Marku 4 - Mukanda Wa Zambi 1970

Chishima cha chikuwa

¹ Yesu yabutuka nawa kulongesa ku mbumbulu ya chitende cha Galilea Mbunga yinene yaamukunguluka. Kashika yanjila mu wato, yatwa ma mo. Wato te mu meya uli, ye mbunga yaamana ku mbumbulu.

² Neye yaalongesa yuma yinji ni yishima. Mu longeso lienyi yaamba ngwenyi:

³ “Achivwenu! Umwe mutu watuhukile mu kukuwa.

⁴ Muze te anakuwu mbuto, yimwe yiiholokela ku sesa lia jila. Tujila yeeza, yaayilia.

⁵ Yikwo yiiholokela homa ha mawe haze kuhabwile ko mavu anji. Mbuto yiisoka nikawashi, mumu te kuheshi ndama ya mavu.

⁶ Alioze muze tangwa hiliasasaminya, yibuta yilekama, yiyuma chau, mumu te kuyishi miji.

⁷ Mbuto yikwo yiiholokela mukachi ka mingonga. Ye mingonga yiitatuka, yiikeketesa yibuta, kuyemine ko mihuko.

⁸ Alioze mbuto yikwo yiiholokela ha mavu abema, yiisoka, yiitatuka, yiiyima mihuko: yimwe makumi atatu, yikwo makumi asambano, yikwo kulakaji.”

⁹ Yesu yaweza ho ngwenyi: “Banjikenu kanawa, nyi nuli ni matwi!”

Chikuma chize Yesu atelele yishima

¹⁰ Muze Yesu kabwile ko nawa ni mbunga yinene, amwe atu waze amujingilikile, hamwe ni tumbaji kumi ni aali yaamuhula ulumbunwiso wa yishima yize.

¹¹ Neye yaakumbulula ngwenyi: “Yenu hananwehe cho kunyingika chijimbikilo cha wanangana wa Zambi. Alioze akwo, waze ali haze, kaakwivwa maliji eswe ni yishima,

¹² hanga ngwo: ‘Maakatala kutala, hindu keechi kumona; maakatala kubanjika, hindu keechi kunyingika; Kuchina maahiluka kuli Zambi akaakonekene.’ ”

Yesu yalumbununa chishima cha chikuwa

¹³ Yesu yaahula ngwenyi: “Chishima chino kuchanulumbunukinyine, nyi? Mba ngwe kuchi yishima yeswe yikwo muyinulumbunukina?

¹⁴ Chikuwa kakukuwa liji lia Zambi.

¹⁵ Atu akwo kaalifwa ngwe sesa lia jila, kuze kwakuholokela lie liji. Enoo akulivwa, alioze hazehene Sakwonga kakuchiza liji lize akuwile muli ayo.

¹⁶ Chimuwika nawa, ni waze akutambula mbuto ha mawe. Kaakwivwa liji lia Zambi, ni hazehene kaakulitambula ni uwahililo.

¹⁷ Hindu ye mbuto miji kuyishi kuya kusuku. Kaakunyongonona ha shimbu likepe, alioze muze lamba hanji yihungumiona yakwiza mumu ha lie liji, hazehene maatalinga.

¹⁸ Akwo akutambula mbuto mukachi ka mingonga. Enoo akwivwa liji lia Zambi,

¹⁹ alioze yibikalo ya mwono uno, kwonga cha ubite, ni usona wa yuma yeka ni yeka yakukeketesa lie liji. Kashika, kulishi kwima mihuko.

²⁰ Atu akwo kaakutambula mbuto ha mavu abema. Enoo akwivwa liji lia Zambi, akulitambula pundu, akwima mihuko: amwe makumi atatu, akwo makumi asambano, akwo kulakaji.”

Chishima cha ndeya

²¹ Yesu yaahula nawa ngwenyi: “Atu kaakuneha ndeya ni kuyisa mushi lia kapaya, hanji kushi lia muhela, nyi? Keeshi kuyisa ha chikwachilo cha ndeya, nyi?

²² Kukushi Chuma cha kuswama chize kuchichi kasoloka nawa. Chibwe kukushi Chuma cha kuhengeka chize kuchichi kasoloka mu pangu.

²³ Nyi umwe uli ni matwi, evwe kwenyi!”

²⁴ Neye yaambila nawa ngwenyi: “Kanyamenu ku yuma yize nwakwivwa. Yeseko yize nwakwesekela akwenu, Zambi makanwesekela yo kumakanuwezela yikwo nawa.

²⁵ Mumu yoze ukwete, maakamuwezela yikwo, alioze yoze keshi nacho, maakamuchiza chibwe chize ali nacho.”

Chishima cha mbuto yize yakutatuka ukawayo

²⁶ Yesu yamba nawa ngwenyi: “Wanangana wa Zambi walifwa ngwe chino. Umwe mutu unakuwu mbuto mu munda.

²⁷ Kakubomba ha ufuku. Muze hikwacha, kakuhinduka. Mbuto kuyakusoka, kuyakusuhwa, kunyingika ka kutatuka chayo.

²⁸ Mavu kaakusokesa mihuko ayo ene: hatangu mafwo, muyibwa muze mukungo, mba kukola cha mbuto ha mukungo.

²⁹ Muze mbuto hiyakola, mayibatula ni poko mumu tangwa hiliaheta.”

Chishima cha lunona wa chibuta cha mostarde

³⁰ Yesu yamba nawa ngwenyi: “Ni Chuma chika mututakenya Wanangana wa Zambi? Hanji ni chishima chika mutuulumbununa?

³¹ Kuwalifwa ngwe chino. Umwe mutu kanande lunona wa chimwe chibuta, mostarde. Muze akumutumba kali mukepe Wahiana nona jeswe ja hashi.

³² Alioze muze kakutaka, chibuta chawo chakubwa chinene chahiana yibuta yeswe. Chakutanda mitango yinene yinene, ni tujila kakutunga yaswa mu chizulie chacho.”

³³ Ni yishima yinji ngwe yino, Yesu yaalongesa liji lia Zambi nikulita ni kuhasa cho.

³⁴ Yaalongesa shina ni yishima. Alioze muze abwile ha ukawo, yalumbununa yuma yeswe kuli tumbaji twenyi.

Yesu yaholesa kangonga wa tachi

³⁵ Ha tangwa lizeliene, muze tangwa hilianjila kulu, Yesu yambila tumbaji twenyi ngwenyi: “Tuzaukenu, tuye musali lia chitende.”

³⁶ Yaahichika mbunga. Mba tumbaji yaatwala Yesu mu wato uze te anatwama. Mato akwo nawa abwile hamwe no.

³⁷ Susumuku kangonga wa tachi yeza. Miavu ya meya yiinjila mu wato, wato yiubutuka kuzala.

³⁸ Alioze Yesu te kunyima lia wato ali, mu tulo, yashachila ha musau. Tumbaji yaamulawisa, ngwo: “Longeshi, nichimwe kuli yena, nyi? Tunafu!”

³⁹ Yesu yalaula, yakanda kangonga ni meya ni liji lia tachi ngwenyi: “Hola zungo! Bwako kuluu!” Fuji yiihola, yikubwa lume kuluu.

⁴⁰ Yesu yaahula ngwenyi: “Kuchi kevwe nunevu woma? Kanda nuchifuliela, nyi?”

⁴¹ Tumbaji yeevwa woma unji, yaalihanjekesa ngwo: “Awu mwene iya? Chibwe fuji ni meya yakumwononokena!”