Lungungu 5 - Mukanda Wa Zambi 1970

Kulemba: Mwene Zambi tuvwile kama keke

¹ Aa Mwene Zambi, iwuluka kama yuma yize yabwa hali yetu. Tutale kama, umone chize akutuvwisa sonyi.

² Chihinga chetu hichabwa mu moko ja yilambala; mavungu akwo haatwama mu mazuwo jetu.

³ Tuli ana a shiwa, atata haanashihi kuli akwa kole, amama haabwa tuliwa.

⁴ Meya a kunwa twakulanda, kunyi ja kuteleka yakulia shina kufweta.

⁵ Kaakutwendesa ni tachi ngwe tuli tushitu, hijaatuhwa, kutushi ni uhwimino.

⁶ Ha kubwa ni yakulia twalikunjika kuli akwa Egiptu ni kuli Aasuria.

⁷ Tushakulu twetu haanavulumuna, alioze haliabwila keeshi ko, hiyetu tunamono lamba mumu ha milonga yo.

⁸ Ndungo kaakutuyula, niumwe mahasa kutulamwina kama ku chiyulo cho.

⁹ Akwa kushiha atu kaakwendangana sali ni sali; ha kufupa yakulia, twakusa mwono wetu mu utoji.

¹⁰ Tuli ni kachiki kuhiana mumu ha zala; chikowa chetu hichasasaminya ngwe jiko.

¹¹ Akwa kole haakwata mapwo jetu ni tachi ha mulundu wa Zione, ni ana mapwo nawa mu membo eswe ja Yuda.

¹² Haazezeleka miata jetu ku moko jo; tushinakaji twetu kaalemesene ko.

¹³ Akweze jetu kaanahe milimo ya kutwa ngwe ndungo, ana jetu a malunga kaakutalinga ni yiteli yinene ya kunyi.

¹⁴ Makulwana jetu keeshi kutwama nawa mu chota; akweze jetu hikaasolo kwimba nawa miaso.

¹⁵ Hikutushi nawa ni uwahililo mu mbunge jetu; kuhangana chetu hichalumuka yinyengo.

¹⁶ Chipangula hichaholoka ku mutwe wetu. Lamba lietu mumu hitwavulumuna.

¹⁷ Hitwayiza kuhiana mu mbunge jetu, kuhasa kutala kanawa ka, mumu ha masoji;

¹⁸ mumu mulundu wa Zione hiwabwa wahululu, hiwabwa wendelo wa mikuza.

¹⁹ Alioze yena, Aa Mwene Zambi, uli mwanangana ku miaka yeswe, Muukayula ndoo ku songo lia miaka.

²⁰ Mumu yika hiwatwehuka matangwa abwa haha? Kuushi kutwiwuluka nawa nichimwe, nyi?

²¹ Mwene Zambi, tuhilwise kama kuli yena! Tuhilwise kama! Tuhilwishile kama uhenya wetu Ukulu.

²² Hanji hiwatumbila lume liakulu, nyi? Ufwatulo we kuushi ni songo, nyi?