Marku 11 - Mukanda Wa Zambi 1970

Yesu mwe Mwanangana, yanjila mu Yerusaleme

¹ Muze haakundama ku Yerusaleme, ku yihunda ya Betfaje ni Betania, ha mwanda wa mulundu wa Olive, Yesu yatuma tumbaji twenyi aali kulutwe, ngwenyi:

² “Yeenu ku chihunda chize chasulangana ni yenu. Muze mununjila mo munuwana mwana wa chimbulu wakukasa, hali yoze mutu niumwe kanda achitwama ho kama nilimwe tangwa. Mujitulenu, nungunehene yo.

³ Nyi mutu manuhula ngwenyi: ‘Kuchi kevwe nunalingi chino?’ mulumbunwinenu ngwenu: ‘Mwene kali nenyi ni chikala. Mamuhilwisa nikawashi.’ ”

⁴ E tumbaji yaaya, yaawana mwana wa chimbulu haze, wakukasa ku chikolo cha limwe zuwo, yaamujitula.

⁵ Amwe waze abwile ko yaahula ngwo: “Yika nunalingi? Kuchi kevwe nunajitula mwana wa chimbulu yono?”

⁶ No yaakumbulula ni liji lize ambile Yesu. Mba yeecha kuya nenyi.

⁷ No yaatwalila Yesu mwana wa chimbulu, yaasa mahina jo hali kashitu. Mba Yesu yatwama ho.

⁸ Anji yaalala mahina jo mu jila. Akwo yaalala mitango ya mitondo mu jila, ku minda ayibatwile.

⁹ Atu waze atetekelele kulutwe lia Yesu ni waze amukawile yaakololoka ngwo: “Vulie! Zambi awahise yoze uneza mu jina lia Mwene!

¹⁰ Zambi awahise Wanangana uze muwiza ho, Wanangana wa kashakulu ketu David! Vulie Zambi Mwilu Mwahiana!”

¹¹ Muze Yesu hanjila mu Yerusaleme, yaya mu zuwo lia Zambi lia Ayuda. Yahengula ha yuma yeswe, mba yaya ku Betania hamwe ni tumbaji kumi ni aali, mumu te tangwa hiliendala kuhiana.

Yesu yashinga mutondo mukuyu (figu)

¹² Muze kwilu hikwacha, yaakatuka ku Betania, Yesu yevwa zala,

¹³ yamona kusuku mutondo mukuyu ni mafwo, yaheta ko nyi mawana ko kama mihuko. Muze haheta, kamwene ko Chuma nichimwe shina mafwo wika, mumu te hi mwaka wa mihuko ko.

¹⁴ Mba yambila mukuyu ngwenyi: “Mutu niumwe kanda akalia nawa mihuko ye ndoo ku miaka yeswe.” Tumbaji twenyi yaachivwa.

Yesu yabemesa zuwo lia Zambi

¹⁵ Muze haheta nawa ku Yerusaleme, Yesu yanjila mu zuwo lia Zambi lia Ayuda, yabutuka kutuhwisa mo akwa kulanjisa ni akwa kulanda eswe, yalimbula mesa ja akwa kusumbakenya mbongo ni yitwamo ya akwa kulanjisa membe.

¹⁶ Katayijile mutu niumwe kumbata Chuma ndusu mu yiize ya zuwo lia Zambi.

¹⁷ Yesu yaalongesa ni maliji wano ngwenyi: “Kuliasonewene mu Mukanda wa Zambi ngwo: ‘Zuwo liami makalivuluka ngwo, zuwo lia kuwayila lia mavungu eswe,’ nyi? Alioze yenu hinunalipwisa chivwenge cha eji.”

¹⁸ Muze mahako a lutwe a Zambi ni alongeshi a Shimbi haachivwa, yaafupafupa mana a kumushiha. Alioze yaamuvwila woma, mumu mbunga yeswe yaalishimwoka kuhiana ha longeso lienyi.

¹⁹ Muze te tangwa hiliendala kuhiana, Yesu ni tumbaji twenyi yaakatuka mu limbo.

Yesu yalongesa chikuma cha mukuyu (figu) uze ashingile

²⁰ Chichamene cheswe muze te anabalika mu jila, yaamona mukuyu, hiwoma chau ndoo ku miji.

²¹ Petulu, yewuluka chize ambile Yesu, yamwamba ngwenyi: “Longeshi, tala, mukuyu uze unakashinga, hiwoma lume weswe chau.”

²² Yesu yambila tumbaji ngwenyi: “Fulielenu Zambi.

²³ Chamwenemwene ngunanwambulwila ngwami, yoze mamba ku mulundu uno ngwenyi: ‘Tangumuka, ulimbile mu kalunga lwiji,’ nyi kechi kuyambashana mu mbunge yenyi, alioze mafuliela, cheswacho mamba kumuchikabwa.

²⁴ Kashika, ngunanwambulwila ngwami, yuma yeswayo munwita ha kulemba, fulielenu ngwenu, hinwayitambula kulu, kumunukayitambula.

²⁵ Ni muze munumana ni kulemba, konekenenu akwenu nyi umwe Chuma anuli nacho, hanga Tatenu wa mwilu akanukonekene milonga yenu. [

²⁶ Alioze, nyi yenu kunushi kukonekena akwenu, chibwe Tatenu wa mwilu kechi kanukonekena, ni hakepe, milonga yenu.”]

Chihula hakutwala ku chiyulo cha Yesu

²⁷ No yaahiluka nawa ku Yerusaleme. Shimbu lize te Yesu anende mu zuwo lia Zambi lia Ayuda, mahako a lutwe ni alongeshi a Shimbi, ni makulwana yaamukundama,

²⁸ yaamuhula ngwo: “Ni chiyulo chaya wakulinga nacho yino yuma? Iya wakuhele chiyulo cha kuyilinga?”

²⁹ Yesu ngwenyi: “Ni yami nawa mungunuhula chihula chimuwika. Nyi munungukumbulula cho, mba mungunulweza ni chiyulo chaya nakulinga nacho yino yuma.

³⁰ Ngwami, chiyulo cha Yoano cha kupapachisa, cha mwilu, nyi? Shina cha hashi? Ngukumbululenu.”

³¹ No yaabutuka kulihangujola ngwo: “Nyi twakumbulula ngwetu: ‘Cha mwilu,’ iye matuhula ngwenyi: ‘Kuchi mba kunwakamufulielele?’

³² Alioze, nyi twakumbulula ngwetu: ‘Cha hashi’…” (Yeevwa woma wa mbunga, mumu atu eswe yaanyonga ngwo, Yoano kali mukwa munanyi wa Zambi.)

³³ Mba yaamukumbulula ngwo: “Kutwanyingikine.” Yesu yaamba ngwenyi: “Ni yami nawa, chichi kunwambulwila ni chiyulo chaya nakulinga nacho yino yuma.”