Marku 14 - Mukanda Wa Zambi 1970

Akwa lutwe ja Ayuda yaatwama Yesu punga

¹ Yikubwa matangwa aali ndoo ku chiwanyino cha Kubalika ni cha Mbolo Yize Kuyishi Yitumbo. Mahako a lutwe a Zambi ni alongeshi a Shimbi yaafupa mana ja kukwata Yesu ku tenga hanga akamushihe.

² Yaamba ngwo: “Hi ha tangwa lia chiwanyino ko, nyi ka, Vunda jinji mujibwa hakachi ka atu.”

Umwe pwo yawayisa Yesu maji a vumba libema

³ Yesu te mu chihunda cha Betania ali mu zuwo lia Simone, mukwa mbumba. Shimbu atwamine ku mesa, pwo yanjila ni kasaji kakulinga ni mawe alemu atoma, te kanazala ni maji a vumba libema liahiana, a ndando yinji, jina lio nardu. Yabalula muhondo wa kasaji, mba yawayisa mutwe wa Yesu ni maji waze.

⁴ Amwe atu yeevwa kubihia mu mbunge jo, yaaliamba mukachi ko ngwo: “Kuchi kevwe kwonona maji a ndando yinji yibwa haha?

⁵ Te chinalite kulanjisa maji ha ndando yahiana kulakaji jitatu ja mbongo, ni kujaha yiswale.” No yaakanjisa pwo yoze.

⁶ Alioze Yesu yamba ngwenyi: “Mwechenu. Kuchi nunamubikalisa? Chize hangulinga chinabeme.

⁷ Mumu yiswale munukabwa no matangwa eswe. Lieswe tangwa munuzanga munuhasa kwalingila yibema. Alioze kunuchi kabwa ni yami matangwa eswe.

⁸ Halinga chize hahasa kulinga. Hawayisa mujimba wami ni maji, haululika ha kuufunda.

⁹ Chamwenemwene ngunanwambulwila ngwami, kweswako atu maakambujolela Sango Jibema hashi heswe, Chuma chize pwo yono halinga maakachambulula ni kumwiwuluka.”

Yudase yatayiza kukunjika Yesu kuli akwa kole jenyi

¹⁰ Hohene Yudase Kakeriote, umwe wa kuli tumbaji kumi ni aali, yaya kuli mahako a lutwe a Zambi hanga akunjike Yesu.

¹¹ No muze haachivwa, yaawahilila, yaalakenya kumwaha mbongo. Mba Yudase yabutuka kufupa mana a kumukunjika.

Yesu yalia chiwanyino cha Kubalika (Pake)

¹² Ha tangwa litangu lia chiwanyino cha Mbolo Yize Kuyishi Yitumbo, muze te akushiha mwana panga, tumbaji twenyi yaamuhula ngwo: “Kulihi unazange tukululikile yakulia ya kwiwuluka Kubalika?”

¹³ Mba Yesu yatuma tumbaji twenyi aali nikwamba ngwenyi: “Yeenu mu limbo. Mwenamo munutakana ni mutu unambata mulondo wa meya, mukaulenu.

¹⁴ Kuze manjila nwambila mwenya zuwo ngwenu: ‘Longeshi kanahula ngwenyi, chilihi chibatulo chami, muze mungulila hamwe ni tumbaji twami yakulia ya kwiwuluka Kubalika?’

¹⁵ Neye manulweza zuwo lia kwilu, chibatulo chinene hichinalulikiwa, ni yuma yeswe yinasu mo. Mwenamo munutululikila yakulia.”

¹⁶ Tumbaji yaakatuka, yaaheta mu limbo, yaawana yuma yeswe ngwe chize ambile Yesu. No yaalulika yakulia ya kwiwuluka Kubalika.

¹⁷ Muze te tangwa hilianjila kulu, Yesu yaheta hamwe ni tumbaji kumi ni aali.

¹⁸ Shimbu lize te anatwama ku mesa nikulia, Yesu yamba ngwenyi: “Chamwenemwene ngunanwambulwila ngwami, umwe wa kuli yenu unali hamwe ni yami mangukunjika kuli akwa kole jami.”

¹⁹ No yaabutuka kwivwa chinyengo, nikumuhula umuwika umuwika ngwo: “Hi yami ko, nyi?”

²⁰ Yesu ngwenyi: “Umwe hakachi kenu kumi ni aali. Yoze unatate hamwe ni yami mu chenga, mwenawo.

²¹ Mwana Mutu kumafwa ngwe chize hichinasonewa mu Mukanda wa Zambi, alioze lamba lienyi yoze makunjika mwe Mwana Mutu! Chinabeme te kachi mutu yoze kasemukine ko kwenyi!”

