Luka 8 - Mukanda Wa Zambi 1970

Mapwo waze akwashile Yesu

¹ Kulutwe lia matangwa amwe, Yesu yabalika mu membo ni mu yihunda nikwambujola Sango Jibema ja wanangana wa Zambi. Tumbaji kumi ni aali yaaya hamwe nenyi,

² ni amwe mapwo waze awukile ku mwiku wa luchisa ni ku misongo. Majina jo wano: Maria (yoze te akuvuluka ngwo, Kamandala), muli yoze atuhwishile mwiku wa luchisa shimbiali;

³ ni Joana, pwo lia kafufuchi ka Herode; ni Suzana; ni mapwo anji akwo waze akwashile Yesu ni tumbaji twenyi ni yikumba yo.

Chishima cha chikuwa

⁴ Atu a ku limbo ni limbo yeezaza kuli Yesu. Mbunga yinene yaamukunguluka. Neye yaatela chishima chino ngwenyi:

⁵ “Umwe mutu watuhukile ni kukuwa mbuto. Muze akuwile mbuto mu munda wenyi yikwo yiiholokela ku sesa lia jila. Atu yaayiliata, ni tujila yaayilia.

⁶ Yikwo yiiholokela ha mavu a mawe. Muze hiyasoka yiyuma chau, mumu kuyabwile ko ni meya.

⁷ Yikwo yiiholokela mukachi ka mingonga. Ye mingonga yiitatuka hamwe ni mbuto yibema, yiikeketesa yibuta yize.

⁸ Alioze mbuto yikwo yiiholokela ha mavu abema, yiisoka, yiiyima mihuko kulakaji ja mbuto.” Yesu yaweza ho ngwenyi: “Banjikenu kanawa, nyi nuli ni matwi!”

Chikuma chize atelele yishima

⁹ Tumbaji twenyi yaamuhula ulumbunwisa wa chishima chize.

¹⁰ Neye ngwenyi: “Yenu hananwehe cho kunyingika yijimbikilo ya Wanangana wa Zambi. Alioze akwo kaakuyitambula ni yishima, hanga ngwo: ‘Maakatala kutala, hindu keechi kumona. Maakatala kubanjika, hindu keechi kunyingika.’ ”

Yesu yalumbununa chishima cha chikuwa

¹¹ “Uno we ulumbunwiso wa chishima ngwami, mbuto, lie liji lia Zambi.

¹² Atu akwo kaalifwa ngwe sesa lia jila, kuze kwakuholokela ye mbuto. Alioze Sakwonga, kakwiza ni kuchiza liji mu mbunge jo ha kwakinda kufuliela, hanga Zambi kechi kaalamwina.

¹³ Akwo kaalifwa ngwe mavu a ha mawe kuze kwakuholokela mbuto. Kaakwivwa liji lia Zambi, ni kaakulitambula ni uwahililo. Hindu lie liji kulishi miji muli ayo. Enoo akufuliela ha shimbu likepe, alioze muze yeseko yakwiza, kaakutalinga.

¹⁴ Akwo akutambula mbuto mukachi ka mingonga. Kaalifwa ni waze akwivwa liji lia Zambi, alioze yibikalo, ni upichi, ni kuwaha cha mwono wa hashi kuyakwakumba, keeshi kwima mihuko yingunu.

¹⁵ Atu akwo akutambula mbuto ha mavu abema. Enoo akwivwa liji lia Zambi, ni akulifunga mu mbunge jibema ja kushishika. Kaakunyongonona nikwima mihuko.

Chishima cha ndeya

¹⁶ “Niumwe, muze hawika ndeya, mayisa kushi lia kapaya hanji kushi lia muhela. Shinoho mayisa ha chikwachilo cha ndeya hanga eswe waze maanjila amone pangu.

¹⁷ Chize cheswe chaswamine muchikasoloka, ni chize cheswe chakuhengeka maakachisolola mu Pangu.

