Marku 1 - Mukanda Wa Zambi 1970

Yoano Chipapachisa yambujola

¹ Uno we Ubutukilo wa Sango Jibema jize jinahanjikila Yesu Kristu, Mwana Zambi.

² Ngwe chize hichinasonewa mu mukanda wa mukwa munanyi wa Zambi, Izaya, ngwo: “ ‘Achivwenu! Ngunatumu kanganda kami kulutwe lie akakululikile jila.’ Chenacho anambe Zambi.

³ Mutambi wa mutu yoze wakukololoka mu puya ngwenyi: ‘Lulikenu jila ya Mwene, Lulamisenu yikoka yenyi.’ ”

⁴ Chenacho Yoano Chipapachisa asolokele mu puya, yambujola ngwenyi: “Alumukenu ku mbunge, anupapachise, mba Zambi manukonekena milonga yenu.”

⁵ Chifuchi cheswe cha Yudea ni atu eswe a mu limbo lia Yerusaleme te kaakwiza kuli Yoano nikushikisa milonga yo. Neye kakwapapachisa mu lwiji Yordau.

⁶ Yoano te kakuzala hina lia kulinga ni mona ja kashitu munene, kamelu, ni muya wa kubu mu zalilo yenyi. Te kakulia makumbi ni wuchi wa mu yambu.

⁷ Yambujola ngwenyi: “Mutu meza kunyima liami; kananguhiana yami. Chatelele nichimwe kuhetama ni kujitula sapato jenyi.

⁸ Yami hinanupapachisa ni meya, alioze iye makanupapachisa ni Mwiku wa Linanga.”

Yoano yapapachisa Yesu

⁹ Ha matangwa waze, Yesu yakatuka ku limbo lia Nazare mu chifuchi cha Galilea, yeza kuli Yoano. Neye yamupapachisa mu Yordau.

¹⁰ Shimbu lize te Yesu anatutuka mu meya, yamona lilu linazuluka ni tachi. Mwiku wa Linanga yiumuhulumukina ngwe liembe.

¹¹ No yeevwa liji mwilu ngwo: “Yena mwe Mwanami, nakukuzanga kuhiana, nakuwahilila ne.”

Sakwonga yeseka Yesu hanga amuvulumwise

¹² Hohene Mwiku wa Linanga yiumushinijika mu puya.

¹³ Neye yabwa mu puya matangwa makumi awana. Sakwonga yamweseka. Yesu yabwa hamwe ni tushitu a mu yambu. Tunganda a mwilu yaamulingila.

Yesu yatambika akwa kutela yishi

¹⁴ Muze haasa Yoano mu zuwo lia lamba, Yesu yaya ku chifuchi cha Galilea nikwambujola Sango Jibema ja Zambi.

¹⁵ Ngwenyi: “Tangwa hiliaheta. Wanangana wa Zambi hiwakundama! Alumukenu ku mbunge! Fulielenu je Sango Jibema!”

¹⁶ Muze te Yesu anende ku mbumbulu ya chitende cha Galilea, yamona Simone ni mwanakwo Andre. Kaanate Wanda mu meya mumu te akwa kutela yishi.

¹⁷ Yesu yaamba ngwenyi: “Ngukaulenu yami, mba mungukanupwisa akwa kutela atu.”

¹⁸ Hazehene yaahichika manda jo, yaamukaula.

¹⁹ Muze hasenya kulutwe, yamona Tiangu (Jake) ni mwanakwo Yoano, ana ja Zebedeu, te manda jo analulieka.

²⁰ Hazehene yaatambika. No yaahichika tato Zebedeu ni ngamba mu wato, yaakaula Yesu.

Yesu yatuhwisa mwiku wa luchisa

²¹ Yesu ni tumbaji twenyi yaaya ku limbo lia Kafarnaume. Ha tangwa lia kuhwima, Yesu yanjila mu zuwo lia kuwayila lia Ayuda, yabutuka kulongesa.

