, Wanangana wa Zambi hiuneza kulu mukachi kenu.

²⁹ “Ngwe kuchi mutu mahasa kunjila mu zuwo lia chitakame ni kwiya yuma yenyi, nyi hatangu kanda achimukasa? Muze hamukasa, mba mahasa kwiya yuma yeswe mu zuwo lienyi.

³⁰ “Yoze keshi hamwe ni yami, kakulimika ni yami. Yoze keshi kukunga hamwe ni yami, kakumwanga.

³¹ Kashika, ngunanwambulwila ngwami, Zambi makonekena atu milonga yo yeswe ni kushililika cho cheswe, alioze yoze mashililika Mwiku wa Linanga, Zambi kechi kamukonekena.

³² Yoze malimika ni Mwana Mutu, Zambi makamukonekena, alioze yoze malimika ni Mwiku wa Linanga, Zambi kechi kanukonekena, chibwe ha mwakono chibwe ha mwaka uze muukeza.”

Mutondo ni mihuko yawo

³³ “Ha kubwa ni mihuko yibema, chanutamba kubwa ni mutondo Ubema. Nyi nwabwa ni mutondo ubi, ni mihuko yibi munukabwa nayo, mumu mitondo kaanayinyingika ku mihuko yayo.

³⁴ Yenu vungu lia yihili! Ngwe kuchi yenu abi munuhasa kuhanjika yibema. Mumu kanwa liakuhanjika yize yinalumbama mu mbunge.

³⁵ Mutu mubema kakutuhwisa yuma yibema mu mbunge yenyi yibema. Mutu mubi kakutuhwisa yuma yibi mu mbunge yenyi yibi.

³⁶ “Ngunanwambulwila ngwami, ha Tangwa lia Ubatwilo, liji lieswe liamokomoko lize te atu akuhanjeka, maakalilumbununa.

³⁷ Mumu ku maliji je makakusambisa hanji kukuhisa.”

Akwa lutwe yeeta chilayi

³⁸ Mba amwe alongeshi a Shimbi ni Afariseu yaamba ngwo: “Longeshi, tunazange utulweze chilayi.”

³⁹ Yesu yaakumbulula ngwenyi: “Yenu atu ja mwakono, yingulungulu, kunushi kulivwa ni Zambi. Nunafupu chilayi, alioze keechi kanwaha cho nichimwe, shina chilayi cha mukwa munanyi wa Zambi, Yona.

⁴⁰ Ngwe chize Yona abwile mu jimo lia yishi munene matangwa atatu a mwalwa ni ufuku, Chenacho nawa, mwe Mwana Mutu makabwa mu kalunga matangwa atatu a mwalwa ni ufuku.

⁴¹ Ha Tangwa lia Ubatwilo akwa Ninive maakakatukila atu ja mwakono ni kwahisa, mumu ayo alumukine ku mbunge muze evwile kwambujola cha Yona. Ni chikuma chahiana chize cha Yona hano hichili!

⁴² Ha Tangwa lia Ubatwilo, mwanangana wa pwo wa ku Sude makakatukila atu ja mwakono ni kwahisa, mumu yakatuka ku masongo a hashi ha kwivwa maliji a mana a Solomone. Ni chikuma chahiana chize cha Solomone hano hichili!

Kuhiluka cha mwiku wa luchisa

⁴³ “Muze mwiku wa luchisa hiwatuhuka muli mutu, muulihiza muma mumu nikufupa uhwimino. Nyi kuwauwanyine ko,

⁴⁴ muulihanjikisa ngwenyi: ‘Munguhiluka mu zuwo liami muze natuhukile.’ We mwiku muuhiluka nikuliwana liawashi, liakukomba, liakululika kananwa.

⁴⁵ Mba muuya ni kuneha mwiku ukwo shimbiali ubi Wahiana uyo. Hakusula kutwama cha mutu yoze muchikabwa chibi chahiana chitangu. Muchikabwa nawa chizechene kuli yingulungulu a mwakono.”

Naye ni anakwo ja Yesu

⁴⁶ Shimbu te Yesu machihanjika ni mbunga, kuma naye ni anakwo yaaheta, yaamana haze, yaafupa kuhanjika nenyi.

⁴⁷ Umwe mutu yambila Yesu: “Ngwowe, noko ni anakwenu kaanamana haze, kaanazange kukuhanjikisa.”

⁴⁸ Yesu yakumbulula mutu yoze ngwenyi: “Mwe mama iya? Ni anakwetu aya?”

⁴⁹ Mba yolola kwoko lienyi kuli tumbaji twenyi, ngwenyi: “Talenu, mama ni anakwetu enaa!

⁵⁰ Mumu yoze wakulinga upale wa Tata wa mwilu, mwenawo mwe mwanakwetu, ni ndumbwani, ni mama.”