Marku 16 - Mukanda Wa Zambi 1970

Uhindukilo wa Yesu

¹ Muze te tangwa lia kuhwima hiliabalika, Maria Kamandala, ni Salome, ni Maria naye ya Tiangu (Jake) yaalanda maji a vumba libema, hanga akaye akawayise mujimba wa Yesu.

² Chichamene cheswe mu lumingu, ha kuvumbuka cha tangwa, yaaya ku fuka,

³ yaalihula hakachi ko ngwo: “Iya matulangumwina kama liwe ku chikolo cha fuka?”

⁴ (Te liwe linene liahiana.) Alioze muze haahetuka, yaamona liwe halilangumuna ko kulu.

⁵ Muze haanjila mu fuka, yaamona mukweze kanatwama ku chindume, te kanazala hina litoma. No yeevwa woma unji.

⁶ Alioze mukweze yaamba ngwenyi: “Kanda nwivwa woma. Nunafupu Yesu Kanazare, yoze anakahachila ha kulusu. Hahinduka, amuno keshimo. Talenu homa haze anakamusa.

⁷ Alioze yeenu nulweze Petulu ni tumbaji twenyi eswe ngwenu. Yesu makanutetekela ku chifuchi cha Galilea. Kwenako munukamumona ngwe chize hananwambulwila kulu.”

⁸ No yatuhuka, yaachina ku fuka, mumu achikimine. Kaalwezele mutu niumwe, mumu yeevwa woma. [

Yesu yasolokela Maria Kamandala

⁹ Muze te Yesu hahinduka ku kufwa mu lumingu chichamene, yasolokela hatangu Maria Kamandala, yoze atuhwishile mwiku wa luchisa shimbiali.

¹⁰ Maria yaya ni kwambulwila waze abwile hamwe ni Yesu, shimbu te ananenganyana nikulila.

¹¹ Alioze, muze heevwa yize ambile Maria ngwenyi: “Yesu hahinduka, namumonanga,” kaamufulielele ko.

Yesu yasolokela tumbaji aali

¹² Kulutwe lia yino yuma, Yesu yasolokela tumbaji aali ni chifwa cheka, te ku minda anayi.

¹³ No yaahiluka, yaambulwila tumbaji akwo, alioze kaafulielele ko.

Yesu yaasolokela tumbaji kumi ni kashi, yaashika

¹⁴ Hakusula, Yesu yasolokela e kumi ni kashi shimbu te anatwama ku mesa. Yaakanyamisa mumu kaafulielele ko, ni mumu ha kukala cha mbunge jo. Kaafulielele ko waze aliangile kumumona muze ahindukile ku kufwa.

¹⁵ Yesu yaamba ngwenyi: “Yeenu hashi heswe, nukambujolele atu eswe Sango Jibema.

¹⁶ Yoze mafuliela ni maamupapachisa kumakamulamwina. Alioze yoze keshi kufuliela, kumakamuhisa.

¹⁷ Yilayi yino kumuyikaula akwa kufuliela: mu jina liami kumaakatuhwisa mwiku wa luchisa; kumaakahanjika maliji aha;

¹⁸ chibwe akakwate manoka hanji kunwa Chuma chimwe cha kufwa, kuchichi kaalinga nichimwe; kumakasa moko hali mieji, mba kumakahinduka.”

Yesu yazezuka mwilu

¹⁹ Muze Mwene Yesu hahanjika maliji wano, Zambi yamutambula mwilu, yatwama ku chindume cha Zambi.

²⁰ Tumbaji yaatuhuka nikwambujola kweswe. Mwene Yesu yalinga hamwe no nikukolesa longeso lio ni yilayi.]