Mateu 1 - Mukanda Wa Zambi 1970

Tushakulu twa Yesu

¹ Wano e majina a tushakulu twa Yesu Kristu, wa ku vungu lia David, ku munyachi wa Abrahama.

^2-6a Chize kuli tata Abrahama ndoo kuli mwanangana David tushakulu kaa li wano: tata Abrahama, ni tata Isake, ni tata Yakoba, ni Yuda, ni ayayo ni anakwo; mba Pereze, ni Zebra (naye te Tamare), ni Hezrone, ni Arame, ni Aminadabe, ni Nasone, ni Salmone, ni Boaze (naye te Rahabe), ni Obede (naye te Rute), ni Jese, ni mwanangana David.

^6b-11 Chize kuli mwanangana David ndoo ku mwaka uze atwalile Aisraele ku Babilone, tushakulu kaali wano: David, ni Solomone (naye te yoze wabwile pwo lia Uria), ni Rehoboame, ni Abija, ni Asa, ni Yehosafate, ni Jehorame, ni Uzia, ni Jotame, ni Ahaze, ni Hezekia, ni Manase, ni Amone, ni Josia, ni Jehoakine ni anakwo.

^12-16 Chize ku mwaka uze atwalile Aisraele ku Babilone ndoo ku kusemuka cha Kristu, tushakulu kaali wano: Jehoakine, ni Shealtiele, ni Zerubabele, ni Abihude, ni Eliakime, ni Azore, ni Zadoke, ni Akime, ni Ehude, ni Eleazare, ni Matana, ni Yakoba, ni Josefe, lunga lia Maria, naye ya Yesu, yoze akuvuluka ngwo, Kristu.

¹⁷ Kashika yisemuko yeswe, chize kuli tata Abrahama ndoo kuli mwanangana David, yili kumi ni yiwana; chize kuli mwanangana David ndoo ku mwaka uze atwalile Aisraele ku Babilone yili yisemuko kumi ni yiwana, chize ku mwaka uze atwalile Aisraele ku Babilone ndoo ku kusemuka cha Kristu yili yisemuko kumi ni yiwana.

Kusemuka cha Yesu Kristu

¹⁸ Yesu Kristu yasemuka ngwe chino. Maria te hamwambisa kuli Josefe. Alioze muze te kanda achilimona, Maria yanyingika ngwenyi, kali ni ufumba wa Mwiku wa Linanga.

¹⁹ Josefe, lunga lienyi, te mukwa ululi. Kazangile kumuvwisa sonyi. Kashika, yanyonga kulituna ye ku tenga.

²⁰ Shimbu lize achinyongene, kuma kanganda ka mwilu yamusolokela mu chilota. Yamwamba ngwenyi: “Josefe, wa ku vungu lia David, kanda wivwa woma ha kumbata mukwenu pwo Maria, mumu chize chinaseseka muli iye chili cha Mwiku wa Linanga.

²¹ Makasema mwana lunga, ukamuluke jina ngwe, Yesu, mumu, makalamwina atu jenyi ku shili yo.”

²² Yize yeswe yabwile hanga yikamanunune liji lize ahanjikile Mwene Zambi kuli mukwa munanyi wenyi ngwenyi:

²³ “Talenu mwana pwo yoze kanda achilimona ni lunga makabwa ni ufumba. Makasema mwana lunga, ni atu maakamuluka jina ngwo, Emanuele” (kulumbunuka, Zambi kali hamwe ni yetu).

²⁴ Josefe, ha kulaula mu tulo, yalinga ngwe chize kanganda ka mwilu amwambile, yambata mukwo pwo Maria.

²⁵ Alioze kalimwene ko nenyi ndoo yasema mwanenyi wa lunga. Josefe yamuluka jina ngwenyi, Yesu.