Marku 2 - Mukanda Wa Zambi 1970

Yesu yawuka mukwa kalepa

¹ Kulutwe lia matangwa amwe, muze Yesu hanjila nawa mu Kafarnaume, atu yeevwa ngwo: “Mu zuwo ali.”

² Anji yaakunguluka, chocho kukwabwile nawa muhela, chibwe ku chikolo. Shimbu te Yesu machilongesa sango jenyi,

³ amwe atu yeeza ni kumunehena mukwa kalepa. Atu awana te anamumbata.

⁴ Alioze kahashile kukundama kuli Yesu mumu ha kwoka cha mbunga. Kashika afukwile fulumba talanganyi ni haze abwile Yesu. Mu chitutulu chize alokwele, yaasunwishina mo mukwa kalepa wakubombesa ha muhela wenyi.

⁵ Muze hamona ufulielo wo, Yesu yambila mukwa kalepa ngwenyi: “Mwanami, milonga ye hiyakonekenewa.”

⁶ Alioze amwe alongeshi a Shimbi te anatwama ko. Yaanyonga ngwo:

⁷ “Kuchi mutu yono anahanjika chocho? Kanasaula Zambi! Iya mahasa kukonekena milonga? Zambi wika machihasa.”

⁸ Hazehene Yesu yanyingika chize anyongene, yaahula ngwenyi: “Kuchi kevwe nuli ni manyonga wano?

⁹ Chashi chika, shina kwambila mukwa kalepa ngwami: ‘Milonga ye hiyakonekenewa,’ hanji kwamba ngwami: ‘Katuka, anda muhela we, wende’?

¹⁰ Alioze ngunazange nunyingike ngwenu, Mwana Mutu chiyulo akwete hano hashi cha kukonekena milonga.” Mba yambila mukwa kalepa ngwenyi:

¹¹ “Ngunakwambe ngwami: Katuka, anda muhela we, yako kwe ku mahie!”

¹² Atu eswe yaamutala. Mutu yoze yakatuka, yanda muhela wenyi nikawashi, yatuhuka ku meso ja atu eswe. Ayo eswe yaalishimwoka kuhiana, yaalemesa Zambi ngwo: “Kanda tuchimona kama nilimwe tangwa!”

Yesu yatambika Levi

¹³ Yesu yahiluka ku mbumbulu ya chitende cha Galilea. Mbunga yeezaza kuli iye. Neye yaalongesa.

¹⁴ Muze te anendangana yamona Levi, mwana wa Alfeu, te kanatwama mu zuwo lia kulambwishila lijimu. Yesu yamwamba ngwenyi: “Ngukaule.” Levi yakatuka, yamukaula.

¹⁵ Mabwamuze Yesu yalia mu zuwo lia Levi. Akwa kulambwisa lijimu ni akwa lufuma mubi anji atwamine ku mesa hamwe ni Yesu ni tumbaji twenyi, mumu anji ngwe wano yaabutuka kumukaula.

¹⁶ Alongeshi a Shimbi a ku mbunga ya Afariseu yaamumona ni kulia hamwe ni akwa kulambwisa lijimu ni akwa lufuma mubi. Mba yaahula tumbaji twenyi ngwo: “Kuchi kevwe anali hamwe ni akwa kulambwisa lijimu ni akwa lufuma mubi?”

¹⁷ Muze Yesu hachivwa yaamba ngwenyi: “Ali ni tachi keeshi kufupa mbuki, alioze shina waze akuyiza e akumufupa. Chejile mu kutambika akwa ululi, alioze akwa lufuma mubi.”

Chihula hakutwala ku kulitwamina kulia

¹⁸ Limwe tangwa tumbaji twa Yoano ni twa Afariseu yaalitwamina kulia mu kuwayila Zambi. Hohene atu yeeza ni kuhula Yesu ngwo: “Tumbaji twa Yoano ni twa Afariseu kaakulitwamina kulia mu kuwayila Zambi, alioze kuchi kevwe tumbaji twe keeshi kuchilinga?”

¹⁹ Yesu ngwenyi: “Masepa ja sandungi maahasa kulitwamina kulia shimbu sandungi uchili hamwe no, nyi? Ka! Shimbu lize lieswe sandungi uchili mukachi ko kaahashile kulitwamina kulia.

²⁰ Alioze tangwa mulikeza muze maakachiza sandungi, mba maakalitwamina kulia.

²¹ “Mutu niumwe manuka hina likulu ni chando chaha, mumu nyi machilinga chando chaha muchitanuna hina likulu, ni chituwa muchibwa chinene, kuhiana chitangu.

²² Niumwe malonga vinyu yaha mu tuku jikulu ja malambu kuchina vinyu yaha muyimengununa, tuku jikulu nejo mujifwa, ni vinyu muyimwangana.”

Chihula hakutwala ku tangwa lia kuhwima

²³ Ha limwe tangwa lia kuhwima, Yesu yabalika mu minda ya tiriku. Tumbaji yaabutuka kumakuna tiriku ku sesa lia jila.

²⁴ Kashika Afariseu yaamuhula ngwo: “Tala, kuchi kevwe analingi ha tangwa lia kuhwima chize kuchalitele ni Shimbi jetu.”

²⁵ Yesu ngwenyi: “Kunwatangile nilimwe tangwa chize alingile mwanangana David, iye mwene ni atu jenyi, muze evwile zala ni haahona yakulia, nyi?

²⁶ Muze Abiatare wabwile mwata wa mahako, David yanjila mu zuwo lia Zambi, yalia mbolo ja kutumbieka ku meso ja Zambi. Te kuchalitele ni Shimbi jetu kulia mbolo jize shina mahako a lutwe wika. Alioze David yajanda, yajaha nawa atu jenyi.”

²⁷ Yesu yaamba nawa ngwenyi: “Tangwa lia kuhwima liatangiwile mumu ha yiwape ya mutu; hi mutu ko watangiwile mumu ha tangwa lia kuhwima.

²⁸ Kashika, yami Mwana Mutu, nguli nawa Mwene wa tangwa lia kuhwima.”