¹⁸ “Kanyamenu ha chize nwakwivwa, mumu yoze ukwete, makamuwezela yikwo, alioze yoze keshi nacho, makamuchiza chibwe chize chikepe ananyongo ngwenyi, kali nacho.”

Naye ni anakwo ja Yesu

¹⁹ Anakwo ni naye te kaaneza kuli Yesu, alioze kaahashile kumuheta mumu ha mbunga.

²⁰ Yaachambulwila Yesu: “Ngwowe, noko ni anakwenu kaanamana haze. Kaanazange kukumona.”

²¹ Alioze Yesu yaakumbulula ngwenyi: “Mama ni anakwetu wano akwivwa maliji a Zambi nikwononokena.”

Yesu yaholesa kangonga wa tachi

²² Limwe tangwa Yesu yanjila mu wato hamwe ni tumbaji twenyi, yaamba ngwenyi: “Tuzaukenu, tuye musali lia chitende.” No yaya.

²³ Muze te anazauka, Yesu yaya mu tulo. Susumuku kangonga wa tachi yabinjisa chitende, wato yiuzala ni meya, tumbaji yaabwa mu utoji.

²⁴ Mba yaamukundama, yaamulawisa, ngwo: “Mwene, Mwene, tunafu!” Yesu yalaula, yakanjisa kangonga ni kufuza cha meya, neyo yiihola lume kuluu!

²⁵ Yesu yahula tumbaji ngwenyi: “Ulihi ufulielo wenu?” Alioze ayo yeevwa woma, yaalishimwoka kuhiana, yaalihanjekesa ngwo: “Awu mwene iya? Mambila chibwe fuji ni meya, neyo muyimwononokena!”

Yesu yawuka mukwa mwiku wa luchisa

²⁶ Yaaheta ku chifuchi cha Gadara, musali talanganyi ni chifuchi cha Galilea.

²⁷ Muze Yesu haheta ku tunda, mutu wa mu limbo yatakana nenyi, te mwiku wa luchisa akwete. Miaka yinji te keshi kuzala mahina ni keshi kutwama mu zuwo, alioze mu yivwenge ya mafuka.

²⁸ Muze hamona Yesu, yakololoka, yafulamana ku meso jenyi, yamba ni liji linene ngwenyi: “Kuchi yena ni yami, Yesu, Mwana wa Zambi Mwilu Mwahiana? Ngunakulembe kanda ungubinjisa kama!”

²⁹ Yamba chino mumu Yesu hambila mwiku wa luchisa atuhuke muli iye. Mwiku uno te wakumubinjisa yisuho yinji. Atu yaamukasakasa moko ni molu ni ngoji ja utale ha kumufunga. Alioze yajibatwola, ni mwiku yiumutwalatwala kuma ku puya.

³⁰ Yesu yamuhula ngwenyi: “Jina lie, yena iya?” Yiumukumbulula ngwenyi: “Jina liami: ‘Anji’.” Yachamba mumu mwiku unji wa luchisa wamunjilile.

³¹ Mwiku uno yiulembejeka Yesu ngwo, kanda autuma muma mwa njotoka.

³² Kwabwile chendo chinene cha ngulu hehi ha mulundu, te kaanali. Mwiku wa luchisa yiulembejeka Yesu hanga watayize kunjila muli ngulu. Yesu yautayiza.

³³ Mba mwiku wa luchisa yiutuhuka muli mutu, yiunjila muli ngulu. Chendo cheswe yaalundumuka ha mulundu, yaanjila mu chitende, yaafwa.

³⁴ Muze tufunga twa ngulu haachimona, yaachina, yaamwanga sango jize mu limbo ni ku minda.

³⁵ Atu yaatuhuka ni kutala chize chabwile, yaaheta kuli Yesu, yaamona mutu muli yoze mwatuhukile mwiku wa luchisa, kanatwama ku molu ja Yesu, hazala mahina, habwa ni manyonga a utu, mba atu yeevwa woma.

