Marku 6 - Mukanda Wa Zambi 1970

Akwa Nazare yaalituna Yesu

¹ Yesu yakatuka ko, yaheta ku limbo kuze akolelele. Tumbaji twenyi yaaya nenyi.

² Ha tangwa lia kuhwima yabutuka kulongesa mu zuwo lia kuwayila lia Ayuda. Atu anji abwile mo. Muze heevwa longeso lienyi, yaalishimwoka kuhiana, yaalihula ngwo: “Yuma yino kulihi ayiwana? Mana aka atambula? Ngwe kuchi analingi yikomokeso yino?

³ Awu hi mukwa kusonga mabaya ko, nyi? Hi mwana wa Maria ko, nyi? Hi yayo ya Tiangu (Jake), no Jose, ni Yudase, ni Simone ko, nyi? Mandumbu jenyi keeshi hakachi ketu, nyi?” Mba yaalituna ye.

⁴ Yesu yaamba ngwenyi: “Kuma kweswe mukwa munanyi wa Zambi kaakumulemesa, alioze mu limbo lienyi mwene, ni ku vungu lienyi, ni ku jiko lienyi, keeshi kumusa vumbi.”

⁵ Kahashile ko kulinga chikomokeso nichimwe, shina yasa moko hali mieji akepe, yaawuka.

⁶ Yesu yalishimwoka mumu kaafulielele ko. Yesu yendangana mu membo eswe akujingilika ni kulongesa.

Yesu yatuma tumbaji kumi ni aali

⁷ Yatambika tumbaji twenyi kumi ni aali, mba yabutuka kwatuma aali aali. Yaaha chiyulo cha kutuhwisa nacho mwiku wa luchisa.

⁸ Yaaha Shimbi yino ngwenyi: “Kanda numbata Chuma nichimwe mu wenyi: chibwe yakulia, hanji chibakumuna, chibwe mbongo nijimwe mu miya, shina lume lukanda ku kwoko.

⁹ Nuzala sapato, alioze kanda nuzala yikuto yaali.”

¹⁰ Yaamba nawa ngwenyi: “Lieswe zuwo munukanjila, twamenu kwe kuze ndoo munukakatuka ko.

¹¹ Nyi atu a kuma kuze keechi kanatambula hanji kunwivwa, katukenu ko ni kukukumuna fufuta ya ku molu jenu ha kwatoweza.”

¹² No yaatuhuka, yambujola ngwo, atu alumuke ku mbunge.

¹³ Yaatuhwisa mwiku wa luchisa unji, yaawayisa mieji anji maji ni kwawuka.

Kufwa cha Yoano Chipapachisa

¹⁴ Mwanangana Herode yevwa lufuma wa Yesu, mumu jina lienyi yilifumana. Amwe atu yaambamba ngwo: “Yoano Chipapachisa hahinduka ku kufwa. Kashika kali ni ndundo ja kulinga yikomokeso yino.”

¹⁵ Alioze akwo ngwo: “Kali Eliya.” Akwo ngwo: “Kali mukwa munanyi wa Zambi ngwe waze a ku shakulu.”

¹⁶ Alioze muze Herode hachivwa, yamba ngwenyi: “Mwe Yoano, yoze natapile mutwe, mwenawo Zambi hamuhindwisa.”

¹⁷ Herode mwe watumine akwate Yoano, yamusa mu zuwo lia lamba mumu hali Herodia. Yino yeswe yabwile mumu Herode wambachile Herodia, chibwe wabwile pwo lia yayo Filipe.

¹⁸ Yoano te hambila Herode ngwenyi: “Kuchalitele ni Shimbi kumbata pwo lia yayenu.”

¹⁹ Kashika, Herodia yahalila Yoano, yazanga kumushiha, alioze kahashile,

²⁰ mumu Herode yevwila Yoano woma, yanyingika ngwenyi, kali mukwa ululi kanda munangi. Kashika, yamufunga kanawa. Herode yakakashana kuhiana muze amuvwile, alioze yawahilila kumwivwa.

²¹ Alioze tangwa lia mihalo ya Herodia yiliheta. Herode yalulika chiwanyino cha tangwa lia kusemuka chenyi, yatambika akwa lufuma a mu wanangana wenyi, ni miata a jita, ni atu a lufuma a mu Galilea.

²² Mwana wa Herodia wa pwo yanjila, yahangana, yawahila Herode ni waze eswe abwile nenyi ku mesa. Mwanangana yambila mwana pwo ngwenyi: “Ngwite cheswe Chuma unazange, mungukwaha cho.”

²³ Yamulakenya ni Shingo ngwenyi: “Cheswacho muungwita, mungukwaha cho ndoo ku Chihanda cha hakachi cha wanangana wami.”

²⁴ Mwana pwo yaatuhuka, yahula naye ngwenyi: “Yika mungwita?” Naye ngwenyi: “Mutwe wa Yoano Chipapachisa.”

²⁵ Mwana pwo yahiluka nikawashi kuli mwanangana, yamwita ngwenyi: “Ngwehe Mutwe wa Yoano Chipapachisa haliabwila lume ha chenga.”

