Lungungu 3 - Mukanda Wa Zambi 1970

¹ Yami ngunanyingika chize Zambi akumwesa lamba.

² Hangushinjika mu milima bwii, Pangu liakuhi.

³ Kakungulamba kanji, kunguvwila kama keke ka.

⁴ Hawangamisa mujimba wami ni che chikowa, hamakuna yifwaha yami.

⁵ Hanguvwisa lamba ni yinyengo.

⁶ Hangutwamisa mu milima ngwe atu waze haanafu kulu.

⁷ Hangukasa ni ngoji ja utale, hinabwa funge; chahashile kuchina.

⁸ Ngunakololoka angukwase, alioze Zambi kangubanjikile.

⁹ Hashita majila jami ni mawe, mana a kubalika akuhi; hahengesa majila jami.

¹⁰ Hangujikinyina ngwe kashitu munene ursu; hangutumbukila ngwe tambwe.

¹¹ Hanguhanga mu jila, hangupapulula, hanguhichika.

¹² Hanana uta wenyi, hangupwisa Chuma cha kwashila mivwi.

¹³ Hangwasa mivwi yenyi ndusu mu mujimba.

¹⁴ Atu kaakunguseha matangwa eswe; hinabwa chikuma kuli ayo eswe.

¹⁵ Hangupwisa kasashisa musasu, hangukuchisa ni kunwa ni kulia chisasu.

¹⁶ Hangwamba ngutote mawe ni mazo, hangufwita huma mu mavu.

¹⁷ Hanguchiza uhwimino mu mbunge, hinavulama chize ubwa uwahililo.

¹⁸ Hichishi nawa ni matangwa anji ni kufwa; chishi kusa nawa mbunge kuli Mwene Zambi.

¹⁹ Nyi nanyonga lamba liami ni chize ngunalungajala, yili ngwe ulembe usasu.

²⁰ Nyi nayinyonga ni we mwono Chishi kuwivwa nawa.

²¹ Alioze Chuma chimuwika lume ngunase mbunge:

²² Zango lia Mwene Zambi ni keke yenyi kuyishi kuhwa,

²³ tangwa ha tangwa yakubwa yaha, kuyakubwa ni shindakenyo ngwe kuvumbuka cha tangwa.

²⁴ Mwene Zambi kali mwono wami, kashika nakumusa mbunge.

²⁵ Mwene Zambi kali mubema kuli eswe waze akujikijila hali iye.

²⁶ Kashika chinabeme kuli yetu kushimbwila ni kulihumikiza, hanga iye mwene atulamwine.

²⁷ Chinabeme tulilongese kulihumikiza mu ukweze wetu.

²⁸ Muze tunamono lamba, chatutamba kuhola kuluu.

²⁹ Chatutamba kuhetama ni kuzeyela, mba hanga tuse mbunge ku yiwape ya kulutwe.

³⁰ Chibwe atulambe chibwe atushililike, chatutamba kulihumikiza.

³¹ Mumu Mwene Zambi kali mukwa keke, kechi katumbila ndoo ku miaka yeswe.

³² Mahasa kutuvwisa chinyengo, alioze kakutuzanga kuhiana.

³³ Mumu keshi kwivwa kuwaha kutuvwisa chinyengo hanji kutumwesa lamba.

^34-36 Mwene Zambi hanyingika muze twakwivwa chinyengo mu zuwo lia lamba. Muze atu akulituna chiyulo chenyi akutwaha Zambi, nikuhengesa ubatwilo mu chota.

³⁷ Iya mahasa kwamba chimwe Chuma, mba chibwe, nyi Zambi kachitayijile?

³⁸ Yibema ni lamba kuyishi kukatuka kuli Mwene Zambi, nyi?

³⁹ Ngwe kuchi mutulinyenyeta muze hatumwesa lamba mumu ha milonga yetu.

⁴⁰ Tuhengulenu majila jetu, tuhilukenu kuli Mwene Zambi.

⁴¹ Tuhanenu mbunge jetu kuli Zambi mwilu ni kulemba ngwetu:

⁴² “Hitwavulumuna, hitwakukolema. Yena Mwene Zambi, kuwatukonekenene.

⁴³ “Hiwatuhanga ni kutushiha, hiwasweka keke ye mumu ha ufwatulo we.

⁴⁴ Hiwalifuka lelwa uchine kwivwa kulemba chetu.

⁴⁵ Hiwatupwisa ngwe mulumba wa yiswaswa kuli akwa hashi.

⁴⁶ “Akwa kole jetu eswe kaakutuchoka.

⁴⁷ Lamba ni kwenyeka hiyatuwana; tuli mu utoji, tunevu mwongo.

⁴⁸ Meso jami kaanapukumuka masoji ngwe njiji, mumu ha kwonona cha atu jami.

⁴⁹ “Meso jami maalundumuka masoji, chahashile kuhola, kaahashile kuma,

⁵⁰ ndoo Mwene Zambi mwilu matala hashi nikutumona.

⁵¹ Chinyengo chinji ngunevu ha kumona lamba lize hiliawana mapwo a mu limbo liami.

⁵² “Atu waze akunguvutwokela chitela chakuhi, haanguhanga ngwe nguli kajila.

⁵³ Hangumbila wa mwono mu wina, haalangumwina ko liwe.

⁵⁴ Meya yaabutuka kungufuka, yingwamba ngwami: ‘Ngunafu!’

⁵⁵ “Aa Mwene Zambi, mu wina yingukololoka kuli yena,

⁵⁶ Muze naliondelele, yiungubanjika.

⁵⁷ Yiungukumbulula ngwe: ‘Kanda wivwa woma.’

⁵⁸ “Mwene Zambi, yiutala mulonga wami yiulamwina mwono wami.

⁵⁹ Unguhakwile kama; yena Unanyingika yibi yize angulingile.

⁶⁰ Yena Unanyingika chize akwa kole jami ananguvutwokela ni chize anangutwama punga.

⁶¹ “Aa Mwene Zambi; hiwevwa chize ananguchoko, unanyingika punga jo jeswe.

⁶² Tangwa Heswe kaakuhanjika hakutwala kuli yami ni kululieka manyonga jo.

⁶³ Chize chichamene ndoo ku ufuku kaakungusaula.

⁶⁴ “Aa Mwene Zambi, amwese kama lamba mumu ha yize haalinga.

⁶⁵ Ashinge, apwise yihulia.

⁶⁶ Ahume hashi ni utenu we, anongese kama.”