²² Atu waze amuvwile, yaalishimwoka kuhiana ha longeso lienyi. Mumu kabwile ko ngwe alongeshi a Shimbi, alioze Yesu te kakulongesa ni chiyulo.

²³ Susumuku mutu wa mwiku wa luchisa yasoloka mu zuwo lia kuwayila. Yakololoka ngwenyi:

²⁴ “Kuchi yetu ni yena, Yesu Kanazare? Hiweza mu kutwonona, nyi? Ngunakunyingika kanawa, mwe Munangi yoze atumine Zambi.”

²⁵ Yesu yakalukila mwiku wa luchisa ngwenyi: “Hola! Tuhuka muli mutu yono!”

²⁶ Mwiku wa luchisa yiukololoka chikolo, mba yiumutuhuka.

²⁷ Atu yaalishimwoka kuhiana! Yaalihula ngwo: “Chino chika? Longeso liaha, Mumu chiyulo akwete. Chibwe mwiku wa luchisa muumwononokena!”

²⁸ Lufuma wa Yesu yafumana nikawashi mu chifuchi cheswe cha Galilea.

Yesu yawuka mieji anji

²⁹ Yaatuhuka mu zuwo lia kuwayila. Hazehene yaanjila mu zuwo lia Simone ni Andre. Tiangu (Jake) ni Yoano yaaya no.

³⁰ Naye weno ya Simone te kanabombo ha muhela, kanayiji kachiki. Hazehene yaamwambulwila yo.

³¹ Yesu yamukundama yamukwata ku kwoko, yamukatwisa. Kachiki yamuhwa. Neye yaalingila yakulia.

³² Chingoloshi, muze tangwa hilianjila kulu, atu yaamunehena mieji eswe ni akwa mwiku wa luchisa.

³³ Limbo lieswe yaakunguluka ku chikolo cha zuwo.

³⁴ Yesu yawuka atu anji waze abwile ni misongo yeka ni yeka. Yatuhwisa mwiku wa luchisa unji. Katayijile mwiku wa luchisa kuhanjika, mumu wamunyingikine.

Yesu yalemba, yaya ni kwambujola

³⁵ Chichamene cheswe, shimbu kuchili milima, Yesu yahinduka, yatuhuka, yaya ha ukawenyi, yalembela ko.

³⁶ Simone ni waze abwile nenyi yaaya akamufupe.

³⁷ Muze haamuwana, yaamwamba ngwo: “Eswe kaanakufupu.”

³⁸ Alioze Yesu ngwenyi: “Tuyenu kweka ku membo akusulangana, hanga ngukambujole ko nawa, mumu ha chikuma chino nejilile.”

³⁹ Mba yaya ku chifuchi cheswe cha Galilea, yambujola mu mazuwo jo a kuwayila, yatuhwisa mwiku wa luchisa.

Yesu yabemesa mukwa mbumba

⁴⁰ Mukwa mbumba yeza kuli Yesu, yaliumba ha makungunwa ku meso jenyi ngwenyi: “Nyi unazange, muuhasa kama kungubemesa.”

⁴¹ Yesu yamuvwila keke, yolola kwoko lienyi, ngwenyi: “Ngunazange, bwako mubema!”

⁴² Hazehene misongo yiimuhwa, neye yabema.

⁴³ Yesu yamukatwisa hanga aye, yamwaha koki chikolo ngwenyi:

⁴⁴ “Unevu? Kanda ukambulwila niumwe, alioze yako ukalilweze kuli hako wa Zambi. Mba lambula mulambu uze ambile Mose ha kulweza eswe ngwe, hiwabema.”

⁴⁵ Alioze mutu yoze yatuhuka, yachinyingikisa kweswe ni kuchifumanyisa. Kashika Yesu kahashile ko kusoloka nawa ku meso ja atu mu membo alioze yabwa ha ukawenyi. Atu a ku sali ni sali yeezaza kuli iye.