Mesa ya Mwene Yesu

²² Shimbu maachilia, Yesu yanda mbolo, yasakwila Zambi, yayibalula, mba yayaha tumbaji twenyi nikwamba ngwenyi: “Wenu, nulie. Mbolo yino yili mujimba wami.”

²³ Yanda nawa musenge wa vinyu, yasakwila Zambi, yaaha wo. No eswe yaanwa.

²⁴ Yesu yaamba ngwenyi: “Musenge uno wa vinyu uli manyinga jami waze anakolesa Usendo wa Zambi, waze anamwangana hali atu anji.

²⁵ Chamwenemwene ngunanwambulwila ngwami, chichi kanwa nawa vinyu yino ndoo ku tangwa lize mungukanwa vinyu yaha mu Wanangana wa Zambi.”

²⁶ Hohene yeemba mwaso, mba yaaya ku mulundu wa Olive.

Yesu ngwenyi: “Yena Petulu muulikala yami.”

²⁷ Hohene Yesu yambila tumbaji ngwenyi: “Yenu eswe munungwehuka, mumu hichinasonewa mu Mukanda wa Zambi ngwo: ‘Mungukashiha kafunga, mba mapanga maakamwangana mwamwaa.’

²⁸ Alioze muze hanguhindwisa, mungukanutetekela ku Galilea.”

²⁹ Petulu yamwamba ngwenyi: “Chibwe akwetu eswe maakwehuka, hindu yami ka.”

³⁰ Yesu ngwenyi: “Chamwenemwene ngunakwambulwila ngwami, yena ufuku unowene, shimbu ndemba kanda achitambika kaali, kumuulikala yami katatu ngwe: ‘Chamunyingikine kwami.’ ”

³¹ Alioze Petulu yalihalula chikolo kuhiana ngwenyi: “Chibwe maangushiha hamwe ni yena, hindu chichi kulikala yena nichimwe.” Tumbaji eswe yaamba chizechene.

Yesu yalemba mu munda wa Getsemane

³² No yaaheta kumwe kuma, jina liako Getsemane. Yesu yambila tumbaji twenyi ngwenyi: “Twamenu hano shimbu yami ngunayi mu kulemba.”

³³ Mba yaya ni Petulu, ni Tiangu (Jake), ni Yoano, yabutuka kwivwa chinyengo chinji ni kulema mu mbunge,

³⁴ yaamba ngwenyi: “Chinyengo chinji ngunevu mu mbunge, chinyengo cha kufwa. Salenu hano, nunongame.”

³⁵ Hohene Yesu yasenya kulutwe, yafulamana hashi, yalemba hanga ola yize ya lamba yimukatuke, nyi te muchihasa kubwa.

³⁶ Ngwenyi: “A Tata! Tata yami! Yena Unahase yuma yeswe. Unguchize kama musenge uno wa lamba. Hindu kanda chibwa ngwe chize ngunazange yami, alioze ngwe yena unazange.”

³⁷ Yahiluka kuli tumbaji waze atatu, yaawana mu tulo, yambila Petulu ngwenyi: “Simone, uli mu tulo? Kuma kuwahashile kunongama kama chibwe ola yimuwika, nyi?

³⁸ Nongamenu, lembenu, yenu eswe, hanga kunuchi kunjila mu cheseko. Mbunge ya mutu yinalulika, alioze mujimba wenyi ulelu.”

³⁹ Yesu yaya nawa nikulemba maliji waze ene.

⁴⁰ Muze hahiluka, yaawana nawa mu tulo mumu te meso jo kaanaleme. Hikahashile kwamba nichimwe.

⁴¹ Muze heza chisuho cha muchitatu, yaamba ngwenyi: “Hifungunukine, nuhwime, hikwahwa, ola hiyaheta. Talenu, himakunjika Mwana Mutu ku moko ja yivulumunyi.

⁴² Katukenu. Tuyenu. Talenu yoze unangukunjika heza kulu!”

Yudase yakunjika Yesu

⁴³ Shimbu te Yesu machihanjika, Yudase, umwe wa kuli tumbaji kumi ni aali, yaheta hamwe ni mbunga yinene, te anambata mikwale ni kanda. Mahako a lutwe a Zambi, ni alongeshi a Shimbi, ni makulwana ja Ayuda aatumine.

⁴⁴ Yudase, yoze wakunjikile Yesu ha kumushiha, te hanaahe kulu chinyingi ngwenyi: “Mutu yoze mungumbeja mwenawo, mukwatenu, numutwale kanawa!”

⁴⁵ Muze Yudase heza, yakundama kuli Yesu nikawashi nikwamba ngwenyi: “Longeshi!” Mba yamumbeja.

⁴⁶ No yaakwata Yesu.

⁴⁷ Alioze umwe wa kuli waze amanyine ko yatomona mukwale wenyi, yalamba kavumbi ka mwata wa mahako, yamubatula litwi.

