Marku 3 - Mukanda Wa Zambi 1970

Mukwa kwoko liasosewa

¹ Yesu yanjila nawa mu zuwo lia kuwayila lia Ayuda. Yimubwa umwe mukwa kwoko liasosewa.

² Amwe atu yaalayila Yesu nyi mawuka mweji yoze ha tangwa lia kuhwima, hanga akamusume mulonga.

³ Yesu yambila mukwa kwoko liasosewa ngwenyi: “Katuka, umane mukachi ka atu eswe.”

⁴ Mba yahula waze amutalile ngwenyi: “Shimbi jetu kuchi jinatayiza kulinga ha tangwa lia kuhwima; kulinga yibema hanji kulinga yibi? Kulamwina mutu hanji kumwonona?” Alioze yaahola kuluu.

⁵ Yesu yaatala eswe ni utenu, yevwa chinyengo kuhiana mumu ha kukala cha mbunge jo, yambila mwe mutu ngwenyi: “Olola kwoko lie.” Neye yaliolola mba yilibwa lingunu.

⁶ Afariseu yaatuhuka mu zuwo lia kuwayila nikulikungulula hazehene ni Aherode, yaamutwama punga hamuwika hanga amone chize maahasa kumushihisa.

Mbunga yeeza kuli Yesu

⁷ Hohene Yesu yaya ku chitende hamwe ni tumbaji twenyi. Mbunga yinene yaamukaula. Haanakatuka ku chifuchi cha Galilea ni cha Yudea,

⁸ ni ku limbo lia Yerusaleme, ni ku chifuchi cha Idumea, ni muze musali lia Yordau, ni ku chifuchi chize chasulangana ni membo ja Tiru ni Sidone. Mbunga yino yinene yeeza kuli Yesu mumu te heevwa yuma yize alingile.

⁹ Yesu yambila tumbaji twenyi ngwenyi: “Nguselenu wato, ngumane mo,” hanga mbunga keechi kumushinjeka.

¹⁰ Yesu yamba chino, mumu wawukile atu anji, ni mieji yaamuzukukila.

¹¹ Tangwa lieswe muze miku ya luchisa te yakumumona, yakufulamana ku meso jenyi ni kukololoka ngwo: “Mwana Zambi yena!”

¹² Alioze Yesu yawaha koki chikolo ngwenyi: “Kanda ungusolola.”

Yesu yatongola tunganda kumi ni aali

¹³ Yesu yakanduka ha mulundu, yatambika waze iye mwene apalile. No yeeza kuli iye.

¹⁴ Neye yatongola kumi ni aali, yaaluka ngwenyi: “Tunganda.” Yaatongola, hanga akabwe nenyi, hanga akaatume ni kwambujola Sango Jibema,

¹⁵ ni kwaha chiyulo cha kutuhwisa nacho mwiku wa luchisa.

¹⁶ Kumi ni aali waze atongwele majina jo wano: Simone (yoze Yesu alukile jina likwo ngwenyi, Petulu),

¹⁷ ni Tiangu (Jake), ni Yoano, ana a Zebedeu a malunga (Yesu yaaluka jina likwo Boanerjese, kulumbunuka ngwo, atu waze alifwa ni kukulunguza cha vula),

¹⁸ ni Andre, ni Filipe, ni Bartolomeu, ni Mateu, ni Tomase, ni Tiangu (Jake) mwana wa Alfeu, ni Tadeu, ni Simone (mukwa kuzanga utuswilo wa chifuchi),

¹⁹ ni Yudase Kakeriote (yoze wakunjikile Yesu kuli akwa kole jenyi).

Yesu ni Belzebu

²⁰ Yesu yahiluka mu zuwo. Mba mbunga yaakundama nawa. Ha chino, Yesu ni tumbaji twenyi kaahashile chibwe kulia.

²¹ Muze usoko wenyi haachivwa, yeeza akamukwate, mumu ambile ngwo: “Kanazaluka!”

²² Alongeshi a Shimbi yaakatuka ku Yerusaleme, yeeza kwe kuze, yaamba ngwo: “Belzebu akwete!” Nawa ngwo: “Mwata wa mwiku wa luchisa mwe unamwehe ndundo ja kutuhwisa najo mwiku uze.”

²³ Yesu yaatambika, yaatela yishima ngwenyi: “Ngwe kuchi Sakwonga mahasa kulituhwisa iye mwene?

²⁴ Nyi akwa wanangana maalihandununa ni kulitachika ene, wanangana uze muukabwa wahululu.

²⁵ Nyi akwa limwe jiko maalihandununa ene, jiko lize mulikafwa.

²⁶ Chenacho nawa, nyi Sakwonga malihandununa ni kulitachika iye mwene, wanangana wenyi kuuchi kalinduluka.

²⁷ “Mutu niumwe mahasa kunjila mu zuwo lia chitakame ni kwiya yuma yenyi, nyi hatangu kanda achimukasa. Muze hamukasa, mba mahasa kwiya yuma yeswe mu zuwo lienyi.

²⁸ “Chamwenemwene ngunanwambulwila ngwami, Zambi makonekena atu milonga yo yeswe ni kushililika cho cheswe.

²⁹ Alioze yoze mashililika Mwiku wa Linanga, Zambi kechi kwiza kumukonekena ndoo ku miaka yeswe.”

³⁰ Yesu yachamba mumu ayo ambile ngwo: “Mwiku wa luchisa akwete.”

Naye ni anakwo ja Yesu

³¹ Naye ni anakwo ja Yesu yaaheta, yaamana haze, yaatuma liji ni kumutambika.

³² Mbunga yaatwama nikumujingilika. Atu yaamwamba: “Ngwowe, noko ni anakwenu haze ali; kaanakufupu.”

³³ Yesu ngwenyi: “Mwe mama iya? Ni anakwetu aya?”

³⁴ Yatala sali ni sali hali waze amujingilikile. Mba yamba ngwenyi: “Talenu, mama ni anakwetu, enaa.

³⁵ Mumu yoze wakulinga upale wa Zambi, mwenawo mwe mwanakwetu, ni ndumbwami, ni mama.”