Lungungu 4 - Mukanda Wa Zambi 1970

Lamba mu Yerusaleme muze akwa kole heenyeka lie limbo

¹ Oru yetu yibema hiyalauluka; mawe abema a mu zuwo lia Zambi haamwangashana mu majila.

² Akweze a mu Zione te alemu ngwe oru, haliabwila haabwa ngwe ndeho (yimbia) ya uma.

³ Chibwe mukuza kakwamwisa ana jenyi, alioze atu jami haabwa ngwe kajila munene otrishe yoze ukwete uswii kuli ana jenyi.

⁴ Ana jo a kemba kaanafu ni zala ni pwila; kaanaunjila yakulia alioze kukushi niumwe yoze maaha yo.

⁵ Waze te akulia yakulia yiyema, haliabwila kaanafu mu majila; waze te akuzala mahina alefuna, haliabwila kaanabombo ku chichila cha uto.

⁶ Atu jami kaanamono lamba liahiana lize lia akwa Sodome, Zambi yaashiha susumuku, kaahashile ko kuchina.

⁷ Alemu jetu abwile alinanga, atoma ngwe chiwe, te akwa kutakama, akwa tachi, ni mijimba yibema.

⁸ Haliabwila keeshi kwanyingika nawa muze mu majila; haafwa kwo, meso jo haalaa, yikowa yo hiyominyina ku yifwaha ngwe mitondo yumu.

⁹ Waze afwile mu jita ngwe muhabwa kama, hi ngwe waze ko afwile ni zala, mumu kufwa cho chabwile cha kulekumioka.

¹⁰ Lamba likalu liejile hali atu jami; amama a zango yatejeka ana jo ni kwatengeka yakulia.

¹¹ Mwene Zambi yasolola ufwatulo wenyi unji Wahiana; yawika kahia kaze yochela limbo lia Zione liakulu.

¹² Mutu niumwe, chibwe mianangana ja mavungu a yilambala, anyonge ngwo, mukwa kole mahasa kunjila mu yikolo ya Yerusaleme.

¹³ Alioze chino chabwile mumu akwa munanyi jenyi yaavulumuna, ni mahako jenyi yaashihisa waze te keeshi yitela.

¹⁴ Akwa lutwe yeendangana mu majila ngwe tupuputa; haanalibihisa kuhiana ni manyinga. Kashika niumwe kazangile kwakwata nawa ku mahina.

¹⁵ Atu yaakololoka ngwo: “Katukenu! Nuli akwa luchisa! Kanda nutukwata!” Kashika yeendangana ku vungu ni vungu, niumwe kaazangile ko.

¹⁶ Mwene Zambi hikaalwile ko nawa nichimwe, yaahanga iye mwene. Katalile ko nawa kuli mahako jetu, kevwilile ko nawa akwa lutwe jetu keke.

¹⁷ Yitutala taliee, alioze niumwe kejile ko ni kutukwasa. Yitushimbwila ngwetu, hanji limwe vungu meeza, alioze keejile ko.

¹⁸ Akwa kole yaatulayila; kutwahashile ko kwendangana chibwe mu majila. Matangwa jetu te haasula; te songo hiliaheta.

¹⁹ Yaatuzombwesa minanga ngwe chize tela akuhulumuka mwilu. Yaatuzombwesa minanga ha milundu; yaatukwachila mu puya.

²⁰ Mwanangana yoze Mwene Zambi atongwele, mwe chishina cha mwono wetu, yaamwoza mu mawumbu jo. Kali yoze twakujikijila kutufunga mukachi ka mavungu akwo.

²¹ Yenu Aedome ni akwa Uze, ivwenu chiseke ha shimbu lize nunahase. Lamba lienu kulineza; ni yenu nawa kumunwendangana uselesele ni sonyi.

²² Zione hatambula fweto mumu ha shili yenyi; Mwene Zambi kechi kutuhichika nawa mu undungo. Alioze yena Edome, Mwene Zambi makakumwesa lamba; kumakasolola mulonga we.