Marku 10 - Mukanda Wa Zambi 1970

Yesu yalongesa hakutwala ku kushiha ulo

¹ Yesu yakatuka ko, yaheta ku chifuchi cha Yudea, yazauka Yordau. Mbunga jinene yaamukunguluka nawa. Neye yaalongesa nikulita ni ndako yenyi.

² Afariseu yaamukundama yaamweseka ni kumuhula ngwo: “Muchilita ni Shimbi lunga kulakula pwo lienyi, nyi?”

³ Yesu neye yaahula ngwenyi: “Shimbi yika anuhele Mose?”

⁴ Ayo ngwo: “Mose watayijile kusoneka mukanda wa kushiha ulo, mba lunga mahasa kulakula mukwo pwo.”

⁵ Alioze Yesu ngwenyi: “Ha kukala cha mbunge jenu, kashika Mose yanusonekena Shimbi yino.

⁶ Alioze chize ku Ubutukilo, muze Zambi atangile yuma yeswe hichinasonewa ngwo: ‘yaatanga lunga ni pwo.

⁷ Kashika, lunga makahichika tato ni naye, akalinunge ni pwo lienyi.

⁸ Mba ayo aali maabwa mutu umuwika.’ Ha chino, hi aali nawa ko, alioze mutu umuwika.

⁹ Kashika, chize Zambi hananungu, mutu kanda achihandununa.”

¹⁰ Mu zuwo, tumbaji twenyi yaamuhula nawa chikuma chize.

¹¹ Yesu yaakumbulula ngwenyi: “Lunga yoze malakula pwo lienyi ni kumbata weka, malingila mutangu utanji.

¹² Chimuwika nawa, pwo yoze mecha lunga lienyi, ni kuya ulo weka, malinga utanji.”

Yesu yawahisa ana

¹³ Atu yaanehena Yesu ana hanga aase moko, alioze tumbaji yaakanjisa atu waze.

¹⁴ Yesu yachimona, yevwa wuli, yaamba ngwenyi: “Tayizenu ana eze kuli yami. Kanda nwakanjisa, mumu Wanangana wa Zambi wa atu ngwe wano.

¹⁵ Chamwenemwene ngunanwambulwila ngwami, yoze keshi kutayiza Wanangana wa Zambi ngwe mwana mukepe kechi kanjila mo.”

¹⁶ Mba yasa ana mu kondo, yasa moko hali mwana ni mwana, yaawahisa.

Pichi

¹⁷ Muze Yesu hakatuka ha kuya mu wenyi, umwe lunga yazomboka, yafulamana ku meso jenyi, yahula ngwenyi: “Longeshi mubema, Chuma chika Changutamba kulinga hanga ngukabwe ni mwono wa miaka yeswe?”

¹⁸ Yesu ngwenyi: “Kuchi unanguvuluka ngwe, mubema? Wakuhi mubema niumwe, shina Zambi wika.

¹⁹ Unanyingika Shimbi ngwo: ‘Kanda ushiha mutu, kanda Ulinga utanji, kanda wiya, kanda ushindakenya mahuza, kanda ulaka, lemesa tatenu ni noko!’ ”

²⁰ Mwe lunga yakumbulula ngwenyi: “Longeshi, Shimbi jino jeswe hingunajifungu chize ku wanuke wami.”

²¹ Yesu yamutala ni zango, yamwamba ngwenyi: “Hindu Chuma chimuwika unahono. Yako, ulanjise yeswe yize uli nayo, utetele yiswale mbongo jize, muukabwa ni ubite mwilu. Mba Wize ungukaule.”

²² Alioze muze hachivwa, lunga yoze yahombola ku meso, yakatuka ni chinyengo chinji, mumu te pichi.

²³ Yesu yatala sali ni sali, mba yambila tumbaji twenyi ngwenyi: “Chikalu pichi kunjila mu wanangana wa Zambi!”

²⁴ Tumbaji yaalishimwoka kuhiana ha maliji jenyi. Alioze Yesu yaambila nawa ngwenyi: “Ana jami, chikalu kunjila mu Wanangana wa Zambi!

²⁵ Chikalu kashitu munene, kamelu, kubalika ndusu mu chituwa cha ndongo, alioze chikalu kuhiana pichi kunjila mu Wanangana wa Zambi.”

²⁶ Tumbaji yaalishimwoka kuhiana, yaalihula ngwo: “Nyi chocho, iya mba mahasa kulilamwina?”

²⁷ Yesu yaatala nee, yaamba ngwenyi: “Atu kenu machisa, alioze hi Zambi ko, mumu Zambi kakuhasa yuma yeswe.”

²⁸ Petulu yabutuka kumwamba ngwenyi: “Tala, yetu hitunahichika yize yeswe twabwile nayo, hitunakukaula.”

