Lungungu 2 - Mukanda Wa Zambi 1970

Mwene Zambi yamwesa akwa Yerusaleme lamba

¹ Mwene Zambi mu ufwatulo wenyi hafuka Zione ni milima. Uhenya wa Yerusaleme haubihisa. Ha tangwa lia ufwatulo wenyi hehuka zuwo lienyi lia kuwayila.

² Mwene Zambi henyeka yihunda yeswe ya Yuda, ni keke kama ka; habuzula yipanga yakukoleka yize te yakufunga chifuchi. Hamwesa mwe mwanangana lamba ni e akwa kuyula jawo.

³ Mu ufwatulo wenyi yanyikumuna tachi jeswe ja Israele; Yalituna kutukwasa muze ejile akwa kole. Yalimika ni Yakoba ngwe kahia, yonona yuma yeswe.

⁴ Yanana mata jenyi hali yetu ngwe umwe mukwa kole; yashiha eswe waze abwile uwahililo ni chiseke chetu. Yevwila Zione ufwatulo uze unalekwoka ngwe kahia.

⁵ Mwene Zambi honona Israele ngwe umwe mukwa kole; habuzula yipanga yenyi yakukoleka ni mazuwo a mwanangana. Hamwesa Ayuda lamba lize kulishi kuhwa.

⁶ Habuzwola zuwo lienyi muze te twakumuwayila; hasa songo ha matangwa a yiwanyino ni a kuhwima. Halituna mianangana ni mahako mu ufwatulo wenyi.

⁷ Mwene Zambi halituna chilumbilo chenyi, hehuka zuwo lienyi lia chijila; hatayiza akwa kole kubuzula yipanga yalio. No yaakolokoka muze anakumbu muma muze te twakuwayila ni chiseke.

⁸ Mwene Zambi hanabatula ngwenyi, yipanga ya Zione chatamba kuyibuzula; hanayenyeka ha kushindakenya ngwo, yeswe chatamba kubuzuka. Haliabwila zuwo lisuku ni ye yipanga hiyabuzuka hamuwika.

⁹ Yajilo hiyanjila hashi, ni ye yikungo yayo hiyabatwoka. Mwanangana ni e alemu haliabwila kaali mu undungo. Hikeeshi kulongesa nawa Shimbi; akwa munanyi keeshi nawa ni Usolwelo wa kuli Mwene Zambi.

¹⁰ Tushinakaji a mu Zione kaanatwama hashi kuluu, kaanalimwangina fufuta ha mitwe yo ni kuzala mianji. Ana mapwo kaanahetamina hashi.

¹¹ Hijanguhwa ni che kulila; chinyengo chinji ngunevu. Hinalekumuka ni chikulikuli ha kunonga cha atu jami. Ana a kemba ni tuchila kaanalezumwoka mu majila ja limbo.

¹² Ana kaanalilila anaye, mumu ha zala ni pwila. Kaanalimbwoka mu majila ngwe tupaza, kaanafwilafwila mu makondo ja anaye.

¹³ Aa Yerusaleme, mbayi Yerusaleme, kuchi mungwamba kama? Ngwe kuchi ngunahase kukulembejeka? Niumwe hanamono lamba libwahaha. Lamba lie lioka naye, lili ngwe kalunga lwiji; kuwahashile kusa nawa mbunge ku yiwape ya kulutwe.

¹⁴ Akwa munanyi je yuma ya mahuza lume anakakulweza; kaanakakwonga ni longeso lio mumu kaasolwele nichimwe milonga ye. Te kaasolo kukulweza yibi ye hanga ulikonyeke.

¹⁵ Atu waze akubalieka mu limbo kaakulishimwoka ha kukumona; ngwo: “Haa! Puu! Jakukangana.” Kaakulisoza ni kuhunga mitwe ha kumona kwenyeka cha Yerusaleme. Ngwo: “Kuma lie limbo lize liabwile ni uhenya, nyi? Lienali te akulengumuka nalio, nyi?”

¹⁶ Akwa kole je eswe kaanakulenye ni kukutala ni kubihilila. Kaanakunyekununa ku mivumbo ni kukuhetesa ngwo: “Mba hitwakulimuna! Lino lie tangwa te twakushimbwila!”

¹⁷ Mwene Zambi hamanununa chize anyongene kulinga: hatunongesa ni keke kama ka, ngwe chize atutowezele kushi. Hatayiza akwa kole kutukumba, heevwisa chiseke ha kulimbuka chetu.

¹⁸ Aa Yerusaleme, yipanga ye yikololoke kuli Mwene Zambi! Lundumiona masoji je ngwe njiji ufuku ni mwalwa; kanda ulitwamina kulila ni kunenganyana!

¹⁹ Ufuku weswe katwoka ni kulila kuli Mwene Zambi. Umulweze yuma yeswe yize yili mu mbunge ye hanga evwile kama ana je keke, Ana je waze anafu ni zala mu makano ja majila eswe!

²⁰ Mwene Zambi, achitala chize wakumwesa atu lamba! Mapwo kaakulia ana jo waze te akuzanga! Mahako ni akwa munanyi kaakwasukikila mwe mu zuwo lia Zambi kuli akwa kole!

²¹ Twanuke ni tushinakaji kaakufwila mu majila, akweze a malunga ni a mapwo kaakufwa ku mikwale ya akwa kole jo. Hiwaashiha ni keke kama ka ha tangwa lia ufwatulo we.

²² Walakenyene akwa kole jami ngwe ha tangwa lia chiwanyino anguvwise woma. Niumwe wahashile kama kuchina ha tangwa lia ufwatulo we. Haashiha ana jami, waze naalelele ni waze te nakuzanga.