³⁶ Waze amwene yeswe yaalumbunwina chize mukwa mwiku wa luchisa ahindukile.

³⁷ Hohene mbunga ya mu chifuchi cha Agadara yaambila Yesu akatuke ku chifuchi cho, mumu evwile woma unji. Kashika Yesu yanjila mu wato hanga aye.

³⁸ Lunga, muli yoze mwatuhukile mwiku wa luchisa, yaliumba kuli Yesu hanga abwe hamwe nenyi. Alioze Yesu yamushika ngwenyi:

³⁹ “Hiluka ku mahie. Wambujole yize yeswe Zambi hakulingila.” Mwe lunga yaya kwenyi, yambujola mu limbo heswe yize amulingilile Yesu.

Mwana wa Jairu ni pwo yoze wakwachile ku hina lia Yesu

⁴⁰ Muze Yesu hazauka nawa musali lia chitende, mbunga yaamusambilila mumu te kaanamushimbwila.

⁴¹ Mba umwe lunga jina lienyi Jairu, yaheta. Te mukwa kuyula zuwo lia kuwayila lia Ayuda. Yafulamana ku molu ja Yesu, yaliumba hanga eze ku mahienyi,

⁴² mumu te kali lume ni mwana umuwika wa pwo wa miaka kumi ni yaali, te kanahuzu. Shimbu Yesu ayile, mbunga yaamushinjeka sali ni sali.

⁴³ Umwe pwo wabwile mo yoze te ukwete musongo wa kuhita manyinga miaka kumi ni yaali. Yahwisa ubite wenyi weswe kuli mbuki, hindu kenu, kaahashile kumuwuka.

⁴⁴ Yakundama kunyima lia Yesu, yakwata ku songo lia hina lienyi. Hazehene kuhita cha manyinga jenyi yichibatuka.

⁴⁵ Yesu yahula ngwenyi: “Iya wangukwata?” Eswe yaalikala. Petulu yamba ngwenyi: “Mwata, mbunga kaanakujingilika, kaanakushinjeka sali ni sali.”

⁴⁶ Alioze Yesu yamba ngwenyi: “Umwe wangukwata, mumu hinevwa ndundo jatuhuka muli yami.”

⁴⁷ Muze pwo hamona ngwenyi, kaswamine, yeza nikuchikima, yafulamana ku meso ja Yesu, yamwambulwila ku meso ja atu eswe chikuma chize amukwachile ku hina ni chize ahindukile ha shimbu lizeliene.

⁴⁸ Yesu yamwamba ngwenyi: “Mwanami, ufulielo we hiwakuwuka, yako kwe ni uhwimino.”

⁴⁹ Shimbu te Yesu machihanjika, umwe kanganda wa ku zuwo lia mukwa kuyula yeza nikwamba ngwenyi: “Mwane hafwa. Kanda uketeka nawa longeshi.”

⁵⁰ Alioze muze hevwa liji lize, Yesu yambila Jairu ngwenyi: “Kanda wivwa woma. Fuliela lume, mba makahinduka.”

⁵¹ Muze haheta ku zuwo, katayijile mutu niumwe kunjila hamwe nenyi, shina Petulu, ni Yoano, ni Tiangu (Jake), ni tato ni naye ya mwana pwo.

⁵² Atu eswe te kaanalili ni kulinyachinga ha chikuma cha mwana. Yesu yamba ngwenyi: “Kanda nulila. Kafwile ko, alioze mu tulo ali.”

⁵³ No yaamuseha, mumu anyingikine ngwo, hafwa kulu.

⁵⁴ Alioze Yesu yamukwata ku kwoko, yahanjika ni liji linene ngwenyi: “Mwana, hinduka!”

⁵⁵ Mwiku wenyi yiuhiluka, hazehene yakatuka. Yesu yaamba amwehe yakulia.

⁵⁶ Yisemi jenyi yaalishimwoka kuhiana, alioze Yesu yaaha koki ngwenyi: “Kanda nwambulwila niumwe.”