²⁹ Yesu yaamba ngwenyi, “Chamwenemwene ngunanwambulwila ngwami, nyi umwe mahichika zuwo lienyi chibwe ayayo, ni anakwo hanji mandumbu, Chipwe naye, hanji tato, Chipwe ana, hanji minda, mumu hali yami ni ha Sango Jibema,

³⁰ makatambula yisuho kulakaji haliabwila mu mwakono: mazuwo, ni ayayo, ni anakwo, ni mandumbu, ni anaye, ni ana, ni minda, hamwe ni yihungumiona. Mba ha mwaka uze muwizaho, mwono wa miaka yeswe makatambula.

³¹ Alioze anji waze ali atangu haliabwila, kumakabwa asula. Chimuwika nawa anji waze ali asula haliabwila kumakabwa atangu.”

Yesu yambulula chisuho cha muchitatu kufwa chenyi ni uhindukilo wenyi

³² Yesu ni tumbaji twenyi te mu jila ali ya kuya ku Yerusaleme. Yesu yaatetekela. No yaalishimwoka kuhiana. Akwo waze te anakaula, yeevwa woma. Yesu yatwala nawa tumbaji kumi ni aali ku tenga, yaambulwila yuma yize muyikanuwana kulutwe ngwenyi:

³³ “Banjikenu! Tunayi ku Yerusaleme. Kwanako maakakunjika Mwana Mutu kuli mahako a lutwe a Zambi ni alongeshi a Shimbi. No maakamuhisa hanga akafwe, maakamukunjika kuli yilambala.

³⁴ No maakamukekuna, maakamufwila mate, maakamulamba ni fimbo (shikote), maakamushiha. Alioze ha tangwa lia muchitatu kumakahinduka.”

Chihula cha Tiangu (Jake) ni Yoano

³⁵ Hohene Tiangu (Jake) ni Yoano, ana ja Zebedeu, yaakundama, yaamwamba ngwo: “Longeshi, tunazange utulingile cheswacho mutukwita.”

³⁶ Neye yaahula ngwenyi: “Yika nunazange ngunulingile?”

³⁷ Ayo ngwo: “Tutayize kama, tukatwame umuwika ku chindume che, mukwo ku chimeso mu Wanangana we wa uhenya.”

³⁸ Alioze Yesu ngwenyi: “Kunwanyingikine chize nunechi. Munuhasa kunwa musenge wa lamba uze mungunwa yami, nyi? Munuhasa kutayiza upapachiso uze mangupapachisa nawo yami, nyi?”

³⁹ Ayo ngwo: “Mutuhasa.” Yesu ngwenyi: “Yenu chamwenemwene kumununwa musenge uze yami mungunwa. Maakanupapachisa ni upapachiso uze maangupapachisa nawo,

⁴⁰ alioze hi cha yami ko kubatula yoze makatwama ku chindume chami hanji chimeso. Mihela yize yili ya waze Tata hanaalulikila yo.”

⁴¹ Muze tumbaji akwo kumi haachivwa, yaabutuka kuvwila Tiangu (Jake) ni Yoano wuli.

⁴² Mba Yesu yaatambika eswe nikwamba ngwenyi: “Nunanyingika ngwenu, akwa kuyula ja atu kaakuyula ni tachi, ni anene jo kaakuyula ni chiyulo cheswe.

⁴³ Alioze hi chocho ko hakachi kenu. Nyi umwe hakachi kenu mazanga kubwa munene, chamutamba kubwa kavumbi kenu.

⁴⁴ Nyi umwe hakachi kenu mazanga kubwa mutangu, chamutamba kubwa ndungo ya eswe.

⁴⁵ Mumu chibwe Mwana Mutu kejile ko hanga amulingile alioze alingile atu, ni kukunjika mwono wenyi ha kukula atu anji.”

Yesu yalawisa meso ja kapuputa Bartimeu

⁴⁶ No yaaheta ku limbo lia Yeriku. Shimbu te Yesu machituhuka mo, hamwe ni tumbaji twenyi ni mbunga yinene, Bartimeu, mwana wa Timeu, kapuputa, te kanatwama ku sesa lia jila ni kuunjila.

⁴⁷ Muze hevwa ngwo: “Auze Yesu Kanazare,” yabutuka kukololoka ngwenyi: “Yesu, Mwana wa David, nguvwile kama keke!”

⁴⁸ Anji yaamukanjisa ngwo: “Hola!” Alioze yakololoka kuhiana ngwenyi: “Mwana wa David, nguvwile kama keke!”

⁴⁹ Yesu yamana, yamba ngwenyi: “Mutambikenu.” No yaatambika mwe kapuputa ngwo: “Hamuka, katuka, kanakutambika.”

⁵⁰ Bartimeu yambila chikuto chenyi, yanyangumuka, yeza kuli Yesu.

⁵¹ Yesu yamuhula ngwenyi: “Yika unazange ngukulingile?” Mwe kapuputa ngwenyi: “Longeshi, ngulaule kama ku meso.”

⁵² Yesu ngwenyi: “Yako kwe, ufulielo we hiwakuwuka.” Hazehene kapuputa yalaula, yakaula Yesu mu jila.