Marku 9 - Mukanda Wa Zambi 1970

¹ Yesu yamba nawa ngwenyi: “Chamwenemwene ngunanwambulwila ngwami atu akwo anamana kuno keechi kafwa ndoo maakamona Wanangana wa Zambi uneza ni tachi.”

Mujimba wa Yesu yiwalumuka

² Muze matangwa asambano haabalika, Yesu yatwala hamwe nenyi Petulu, ni Tiangu (Jake), ni Yoano. Yaakandwisa ha mulundu usuku, haze yabwa ukawo. Kwenako kusoloka chenyi yichalumuka.

³ Mahina jenyi yaabeyima kuhiana, yaatoma lume. Mukwa kukosa niumwe hano hashi mahasa kwatomesa chichize.

⁴ Hohene Eliya ni Mose yaasoloka, te pande anate ni Yesu.

⁵ Petulu yambila Yesu ngwenyi: “Longeshi, chinawaha tubwe kuno. Tutungenu yikulika yitatu, cha yena, ni cha Mose, ni cha Eliya.”

⁶ Te kanyingikine chize anambe, mumu ayo eswe yeevwa woma unji.

⁷ Lelwa yilisoloka, yiliazulamina chizulie. No yeevwa liji mu lelwa ngwo: “Yono mwe Mwanami yoze nakuzanga kuhiana, mwivwenu.”

⁸ Susumuku tumbaji yaatala sali ni sali, alioze kaamwene mutu niumwe shina Yesu wika.

⁹ Muze te anapalumuka ha mulundu, Yesu yaaha koki ngwenyi: “Kanda mwambulwila niumwe yize hinwamona ndoo Mwana Mutu makahinduka ku kufwa.”

¹⁰ No yaafunga liji lino, alioze yaalihula mukachi ko chize kuhinduka ku kufwa muchibwa.

¹¹ Yaahula Yesu ngwo: “Kuchi mba alongeshi a Shimbi akwamba ngwo, chatamba Eliya kwiza hatangu?”

¹² Yesu ngwenyi: “Chenacho, Eliya chamutamba kwiza hatangu ni kululika yuma yeswe. Alioze kuchi mba hichinasonewa mu Mukanda wa Zambi ngwo: ‘Mwana Mutu chamutamba kwivwa lamba linji, mamupwisa wamokomoko’?

¹³ Alioze ngunanwambulwila ngwami, Eliya haneza kulu. Atu haanamulingi chize cheswe azangile, ngwe chize hichinasonewa hakutwala kuli iye.”

Yesu yatuhwisa mwiku wa luchisa muli mwana

¹⁴ Muze haaheta kuli tumbaji akwo, yaamona mbunga yinene anaajingilika. Alongeshi a Shimbi te analihangujola ni tumbaji.

¹⁵ Ha kumona Yesu, mbunga yaalishimwoka kuhiana, yaazomboka fuji kuli iye, yaamumeneka.

¹⁶ Yesu yahula tumbaji twenyi ngwenyi: “Yika nunalihangujola no?”

¹⁷ Umwe lunga wa mu mbunga yamukumbulula ngwenyi: “Longeshi, nakunehenanga mwanami wa lunga, mumu mwiku wa kanaye akwete.

¹⁸ Kweswako mwiku muumukwachila, muumulimbula. Mba mwana matutumuna fulufulu, malikobola ku mazo, mujimba muuma chau. Naliumbanga kuli tumbaji twe hanga atuhwise mwiku uze, alioze kaahashile.”

¹⁹ Yesu yamba ngwenyi: “Mhmm! Ayenu akwa kuyambashana! Ndoo mwiji muka Changutamba kubwa hamwe ni yenu? Ndoo mwiji muka Changutamba kulihumikiza ni yenu? Ngunehenenu mwe mwana.”

²⁰ Yaamuneha. Mwiku wa luchisa, ha kumona Yesu, yiutunyisa mwana. Mwe mwana yalimbuka hashi, yalangumuka ni kututumuna fulufulu.

²¹ Yesu yahula tato ngwenyi: “Miaka yingahi akubwa chechize?” Tato ngwenyi: “Chize ku ukemba wenyi.

²² Yisuho yinji mwiku wa luchisa te wakumulimbwola mu kahia ni mu meya hanga amushihe. Alioze, nyi muuhasa kulinga chimwe Chuma, tuvwile kama keke, utukwase.”

²³ Yesu ngwenyi: “Kuwamba ngwe: ‘Nyi muuhasa.’ Yuma yeswe muyihasa kubwa kuli yoze unafuliela.”

²⁴ Hazehene tato yakololoka ngwenyi: “Ngunafuliela. Ngukwase kama, ufulielo wami ukepe.”

²⁵ Yesu, ha kumona mbunga ni kukundama fuji, yakalumukina mwiku wa luchisa ngwenyi: “Yena mwiku wa kanaye kanda kafwa matwi, ngunakwambe ngwami, tuhuka muli iye. Kanda umunjila mo nawa.”

