Marku 15 - Mukanda Wa Zambi 1970

Yesu ku meso ja Pilatu

¹ Chichamene cheswe mahako a lutwe a Zambi, ni makulwana ja Ayuda, ni alongeshi a Shimbi, hamwe ni ngaji eswe a mu Mbunga ya Ngaji ja Ayuda yaatwama punga. Yaakasa Yesu, yaamutwala nikumukunjika kuli Pilatu.

² Mwe Pilatu yamuhula ngwenyi: “Mwe mwanangana wa Yuda yena, nyi ka?” Yesu ngwenyi: “Kuwamba.”

³ Mahako a lutwe yaasuma Yesu ni yuma yinji.

⁴ Pilatu yahula nawa Yesu ngwenyi: “Kuushi kukumbulula nichimwe, nyi? Achivwa yuma yibwa haha anakusumu nayo!”

⁵ Alioze hi kakumbulwile ko nawa nichimwe; Pilatu yalishimwoka kuhiana.

Pilatu yakunjika Yesu ku kufwa

⁶ Ha chiwanyino cheswe cha Kubalika Pilatu ndako abwile nayo ya kutusula funge umuwika yoze te mbunga meeta.

⁷ Umwe lunga te wabwile ko, jina lienyi Baraba, wakukasa hamwe ni yitanganyanyi akwo. Enoo ashihile atu.

⁸ Mbunga yaaya maha Pilatu, yaabutuka kumwita aalingile nikulita ni ndako yenyi.

⁹ Pilatu yahula ngwenyi: “Nunazange ngunutuswile mwanangana wa Ayuda, nyi?”

¹⁰ Mumu te kananyingika pundu ngwenyi, mahako a lutwe haakunjika Yesu mumu ha ukwa.

¹¹ Alioze mahako a lutwe yaavundula mbunga hanga atuhwise Baraba.

¹² Pilatu yaahula ngwenyi: “Mba kuchi nunazange ngulinge ni yoze nunavuluka ngwenu: ‘Mwanangana wa Ayuda’?”

¹³ Yaamukumbulula nikukololoka ngwo: “Muhachile ha kulusu!”

¹⁴ Alioze Pilatu ngwenyi: “Chibi chika kevwe anakalinga?” Hohene atu yaakololoka chikolo ngwo: “Muhachile ha kulusu!”

¹⁵ Pilatu yazanga kuhutula mbunga, kashika yaatuswila Baraba. Muze te halambisa Yesu ni fimbo (shikote), Pilatu yamukunjika hanga amuhate ha kulusu.

Tujita yaakekuna Yesu

¹⁶ Tujita yaamutwala ku yiize mukachi ka zuwo lia mwanangana. No yaatambika tujita eswe a ku mbunga yize.

¹⁷ Yaamujika hina lichila, yaayinda chipangula cha mbimbo ni kumujika cho ku mutwe.

¹⁸ No yaabutuka kumumeneka ngwo: “Vulie, mwanangana wa Ayuda!”

¹⁹ Yaamulambalamba mutondo ha mutwe, yaamufwilafwila mate, yaaliumba ha makungunwa jo ngwe kaanamuwayila.

²⁰ Muze hamanununa kumukekuna, yaamuzula hina lichila, yaamujika mahina jenyi, mba yaamutwala haze lia limbo hanga amuhate ha kulusu.

Tujita yaahata Yesu ha kulusu

²¹ Mu jila yaatakana ni umwe mutu wa ku Sirene, jina lienyi Simone (tato ya Alexandre ni Rufu), te ku munda anakatuka. Yaamwaha kulusu ya Yesu ni tachi, hanga ayimbate.

²² Yaatwala Yesu kumwe kuma akuvuluka ngwo, Golgota, kulumbunuka ngwo: “Homa lia Balanga.”

²³ Yaazanga kumwaha vinyu yakuchinga ni yitumbo ya utunu, mira. Alioze yalituna yo.

²⁴ No yaamuhata ha kulusu. Mba yaalitetela mahina jenyi, nikuta chela ha kumona chize mutu ni mutu matambula.

²⁵ Te ha ola ya muchilivwa lia chichamene amuhachilile ha kulusu.