²⁶ Mwanangana yevwa chinyengo chinji. Alioze mumu hali mashingo jenyi, ni hali waze te anatwama nenyi ku mesa kahashile kumuhangulula.

²⁷ Hazehene mwanangana yatuma umwe kajita hanga anehe mutwe wa Yoano. Mwe kajita yatuhuka, yaya ku zuwo lia lamba, yatapa Yoano Chipapachisa.

²⁸ Yaneha mutwe wenyi ha chenga, yamwaha wo mwe mwana pwo. Neye yautwalila naye.

²⁹ Muze tumbaji twa Yoano haachivwa, yeeza ni kwanda mujimba wenyi, yaaya ni kuufunda.

Yesu yalisa atu tununu atano

³⁰ Tunganda yaahiluka, yaakunguluka kuli Yesu, yaamwambulwila yize yeswe alingile ni yize alongesele.

³¹ Atu anji ejilejile ni ayileyile. Yesu ni tumbaji twenyi yaahona chibwe ola ya kulia. Kashika Yesu yaambila ngwenyi: “Tuyenu kuma kwa ukawetu hanga nuhwime kama hakepe.”

³² Mba yaaya ayo ene mu wato kuma kwa ukawo.

³³ Alioze atu anji aamwene ni kukatuka, yaanyingika, yaazomboka a ku membo eswe, yaahanga kuheta. Yesu ni tumbaji twenyi te kanda achiheta ko.

³⁴ Muze te anatuhuka mu wato, Yesu yamona mbunga yize yinene. Yeevwila keke mumu abwile ngwe mapanga waze keeshi kafunga, mba yabutuka kwalongesa yuma yinji.

³⁵ Muze te tangwa hiliendala chikolo, tumbaji twenyi yaamukundama, yaamwamba ngwo: “Kuma kuno tuli kwa ukawetu, ni tangwa hiliendala chikolo.

³⁶ Shikenu atu wano, hanga aye kuli waze atwama ku minda ni ku yihunda yakujingilika, akalilanjile yakulia.”

³⁷ Yesu ngwenyi: “Ahenu yenwene yakulia.” No yaamuhula ngwo: “Tuye tulande mbolo ja kufwika kulakaji jaali ja mbongo tukaahe yakulia, nyi?”

³⁸ Yesu ngwenyi: “Mbolo jingahi nuli najo? Yeenu nutale.” Muze haanyingika, yaamukumbulula ngwo: “Mbolo jitano ni yishi aali.”

³⁹ Hohene Yesu yambila tumbaji ngwenyi: “Atwamisenu eswe ngango ni ngango ha mwambu wa wisu.”

⁴⁰ No yaatwama ha ngango ja kulakaji kulakaji ni makumi atano atano.

⁴¹ Yesu yanda mbolo jitano ni yishi aali, yatala kwilu, yasakwila, mba yabalula mbolo, yajihana kuli tumbaji ajanyine e atu. Yaanyina nawa yishi aali, ayo eswe.

⁴² Eswe yaalia, yaakuta.

⁴³ Tumbaji yaazalisa tupaya kumi ni aali a yibalubalu ya mbolo ni yishi yize yasalile ho.

⁴⁴ Waze alile yakulia yize, kwoka cho, tununu atano a malunga.

Yesu yenda ha chitende

⁴⁵ Hazehene Yesu yanjisa tumbaji twenyi mu wato, hanga atetekele musali lia chitende ku limbo lia Betsaida, shimbu iye mwene te machishika mbunga.

⁴⁶ Muze haashika, yakanduka ha mulundu mu kulemba.

⁴⁷ Muze tangwa hiliatoka kulu, wato yiubwa mukachi ka chitende, Yesu yasala ukawenyi ha tunda.

⁴⁸ Neye yaamona nikubinda ni miavu ya meya, mumu fuji yiiyabinjisa. Mba hakamwihi ni ndemba mutangu, Yesu yakundama nikwenda ha meya, yazanga kwahiana.

⁴⁹ Muze haamona Yesu kanende ha meya, tumbaji yaanyonga ngwo, mujimu, yaateta chikolo,

⁵⁰ mumu eswe yeevwa woma muze te anamumono. Alioze hazehene Yesu yaamba ngwenyi: “Hamukenu! Yami mwene. Kanda nwivwa woma!”

⁵¹ Neye yanjila mu wato, mba fuji yiihola. No yaalishimwoka kuhiana,

⁵² mumu te kaanyingikine kanawa chikuma cha mbolo, mumu mbunge jo jakalile.

Yesu yawuka mieji mu chifuchi cha Genezare

⁵³ No yaazauka, yaaheta ku tunda mu chifuchi cha Genezare, yaakasa wato ku mbumbulu.

⁵⁴ Muze te haatuhuka mu wato, hazehene atu yaayingika Yesu.

⁵⁵ No yaazomboka mu chifuchi chize cheswe, yaamunehena mieji ha mihela yo, muze heevwa ngwo: “Kwali akuze.”

⁵⁶ Kweswe kuze ayileyile mu yihunda, ni mu membo, chibwe kuli waze te atwama ku minda, atu te kaakusa mieji ha yitanda mba yaamulembejeka ni kwatayiza kukwata kama ku songo lia hina lienyi. Eswe waze amukwachile yaahindwoka.