Lungungu 1 - Mukanda Wa Zambi 1970

Yinyengo ya akwa Yerusaleme

¹ Kuchi mba Yerusaleme halela chichize, limbo lize liabwile ni atu abwahaze! Limbo lize te akusa vumbi kuli akwa hashi eswe, hiliabwa ngwe tuliwa; Limbo lilemu liahiana hilialumuka ngwe ndungo.

² Ufuku weswe te kakulila. Kakulundumuna masoji. Mukachi ka eswe waze abwile masepa jenyi, niumwe unamulembejeka kama wakuhi. Akwa kulivwa nenyi eswe yaamufwefweta, haalumuka akwa kole jenyi.

³ Ayuda haabwa ndungo, haayindama; akwa kole haachiza ni tachi ku mahio. Hikaali mu yifuchi ya yilambala, hikeeshi ni chifuchi cho ene, haajingilika kuli akwa kole, keeshi ni kuze maachinyina.

⁴ Majila kaakulila mumu niumwe uneza nawa ku zuwo lia Zambi ni kuwayila ha matangwa ja yiwanyino. Ana a mapwo kaanamono lamba, mahako kaanatu mikuma. Yikolo ya mu limbo hiyabwa yawashi, Zione kanayeke mbimbi.

⁵ Akwa kole jenyi haakumba; kaakumukwata ni tachi. Mwene Zambi hamumwesa lamba mumu ha milonga yenyi yinji; ana jenyi haatwala mu undungo.

⁶ Uhenya wa Yerusaleme hiwahwa. Akwa lutwe jenyi haabwa ngwe kai waze haalekumuka mumu ha zala, tachi jo hijahwa muze anachina mayanga.

⁷ Ha matangwa wano a lamba lienyi, Yerusaleme kanewuluka uhenya wenyi utangu. Muze aholokela mu moko ja akwa kole, kukwabwile ko niumwe wakumukwasa; waze amukumbile yaamuseha ha kulimbuka chenyi.

⁸ Vumbi lienyi hiliahwa, habwa uselesele; akwa kole haamulelesa. Kanatu mikuma, kanahetama ni sonyi. Yerusaleme halibihisa iye mwene ni milonga yinji.

⁹ Mahina jenyi haabiha mumu ha yibi yenyi, alioze kasolo kunyonga ha yize muyimuwana kulutwe. Kulimbuka chenyi chabwa chikalu; niumwe kahashile ko kumulembejeka. Kanalembe ngwenyi; “Mwene Zambi, tala kama lamba liami, tala chize akwa kole jami haangukumba.”

¹⁰ Akwa kole jenyi yaamwiya ubite weswe; Yerusaleme yaamona chize anjilile mu zuwo lia kuwayila muze te Mwene Zambi hanakanjisa mavungu akwo kunjila mo.

¹¹ Atu jenyi kaanatu mikuma muze anafupu yakulia; kaanasumbakenya ubite ulemu ni yakulia hanga keechi kufwa. Limbo linalili ngwenyi: “Mwene Zambi, ngutale kama, ngutale kama mu lamba liami.”

¹² Kanakololoka kuli mweswawo wakubalieka ko ngwenyi: “Ngutale kama nyi umwe mutu uliko yoze unamono lamba ngwe yami, lamba lize Mwene Zambi hanguzukwila ha matangwa ja ufwatulo wenyi.

¹³ “Hangutumina kahia ka mwilu, kahia kaze kanangwocho mu mbunge. Hangutela muheto, hinafwa mo. Mba hangwehuka, hanguhichika mu lamba liahiana.

¹⁴ “Milonga yami yeswe hayisa chinyingi, hayikashila hamuwika; hayizezeleka ha kota yami, kashika hinahuhuka. Mwene Zambi hangukunjika kuli akwa kole jami, hinalekumuka ha kulimika no.

¹⁵ “Mwene Zambi halelesa tujita twami a tachi; Hatuma mbunga ya tujita onone akweze jami. Hafwenya atu jami ngwe chize akukama vinyu.

¹⁶ “Kashika meso jami anazala ni masoji. Niumwe Unahase kungulembejeka; niumwe wakuhi Unahase kungutakamisa. Akwa kole haangukumba; atu jami keeshi nawa ni yuma.

¹⁷ “Yinguzoza moko jami, alioze niumwe kangukwashile ko. Mwene Zambi yatambika akwa kole ahamike ni yami sali ni sali; kaanangumono ngwe chimwe Chuma cha majilo.

¹⁸ “Mwene Zambi halinga ni ululi mumu yami namukolemene. Yenu mavungu eswe, ngubanjikenu; talenu kama lamba lize nguli nalio. Akweze jami a malunga ni a mapwo haatwala mu undungo.

¹⁹ “Yingutambika waze akulivwa ni yami, alioze yaalituna kungukwasa. Mahako ni miata yaafwafwa mu majila a limbo, muze te anafupu yakulia.

²⁰ “Mwene Zambi, tala kama lamba liami, ni kubihilila chami! Ngunevu yinyengo yinji mumu ha milonga yami. Kaakushiha atu jami mu majila; chibwe mu mazuwo kaanafu.

²¹ “Banjikenu mikuma yami; niumwe unangulembejeka kama. Akwa kole jami kaanawahilila mumu ha lamba lize unangumwesa. Neha tangwa lize walakenyene; mwesa akwa kole jami lamba, lamba ngwe chize ngunalimono yami.

²² “Abatwile kama mumu ha ungulungulu wo weswe; amwese lamba ngwe chize hiunangumwesa yami lamba mumu ha milonga yami. Ngunatu mikuma ya lamba liami, ngunevu kusasaminya mu mbunge.”