²⁶ Mwiku wa luchisa yiukololoka ni liji linene, yiumutunyisa kuhiana, mba yiutuhuka. Mwana yabwa ngwe mufu lume, chocho anji yaamba ngwo: “Hafwa.”

²⁷ Alioze Yesu yakwata mwana ku kwoko, yamukatwisa, mba mwana yakatuka, yamana.

²⁸ Muze Yesu hanjila mu zuwo, tumbaji twenyi yaamuhula ha ukawo ngwo: “Kuchi mba yetu kutwahashile kutuhwisa mwiku uze wa luchisa?”

²⁹ Yesu yamba ngwenyi: “Mwiku ngwe uno kuushi kutuhuka, shina ha kulemba Zambi, mba muutuhuka.”

Yesu yambulula nawa kufwa chenyi ni uhindukile wenyi

³⁰ Yesu ni tumbaji twenyi yaakatuka ko, yaabalika ndusu mu chifuchi cha Galilea. Yesu te kazangile mutu niumwe kuchinyingika,

³¹ mumu yalongesa tumbaji twenyi. Yaamba ngwenyi: “Maakunjika Mwana Mutu ku moko ja atu waze maakamushiha. Mba ha tangwa lia muchitatu kumakahinduka.”

³² Tumbaji keevwile ko kanawa ulumbunwiso wa liji lino, alioze yeevwa woma kumuhula.

Iya munene Wahiana?

³³ No yaaheta ku Kafarnaume. Muze te ali mu zuwo, Yesu yaahula ngwenyi: “Yika nwabwanga ni kulihangujola mu jila?”

³⁴ Yaahola kuluu, mumu mu jila yaalihamika mukachi ko ngwo: “Iya munene Wahiana?”

³⁵ Yesu yatwama, yatambika tumbaji kumi ni aali ni kwamba ngwenyi: “Nyi umwe mazanga kubwa mutangu, chamutamba kubwa kunyima lia akwo eswe, kanda kavumbi ko.”

³⁶ Yesu yanda kanuke, yamumika mukachi ko, yamusa mu kondo, yamba ngwenyi:

³⁷ “Yoze matambula umwe wa kuli twanuke wano akepe mujina liami, mangutambula yami. Yoze mangutambula, hi yami wiko ko matambula, alioze matambula nawa yoze wangutumine.”

Yoze keshi kulimika ni yetu, kali niwetu

³⁸ Yoano yambila Yesu ngwenyi: “Longeshi, twamwene umwe mutu te kanatuhwisa mwiku wa luchisa mu jina lie. Twamukanjishile, mumu hi wa ku mbunga yetu ko.”

³⁹ Alioze Yesu yakumbulula ngwenyi: “Kanda numukanjisa, mumu mutu niumwe yoze malinga chikomokeso mu jina liami, mahasa nawa kungwamba yibi nikawashi.

⁴⁰ Mumu yoze keshi kulimika ni yetu, kali niwetu.

⁴¹ Yoze manwaha musenge wa meya a kunwa mumu nuli a Kristu chamwenemwene ngunanwambulwila ngwami, mutu yoze makatambula chawana chenyi.”

Yeseko ya uvulumwino

⁴² “Yoze mavulumwisa umwe wa kuli twanuke wano akepe waze akungufuliela, chinalite amukase liwe linene ha kota ni kumumbila mu kalunga lwiji.

⁴³ Nyi kwoko lie liakukuvulumwisa, libatule. Shinoho ukanjile mu mwono wamwenemwene ni kwoko limuwika, kuhiana chize muufunga moko je eswe aali akakumbile mu kahia kaze kukeshi kuhasa kujima, [

⁴⁴ Muze ‘vuno lio keshi kufwa mo, ni kahia kukeshi kujima mo.’]

⁴⁵ Nyi kulu lie liakukuvulumwisa, libatule. Shinoho ukanjile mu mwono wamwenemwene ni kulu limuwika, kuhiana chize muufunga molu je eswe aali akakumbile mu kahia. [

⁴⁶ Muze ‘vuno lio keshi kufwa mo, ni kahia kukeshi kujima mo.’]

⁴⁷ Nyi liso lie liakukuvulumwisa, litombongone. Shinoho ukanjile mu Wanangana wa Zambi ni liso limuwika, kuhiana chize muufunga meso je eswe aali akakumbile mu kahia.

⁴⁸ Muze ‘vuno lio keshi kufwa mo, ni kahia kukeshi kujima mo.’

⁴⁹ Mumu mutu mweswe makamuvunjila ni kahia.

⁵⁰ “Mungwa Chuma chibema. Alioze nyi mungwa hiwasamuka, neka mauyemesa? Bwenu ni mungwa muli yenwene, bwenu ni uhwimino hakachi kenu.”