Malaki 3 - Mukanda Wa Zambi 1970

¹ Mwene Zambi Mukwa Ndundo Jeswe kanakumbulula ngwenyi: “Mungukatuma kanganda kami ni kungululikila jila. Hohene Mwene Zambi yoze nunatalatala kumeza susumuku ku zuwo lienyi. Kanganda yoze nunevwila usona kumeza akambujole Usendo wami.”

² Alioze iya makahasa kujikiza ha tangwa lize? Iya makahasa kubwa ni mwono muze makasoloka? Kumakabwa ngwe savo (sabau) ya tachi, hanji ngwe kahia kaze kakubemesa utale.

³ Makeza ni kusopesa ngwe yoze unabemesa prata. Ngwe chize mukwa utotombo akubemesa prata ni oru, Chenacho kanganda ka Mwene Zambi makabemesa mahako hanga akanehe milambu yize yinalite.

⁴ Hohene milambu yize mahako ni akwa Yerusaleme akuneha kuli Mwene Zambi muyikamuwahila ngwe mwaka wali.

⁵ Mwene Zambi Mukwa Ndundo Jeswe kanambe ngwenyi: “Mungukasoloka mukachi kenu ni kunubatwila, mungukalimika ni akwa kupanda wanga, ni yitanji, ni akwa kulenya, ni waze akwiya fweto ya akwa milimo, ni waze akubinjisa mapwo waze haanafwisa malunga ni ana a shiwa ni yilambala, eswe waze keeshi kungulemesa.

Shimbi hakutwala ku milambu ya cha kumi

⁶ “Yami nguli Mwene Zambi, Chishi kwalumuka. Kashika yenu vungu lia Yakoba, chanunongesene ko liakulu.

⁷ Yenu, ngwe tushakulu twenu waze aliangile, hinwakolema Shimbi jami, kunwajifungile ko. Hilukenu kuli yami, ni yami munguhiluka kuli yenu. Alioze yenu nwakuhula ngwenu: ‘Kuchi chatutamba kulinga mba tuhiluke kuli yena?’

⁸ Ngunanuhula ngwami, chinalite umwe mutu kwiya Zambi, nyi? Ka! Hindu nwakufunga. Ngwenu: ‘Ngwe kuchi twakukwiya?’ Ngwami hakutwala ku milambu ya Chihanda chimuwika ku yihanda kumi, ni milambu yikwo.

⁹ Kunwashingiwa yenu eswe, mumu vungu lieswe nwakungwiya.

¹⁰ Nehenu yihanda yenu yeswe ya cha kumi ku zuwo liami hanga likazale ni yakulia yinji. Achingwesekenu, mba munumona chize mungunwazulwila tupenda twa mwilu ni kunuzukwila yuma yibema yeka ni yeka.

¹¹ Chichi kutayiza tututu kwonona mbuto jenu, mitondo yenu ya vinyu muyikema mihuko yinji.

¹² Hohene mavungu eswe maakanuvuluka ngwo: ‘Kunwawaha,’ mumu chifuchi chenu muchikabwa muma mubema mwakutwama.”

Mwene Zambi yalakenya kuvwila atu keke

¹³ Mwene Zambi kanambe ngwenyi: “Hinunahanjika yuma yikalu hakutwala kuli yami. Hindu nwakuhula ngwenu: ‘Yuma yika twakukwamba?’

¹⁴ Nwakungwamba ngwenu: ‘Kulingila Zambi chili Chuma chamokomoko. Chika mutwanda ko? Mumu yika kulweza Mwene Zambi Mukwa Ndundo Jeswe ngwetu, tunevu chinyengo ha yize hitunalingi?

¹⁵ Twakumona ngwetu, akwa kulizata kaakuwahilila. Yingulungulu kaakuyuka, kaakweseka Zambi ni ungulungulu wo, neye keshi kwamwesa lamba.’ ”

¹⁶ Hohene atu waze te akuvwila Mwene Zambi woma yaalihanjikisa. Mwene Zambi neye yabanjika ku yize anambe. Ku meso jenyi yasoneka majina ja atu waze te akumuvwila woma ni kumulemesa.

¹⁷ Mwene Zambi Mukwa Ndundo Jeswe kanambe ngwenyi: “Kumaakabwa atu jami. Ha matangwa waze mungukasolola tachi jami, no kumaakabwa atu ja yami mwene. Mungukeevwila keke ngwe chize umwe tata wakuvwila keke mwanenyi yoze wakumulingila.

¹⁸ Henaho atu jami maakamona nawa kulituchika cha akwa ululi ni yingulungulu, ni cha yoze wakungulingila ni yoze keshi kungulingila.”