Marku 13 - Mukanda Wa Zambi 1970

Yesu yambulula hakutwala ku kubuzuka cha zuwo lia Zambi lia Ayuda

¹ Muze te Yesu hatuhuka mu zuwo lia Zambi lia Ayuda, umwe wa kuli tumbaji twenyi yamwamba ngwenyi: “Longeshi, tala! Mawe abwa haha! Mazuwo abwa haha!”

² Yesu yamba ngwenyi: “Unamono mazuwo wano anene anene? Liwe nilimwe kulichi kasala liakunangika helu lia likwo, eswe kumaakabuzula.”

Kabutu ka lamba

³ Yesu yatwama ha mulundu wa Olive, talanganyi ni zuwo lia Zambi lia Ayuda, muze Petulu, ni Tiangu (Jake), ni Yoano, ni Andre haamukundama ha ukawo. Yaamwamba ngwo:

⁴ “Twambulwile kama, mwiji muka yino yuma muyikabwa. Chilayi chika muchikaweza muze yino yuma muyikabwa ko?”

⁵ Mba Yesu yabutuka kwalongesa ngwenyi: “Kanyamenu! Nyi ka, maakanupiangula.

⁶ Anji maakeza mu jina liami nikwamba ngwo: ‘Yami mwe Chilamwina yoze Zambi alakenyene.’ Kumaakapiangula anji.

⁷ Muze munukevwa lundunjila wa jita hakamwihi, ni sango ja jita kusuku, kanda nukevwa woma. Chatamba yino yuma kubwa, alioze songo kanda lichibwa.

⁸ Mumu vungu ni vungu kumaakasa jita. Wanangana kumukalimika ni wanangana ukwo. Minyiko ya hashi muyikabwa kweka ni kweka. Zala yinji muyikabwa. Yuma yino yeswe muyikalifwa ngwe kabutu ka yikola ya kusema.

⁹ “Alioze kanyamenu yenwene, mumu atu maakanukunjika ku Mbunga ya Ngaji ja Ayuda, maakanulamba mu mazuwo a kuwayila ja Ayuda. Munukamana ku meso ja akwa kuyula ni ku meso ja mianangana, mumu hali yami, ha kushindakenya Sango Jibema.

¹⁰ Alioze je Sango Jibema chatamba kujambujola ku mavungu eswe a hashi.

¹¹ Muze maakanukwata ni kunukunjika kuli ngaji, kanda nukalibikala ha chize munukakumbulula. Munukahanjika yeswe yize makanwaha ha ola yize, mumu hi yenu ko munukahanjika, alioze Mwiku wa Linanga.

¹² Asongo ni atu maakalikunjika ku kufwa. Atata maakakunjika ana jo. Ana maakakatukila yisemi, maakaashihisa.

¹³ Atu eswe maakanuvutwokela mumu hali yami. Alioze yoze makanyongonona ndoo ku songo, kumakamulamwina.”

Lamba linji

¹⁴ “Muze munukamona ‘Chipupu cha Kuvwisa Woma’, chinamana kuze kuchatambile kumana, (Yoze wakutanga ase yuma yino chinyingi!), hohene waze maakabwa mu Yudea chaatamba kuchinyina ku milundu.

¹⁵ Yoze makabwa ha fulumba lia zuwo lienyi akasunuke, alioze kanda akanjila mu zuwo akande Chuma chimwe.

¹⁶ Yoze makabwa ku munda kanda akahiluka ku mahio akande chikuto chenyi.

¹⁷ Ha matangwa waze, tufumbakaji lamba linji maakamona, ni waze maakamwisa ana.

¹⁸ Lembenu ngwenu, yuma yize kanda yikabwa kama ha mwaka wa chishika.

¹⁹ Mumu ha matangwa waze, lamba linji mulikabwa ko. Chize ku kutanga cha hashi ndoo musono uno, lamba ngwe lize kanda lichibwa kama, ni kulichi kabwa nawa nichimwe kulutwe.

²⁰ Nyi Mwene kachijile ko amwe matangwa waze a lamba, kachi mutu niumwe makalilamwina. Alioze matangwa akwo Zambi hanaachiza mumu hali atu jenyi waze hanatongola iye mwene.

²¹ “Hohene nyi umwe makanwamba ngwenyi: ‘Talenu, Chilamwina yoze Zambi alakenyene kuno kwali!’ hanji ngwenyi: ‘Talenu, kwali akuze!’ kanda nukachifuliela.

²² Mumu yilamwina a mahuza ni akwa munanyi a mahuza kumakasoloka, kumaakalweza yilayi ni yipupu ya kupiangula, nyi muchihasa kubwa, chibwe waze Zambi hanatongola.

²³ Alioze yenu kanyamenu, hinanwambulwila cho shimbu kanda.”

Kwiza cha Mwana Mutu

²⁴ “Alioze ha matangwa waze, kulutwe lia lamba lize, tangwa mulikalaa, kakweji kechi katwa nawa mieji.

²⁵ Matongonoshi maakaholoka mwilu, ndundo ja mwilu mujikanyikumuka.

²⁶ Hohene atu maakamona Mwana Mutu kaneza mu malelwa ni ndundo jinji ni uhenya Wahiana.

²⁷ Hohene Zambi makatuma tunganda a mwilu, hanga akakungulule waze hanatongola iye mwene, ku mbango jeswe jiwana, chize ku songo limwe lia hashi ndoo ku songo likwo.”

Chisima cha mukuyu (figu)

²⁸ “Lilongesenu chishima cha mutondo mukuyu. Muze mitango yawo hiyovula ni mafwo jawo haabutuka kusokoloka nunanyingika ngwenu, kuma lwiza habwa hakamwihi.

²⁹ Chimuwika nawa, muze munukamona yino yuma, munukanyingika ngwenu, kali hakamwihi, ku chikolo.

³⁰ Chamwenemwene ngwami, atu waze aali ni mwono haliabwila keechi kafwa eswe ndoo yuma yize yeswe muyikabwa.

³¹ Lilu ni hashi muyikahwa, alioze maliji jami keechi kwiza kuhwa nichimwe.”

Tata Zambi wika Unanyingika tangwa ni ola

³² “Alioze hakutwala ku tangwa lize ni ola yize, niumwe unayingyingika, chibwe tunganda a mwilu, chibwe Mwana ka, shina Tata wika Unanyingika.

³³ Kanyamenu, talenu kanawa, mumu kunwanyingikine muze tangwa lize mulibwa.

³⁴ Kafwa ngwe mutu yoze unahichika zuwo lienyi ni kuya mu wenyi. Kanahane chiyulo kuli tuvumbi twenyi, mutu mweswe milimo yenyi. Kanambila mukwa kufunga zuwo ngwenyi: ‘Ukanyama.’

³⁵ Kashika kanyamenu, mumu kunwanyingikine muze mwenya zuwo meza, hanji chingoloshi, hanji ha muchima ufuku, hanji ha ndemba mutangu, hanji chichamene.

³⁶ Kuchina susumuku meza, manuwana mu tulo.

³⁷ Chize ngunanwambe yenu, ngunachambila eswe ngwami: Kanyamenu!”