Mateu 11 - Mukanda Wa Zambi 1970

Yoano Chipapachisa yatumina Yesu tumbaji

¹ Muze Yesu hamanununa kuhana Shimbi jino kuli tumbaji twenyi kumi ni aali, yakatuka ko, yaya ni kulongesa ni kwambujola mu membo a mu chifuchi chize.

² Yoano Chipapachisa, tu mu zuwo lia lamba, yevwa hakutwala ku yitanga ya Kristu. Mba yamutumina amwe tumbaji twenyi.

³ No yaamuhula ngwo: “Yena, uli yoze chatamba kwiza, nyi? Hanji chatutamba kutalila weka?”

⁴ Yesu ngwenyi: “Yeenu nukambulwile Yoano yize nunevu ni yize nunamono:

⁵ tupuputa kaanamono, yitonji kaanende, akwa mbumba kaanabeme, afwa matwi kaanevu, afu kanaahindwisa, Sango Jibema kanajambujolela yiswale.

⁶ Kawaha yoze keshi kuyambashana hakutwala kuli yami!”

⁷ Muze te tumbaji twa Yoano haaya, Yesu yabutuka kuhanjika ku mbunga hakutwala kuli Yoano ngwenyi: “Yika nwayile ni kutala mu puya? Te lumbungu unanyiki ni fuji, nyi? Ka.

⁸ Mba yika kevwe nwayile ni kutala? Umwe mutu te unazala mahina a lefuna, nyi? Ka, waze akuzala mahina a lefuna kaakutwama mu mazuwo ja mianangana.

⁹ Mba yika kevwe nwayile ni kutala? Umwe mukwa munanyi wa Zambi, nyi? Ewa, ngunanwambe ngwami, kanahiana chikolo mukwa munanyi wa Zambi.

¹⁰ Mumu hakutwala kuli Yoano, Zambi mu Mukanda wenyi kanambe ngwenyi: ‘Achivwenu! Ngunatumu kanganda kami kulutwe lie akakululikile jila.’

¹¹ Chamwenemwene ngunanwambulwila ngwami, mukachi ka akwa hashi eswe, wakuhi niumwe munene Wahiana Yoano Chipapachisa. Alioze yoze mukehe Wahiana mu wanganana wa mwilu, kanamuhiana.

¹² Chize ku mwaka uze Yoano Chipapachisa wambujolele ndoo haliabwila, Wanangana wa mwilu wakwiza ni tachi, ni akwa tachi kaakuutambula.

¹³ Akwa munanyi a Zambi eswe ni Shimbi ja Mose, ndoo kuli Yoano, haanahanjika hakutwala ku Wanangana wa mwilu.

¹⁴ Nyi nunazange, tayizenu chikuma chino ngwami, Yoano mwe Eliya, yoze ambulwile ngwo: ‘Makeza.’

¹⁵ Banjikenu kanawa, nyi nuli ni matwi.

¹⁶ “Maya mungutesa atu ja mwakono? Kaanalifu ni twanuke waze anatwama mu yitanda. Amwe kaanatambika akwo ngwo:

¹⁷ ‘Twanwimbilanga ndembo, alioze kunwahanganyine! Twalilanga mbimbi, alioze kunwalilile!’

¹⁸ Yoano haneza, te kakulitwamina kulia mu kuwayila Zambi, te keshi kunwa vinyu, atu yaamba ngwo: ‘Mwiku wa luchisa akwete!’

¹⁹ Mwana Mutu haneza te kakulia ni kunwa, ni atu yaamba ngwo: ‘Talenu mutu yono, chimbulungunya, mukwa kuzengewa, sepa lia akwa kulambwisa lijimu ni lia akwa lufuma mubi!’ Alioze mana ja Zambi kaanasoloka kanawa ku yitanga yenyi.”

Akwa membo waze te keeshi kufuliela

²⁰ Mba Yesu yabutuka kukumika membo muze alingile yipupu yenyi yinji, mumu atu jamo kaalumukine ko ku mbunge.

²¹ Yaamba ngwenyi: “Lamba lienu akwa Korazine, lamba lienu akwa Betsaida! Mumu, nyi yipupu yize alingile muli yenu, ayilingile nawa mu Tiru ni Sidone, kachi atu jamo te haanazala kulu mwanji ni kulikwita uto ha kulweza ngwo, haanalumuka ku mbunge.

²² Kashika, ngunanwambulwila ngwami, ha tangwa lia ubatwilo, lamba lienu mulikabwa likolo kuhiana lize lia akwa Tiru ni akwa Sidone!

²³ Ni yenu akwa Kafarnaume, nunanyongo ngwenu, makanuzundula ndoo mwilu, nyi? Kumakanuhulumuna ndoo mu kahia! Mumu nyi yipupu yize alingile muli yenu ayilingile mu Sodome, kachi limbo lize kulili ndoo musono!

²⁴ Kashika, ngunanwambulwila ngwami, ha tangwa lia ubatwilo, lamba lienu mulikabwa likalu kuhiana lize lia akwa Sodome.”

Twenyenu kuli yami hanga nuhwime

²⁵ Ha shimbu lize Yesu yamba ngwenyi: “A tata, Mwenya lilu ni hashi! Ngunakusakwila mumu hiwasolwela waze kaalilongesele yuma yize waswekelela akwa mana ni waze haanalilongesa.

²⁶ Ewa, Tata, Chenacho wazangile yena mwene.

²⁷ “Tata hanangukunjika yuma yeswe. Niumwe wanyingika mwe Mwana shina Tata, chibwe niumwe wanyingika mwe Tata shina Mwana, ni waze Mwana akuzanga kumusolwela.

²⁸ “Tweyenu kuli yami yenu eswe waze nwahonga ni kumbata yilemu, mba yami mungunuhwimisa.

²⁹ Zundulenu kanga yami, lilongesenu kuli yami, mumu nguli chihomboloji ni mukwa kulilelesa mu mbunge—mba munukawana uhwimino,

³⁰ mumu kanga yami yize mungunwaha yili yashi ha kumbata, ni yilemu yize ungunutwika yili yilelu.”