⁴⁸ Yesu yaamba ngwenyi: “Nuneza ni mikwale ni kanda ni kungukwata ngwe nguli muhuza, nyi?

⁴⁹ Tangwa ha tangwa nabwile hamwe ni yenu ni kunulongesa mu zuwo lia Zambi, hindu kunwangukwachile ko. Alioze yuma yize yasonewene mu Mukanda wa Zambi chatamba yimanunuke.”

⁵⁰ Shimbu lizeliene tumbaji eswe yaamwehuka, yaachina kwo.

⁵¹ Umwe mukweze wakawile Yesu te kanazala lume hina lia ha muhela. No yaamukwata,

⁵² alioze yambila lie hina, yachina uselesele.

Yesu ku meso ja Mbunga ya Ngaji ja Ayuda

⁵³ No yaatwala Yesu maha mwata wa mahako. Kwenako kwakungulukile mahako eswe a lutwe, ni makulwana ja Ayuda, ni alongeshi a Shimbi.

⁵⁴ Petulu yakaula Yesu kanonajila kapinji kasuku, yanjila mu yiize ya zuwo lia mwata wa mahako, yatwama ko hamwe ni tufunga twa zuwo nikwota kahia.

⁵⁵ Mahako a lutwe ni ngaji eswe akwo a ku Mbunga ya Ngaji ja Ayuda yaafupa shindakenyo yize maahasa kusuma nayo Yesu mu kumushihisa, alioze kaayimwene ko.

⁵⁶ Atu anji amushindakenyene mahuza, hindu kusuma cho kuchabwile ko chimuwika.

⁵⁷ Mba amwe hakachi ko yaakatuka, yaamusuma ni mahuza wano ngwo:

⁵⁸ “Twamuvwile nikwamba ngwenyi: ‘Mungukonona zuwo lino lia Zambi liakutunga ni moko ja atu. Mba ha matangwa atatu mungukatunga liaha, lize kulishi kutungiwa ni moko ja atu.’ ”

⁵⁹ Alioze chibwe chocho kusuma cho kuchabwile ko chimuwika.

⁶⁰ Mba mwata wa mahako yakatuka mukachi ko, yahula Yesu ngwenyi: “Kuushi kukumbulula nichimwe, nyi? Yika atu wano anakusumu?”

⁶¹ Alioze Yesu yahola kwenyi kuluu. Kakumbulwile liji nilimwe. Mwata yamuhula nawa ngwenyi: “Mwe Chilamwina yoze alakenyene, mwe Mwana Zambi wa lufuma yena, nyi ka?”

⁶² Yesu ngwenyi: “Ewa, yami. Kumunukamona Mwana Mutu kanatwama ku chindume cha Mukwa Ndundo Jeswe. Munukamumona kaneza ni malelwa a kwilu.”

⁶³ Hohene mwata wa mahako yatanuna mahina jenyi nikwamba ngwenyi: “Mba kuchi tunafupu nawa yela akwo?

⁶⁴ Hinwevwa chize anashililika Zambi! Kuchi nunanyongo?” Ayo eswe yaamubatwila ngwo: “Kanatela kufwa.”

⁶⁵ Akwo yaabutuka kumufwila mate, yaamukasa hina ku meso, yaamulamba kome nikwamba ngwo: “Tumbula, iya wakulamba!” Tufunga yaakwata Yesu, yaamulamba mbangala.

Petulu yalikala Yesu

⁶⁶ Shimbu te Petulu anatwama mushi mu yiize, umwe mwana pwo, ngamba ya mwata wa mahako, yaheta ko,

⁶⁷ yamona Petulu kanoto kahia, yamutala nee, yamwamba ngwenyi: “Ni yena wabwanga hamwe ni Yesu Kanazare.”

⁶⁸ Alioze Petulu yalikala ngwenyi: “Chanyingikine yuma yize unambe. Ni mwene kuchangulumbunukinyine.” Mba Petulu yaya ku chikolo cha chipanga. Hohene ndemba yatambika.

⁶⁹ Mwana pwo yoze yamumona, yabutuka kwambulwila atu waze amanyine ko ngwenyi: “Lunga yono neye kali wa kuli ayo.”

⁷⁰ Alioze Petulu yalikala cho nawa. Shimbu likepe waze amanyine ko yaambila Petulu ngwo: “Chamwenemwene ni yena uli wa kuli ayo, mumu uli Kagalilea.”

⁷¹ Petulu yabutuka kulikolola ni kulishinga ngwenyi: “Mutu yoze nunambe, chamunyingikine.”

⁷² Susumuku ndemba yatambika chisuho cha muchaali. Petulu yewuluka maliji waze Yesu amwambile ngwenyi: “Shimbu ndemba kanda achitambika kaali, kumuulikala yami katatu ngwe: ‘Chamunyingikine kwami.’ ” Hohene yabutuka kulila.