²⁶ Ha mukanda yaasoneka ho chitela chize amusumine nacho ngwo: “Mwe Mwanangana wa Ayuda.”

²⁷ Yaahata nawa mihuza aali ha makulusu, umuwika ku chindume cha Yesu, mukwo ku chimeso. [

²⁸ Chenacho yuma yize yasonewene mu Mukanda wa Zambi yikamanunuke ngwo: “Haanamwalula hamwe ni yingulungulu.”]

²⁹ Atu waze abaliekele kuze yaalihunga mitwe nikumuchoka ngwo: “Ehee! Yena wazangile kwonona zuwo lia Zambi ni kulitunga nawa ha matangwa atatu!

³⁰ Lilamwine yena mwene! Sunuka ha kulusu!”

³¹ Chimuwika nawa mahako a lutwe a Zambi, ni alongeshi a Shimbi yaakekuna Yesu nikulihanjekesa ngwo: “Walamwinyine atu akwo, alioze mwene kahashile kulilamwina!

³² Chilamwina yoze Zambi alakenyene mwanangana wa Israele asunuke haliabwila ha kulusu! Nyi twachimona, mba tumufuliele.” Chibwe waze ahachiwile hamwe nenyi ha makulusu yaamuchoka.

Kufwa cha Yesu

³³ Tangwa ha muchima, chifuchi cheswe yichibwa ni milima bwii, yiisala ndoo ola jitatu.

³⁴ Ha ola ya muchitatu Yesu yakololoka chikolo ngwenyi: “Eloi, Eloi, lema sabaktani?” Kulumbunuka ngwo: “Zambi yami, Zambi yami, kuchi mba hiwangwehuka?”

³⁵ Amwe waze amanyine ko, muze haachivwa, yaamba ngwo: “Achivwenu, kanatambika Eliya!”

³⁶ Umuwika hakachi ko yazomboka, yazalisa shiponja ni vinaigre, yayisa ku songo lia lumbungu, yamweseka yo hanga anwe, ngwenyi: “Matumone, nyi Eliya meza ni kumusunwisa.”

³⁷ Alioze Yesu yakololoka chikolo, mba yafwa.

³⁸ Chikalakala cha hina lia mu zuwo lia Zambi yichibulika mukachi, chize kwilu ndoo hashi.

³⁹ Mwata wa tujita yoze wamanyine ko, muze hevwa chize akololokele ni hamona chize asutwile mwono wenyi, yamba ngwenyi: “Chamwenemwene mutu yono mwe Mwana Zambi!”

⁴⁰ Amwe mapwo, te kaanamana kusuku ni kutala. Hakachi ko te haali Maria Kamandala, ni Salome, ni Maria naye ya Josefe ni Tiangu (Jake) mukweze.

⁴¹ Ayo eswe te kaakukaula Yesu muze abwile mu chifuchi cha Galilea ni kumukwasa. Yikubwa nawa mapwo anji akwo waze ejile hamwe nenyi ku Yerusaleme.

Kufunda cha Yesu

^42-43 Muze te tangwa hiliendala, Josefe wa ku Arimatea yeza; mutu mulemu wa ku Mbunga ya Ngaji ja Ayuda, yoze te wakutwaminyina Wanangana wa Zambi. Te mumatano, tangwa lia atu kulilulika mumu tangwa lize lia kulutwe yilibwa lia uhwimino. Josefe yanjila maha Pilatu ni hamu lieswe, nikumwita mujimba wa Yesu.

⁴⁴ Alioze Pilatu yalishimwoka ha kwivwa ngwo: “Hafwa.” Yatambika mwata wa tujita hanga amuhule nyi hafwa kulu.

⁴⁵ Muze hevwa shindakenyo ya mwe mwata, Pilatu yatayiza kuhana mujimba wa Yesu kuli Josefe.

⁴⁶ Neye yalanda hina litoma, yasunwisa we mujimba wa Yesu, yauvunga ni hina lize, yausa mu fuka liakutota mu liwe. Mba yalangumwina liwe linene ku chikolo cha fuka.

⁴⁷ Maria Kamandala, ni Maria naye ya Josefe yaatala, yaamona kuze amusele.