Marku 8 - Mukanda Wa Zambi 1970

Yesu yalisa atu tununu awana

¹ Ha matangwa waze mbunga yinene yaamukunguluka nawa. Kaabwile ko ni Chuma nichimwe cha kulia. Yesu yatambika tumbaji twenyi ni kwamba ngwenyi:

² “Mbunga yino keke nguneevwila, mumu kaali kulu hamwe ni yami matangwa atatu, keeshi nawa nichimwe cha kulia.

³ Nyi namba ngwami ‘Hilukenu, nuye ku mahienu,’ kaalile nichimwe, maalezumuka mu jila, mumu akwo kusuku anakakatuka.”

⁴ Tumbaji twenyi yaakumbulula ngwo: “Muma muno mu puya. Kulihi mutu mawana yakulia ya kulisa mbunga yibwa haha?”

⁵ Yesu yaahula ngwenyi: “Mbolo jingahi nuli najo?” Ayo ngwo: “Shimbiali.”

⁶ Neye yambila mbunga atwame hashi, yanda mbolo shimbiali, yasakwila Zambi, yajibalula, yajihana kuli tumbaji twenyi, ajitetele ye mbunga. No yaajianyina.

⁷ Yabwa nawa ni tumwe tuyishi. Muze Yesu hasakwila Zambi mumu ha tuyishi, yambila tumbaji twenyi atwanyine nawa atu.

⁸ Atu eswe yaalia, yaakuta. Mba tumbaji yaazalisa tupaya shimbiali ni yibalubalu yize yasalile.

⁹ Kwoka cha atu ngwe tununu awana. Hazehene Yesu yaashika.

¹⁰ Mba Yesu ni tumbaji twenyi yaanjila mu wato, yaaya ku chifuchi cha Dalmanuta.

Afariseu yeeta chilayi

¹¹ Afariseu yeeza, yaabutuka kuhamika ni Yesu. Ha kumweseka yaamwita chilayi chize muchaalweza ngwo, chiyulo chenyi cha mwilu.

¹² Yesu yatwa chikolo mikuma nikwamba ngwenyi: “Kuchi kevwe yenu atu ja mwakono nunafupu chilayi? Chamwenemwene ngunanwambulwila ngwami, chilayi nichimwe manwaha yenu atu ja mwakono.”

¹³ Mba Yesu yaahichika, yanjila mu wato, yazauka musali lia chitende.

Yitumbo ya mbolo ya Afariseu ni ya Aherode

¹⁴ Tumbaji yaavulama kumbata mbolo yinazuku. Yabwa lume ni mbolo yimuwika mu wato.

¹⁵ Yesu yaakanyamisa ngwenyi: “Talenu kananwa, keyelenu yitumbo ya mbolo ya Afariseu ni ya Aherode.”

¹⁶ Tumbaji yaalihanjekesa ngwo: “Kanambe chino mumu kutushi mbolo.”

¹⁷ Yesu yachinyingika, yaahula ngwenyi: “Kuchi kevwe nunalihanjekesa ngwenu: ‘Kanambe chino mumu kutushi mbolo’? Kanda nuchinyingika, nyi? Kanda chinulumbunukina, nyi?

¹⁸ Meso nuli no, kunushi kumona, nyi? Matwi nuli no, kunushi kwivwa, nyi? Kunushi kwiwuluka

¹⁹ mbolo jize jitano nabalwile kuli atu tununu atano, nyi? Tupaya a yibalubalu angahi nwanjile?” No yaamba ngwo: “Tupaya kumi ni aali.”

²⁰ Yesu ngwenyi: “Muze nabalwile mbolo shimbiali kuli tununu awana, tupaya a yibalubalu angahi nwanjile?” Ayo ngwo: “Shimbiali.”

²¹ Neye yamba ngwenyi: “Kanda chinulumbunuka, nyi?”

Yesu yalawisa meso ja kapuputa

²² Yaaheta ku limbo lia Betsaida. Kwenako atu anehenene Yesu kapututa, yaaliumba kuli iye hanga amuse moko.

²³ Yesu yamukwata ku kwoko, yamutwala haze lia limbo. Muze te hamukwita mate ha meso, yamusa moko, yamuhula ngwenyi: “Muuhasa kumona chimwe Chuma, nyi?”

²⁴ Neye yeseka. Yamba ngwenyi: “Ngunamono atu ngwe mitondo, alioze yinende.”

²⁵ Yesu yamusa nawa moko ha meso. Mutu yoze yeseka nawa kuhiana, yalaula, yamona yuma yeswe zwalala.

²⁶ Yesu yamushika aye ku mahio, ngwenyi: “Kanda unjila mu limbo.”

Petulu yashindakenya ngwenyi: “Yesu mwe Chilamwina yoze Zambi alakenyene.”

²⁷ Yesu ni tumbaji twenyi yaakatuka ko, yaaya ku yihunda hehi ni limbo lia Sesarea Filipu. Mu jila Yesu yaahula ngwenyi: “Atu kuchi akunguvuluka ngwo, nguli iya?”

²⁸ Yaamukumbulula ngwo: “Akwo kaakwamba ngwo: ‘Yoano Chipapachisa.’ Akwo ngwo: ‘Eliya.’ Alioze akwo ngwo: ‘Umwe mukwa munanyi mukwo wa Zambi.’ ”

²⁹ Yesu yaahula ngwenyi: “Alioze yenu, kuchi nwakunguvuluka ngwenu nguli iya?” Petulu yakumbulula ngwenyi: “Yena mwe Chilamwina yoze Zambi alakenyene.”

³⁰ Yesu yaaha koki ngwenyi: “Kanda nwambulwila niumwe hakutwala kuli yami.”

Yesu yambulula kufwa chenyi ni uhindukilo wenyi

³¹ Yesu yabutuka kulongesa tumbaji twenyi ngwenyi: “Chatamba Mwana Mutu kumona lamba linji. Makulwana ja Ayuda, ni mahako a lutwe a Zambi, ni alongeshi a Shimbi maakalituna ye, maakamushiha, mba ha tangwa lia muchitatu kumakahinduka.”

³² Liji lino yalihanjika mwazu. Kashika Petulu yamutwala ku tenga, yabutuka kumukanjisa.

³³ Alioze Yesu yatewuluka, nikutala tumbaji twenyi, yabajila Petulu ngwenyi: “Ngukatuke Sakwonga, mumu kuushi kunyonga ngwe Zambi, alioze ngwe atu.”

³⁴ Hazehene yatambika mbunga hamwe ni tumbaji twenyi, yaamba ngwenyi: “Nyi umwe mazanga kungukaula, alitwamine kulinyonga iye mwene, azundule kulusu yenyi, angukaule.

³⁵ Mumu yoze mazanga kulamwina mwono wenyi, kumakautokesa. Alioze yoze matokesa mwono wenyi mumu hali yami ni ha Sango Jibema, kumakaulamwina.

³⁶ Mutu chika mafumbula nyi mabita hashi heswe, alioze makatokesa mwono wenyi?

³⁷ Mutu chika mahasa kuhana ha kuyuka mwono wenyi nawa?

³⁸ Mumu yoze manguvwila sonyi, yami ni longeso liami hakachi ka atu ja mwakono, yihulia kanda yivulumunyi, yami Mwana Mutu nawa mungukamuvwila sonyi muze mungukeza mu uhenya wa Tata hamwe ni tunganda a mwilu.”