Malaki 2 - Mukanda Wa Zambi 1970

¹ Mwene Zambi Mukwa Ndundo Jeswe kanambila mahako ngwenyi: “Shimbi yino yili mumu hali yenu.

² Chanutamba kungulemesa ha yize nwakulinga. Nyi kunusolo kubanjika yize ngunambe, mungunushinga. Mungulunga nawa yuma yize nwakutambula ha milimo yenu ya uhako. Ni mwene, hinayishinga kulu, mumu kunwasele ko mbunge ku Shimbi jami.

³ Mungumwesa ana jenu lamba, mungunukwita ufwachi wa yimuna yize nwakulambula milambu, ni kunumbila haze nwakumbila we ufwachi.

⁴ Mba mununyingika ngwenu, yami nanwaha Shimbi yino hanga Usendo wami ni mahako, vungu lia Levi, kuuchi kufwa.

⁵ “Mu Usendo wami yingwalakenya mwono ni uhwimino, yenayo naalakenyene hanga angulemese. Ha matangwa waze te kaakungulemesa ni kunguvwila woma.

⁶ Yaalongesa umwenemwene, hi kwonga ko. Te kaakulikata ni yami. Kaalingile ko yibema ayo ene wika, alioze yaakwasa atu akwo anji hanga ehuke yibi.

⁷ Milimo ya mahako yili kulongesa yinyingi yamwenemwene ya Zambi. Atu chaatamba kuya kuli ayo hanga aalongese upale wami, mumu mahako kaali tunganda twa yami Mwene Zambi Mukwa Ndundo Jeswe.

⁸ “Alioze yenu mahako, hinwapiasuka mu jila yibema. Longeso lienu hiliapiangula anji. Hinwashiha Usendo uze nakolesele ni yenu.

⁹ Yami mungushinjika Aisraele anulelese mumu kunushi kulinga nikulita ni upale wami, nwakulongesa atu jami ni katonde.”

Uhulia wa atu

¹⁰ Eswe hituli ana a tata umuwika ko, nyi? Katutangile ko kuli Zambi umuwika, nyi? Kuchi mba twakukolema chilakenyo chetu umwe ni mukwo? Kuchi mba twakulelesa Usendo uze Zambi akolesele ni tushakulu twetu?

¹¹ Ayuda haakolema chilakenyo cho kuli Zambi, haalinga chuma cha kuzelwokesa mu Yerusaleme ni mu chifuchi cheswe. Haajilula zuwo lize Mwene Zambi akuzanga. Malunga haambata mapwo waze akuwayila mazambi a yilambala.

¹² Mwene Zambi achize kama ku mbunga ya Israele mweswawo wakulinga chuma ngwe chino, kanda amutayiza nawa kulambula milambu hamwe ni vungu lietu kuli Mwene Zambi Mukwa Ndundo Jeswe.

¹³ Chuma chikwo nwakulinga, nwakulundumwina masoji anji ha chilumbilo cha Mwene Zambi, nwakulila ni kutwa mikuma mumu Zambi keshi kutayiza nawa milambu yize nwakulambula.

¹⁴ Nwakuhula ngwenu: “Mumu yika Zambi keshi kuyitayiza nawa?” Ngwami, mumu Mwene Zambi kananyingika ngwenyi, hiwakolema chilakenyo kuli pwo lia ukweze we. Te kali sepa lie, alioze yena yiukolema chilakenyo che chize walakenyene ku meso ja Zambi ngwe, muubwa mukwa kushishika.

¹⁵ Kuma Zambi kanutangile mujimba umuwika ni mbunge yimuwika, nyi? Nyonga lienyi kuchi liabwile mu Chuma chino? Ngwenyi, hanga nukabwe ni ana amwenemwene a Zambi. Kashika Senu tachi, niumwe kanda akolema chilakenyo kuli pwo lienyi.

¹⁶ Mwene Zambi, Zambi ya Aisraele kanambe ngwenyi: “Nakubihilila ni mutu yoze malakula pwo lienyi. Nakubihilila ni uswii uze. Sako tachi, kanda ukolema chilakenyo che kuli pwo lie.”

Tangwa lia ubatwilo hiliakundama

¹⁷ Hinwahongesa Mwene Zambi ni maliji jenu. Alioze nwakuhula ngwenu: “Ngwe kuchi hitwamuhongesa?” Ngwami muze nwakwamba ngwenu: “Mwene Zambi Mukwa Ndundo Jeswe kakunyonga ngwenyi, yitanganyanyi eswe kaali abema; ni mwene kakwazanga.” Hanji muze nwakuhula ngwenu: “Zambi yoze wakubatula ni ululi kuli ali?”