Luka 6 - Mukanda Wa Zambi 1970

Chihula hakutwala ku tangwa lia kuhwima

¹ Ha limwe tangwa lia kuhwima, Yesu yabalikila mu minda ya tiriku. Tumbaji twenyi yaabutuka kumakuna mitwe ya tiriku, yaayilakumwona mu moko jo, yaahaha.

² Amwe Afariseu yaahula ngwo: “Kuchi kevwe nunalingi ha tangwa ha kuhwima chize kuchalitele ni Shimbi jetu?”

³ Yesu ngwenyi: “Kunwatangile chize alingile mwanangana David iye mwene ni atu jenyi muze evwile zala, nyi?

⁴ Yanjila mu zuwo lia Zambi, yanda mbolo ja kutumbieka ku meso ja Zambi, yaha, yaha nawa atu jenyi. Alioze Shimbi jetu kujishi kutayiza shina mahako a Zambi wika kujilia.”

⁵ Yesu yawezaho ngwenyi: “Yami Mwana Mutu nguli Mwene wa tangwa ha kuhwima.”

Mukwa kwoko liasosewa

⁶ Ha limwe tangwa likwo ha kuhwima, Yesu yanjila mu limwe zuwo ha kuwayila, yabutuka kulongesa. Yimubwa umwe mutu, kwoko lienyi ha chindume te kuliasosewa.

⁷ Alongeshi a Shimbi ni Afariseu yaalayila Yesu nyi mawuka umwe ha tangwa ha kuhwima, mumu afupile chitela cha kumusumina nacho mulonga.

⁸ Alioze Yesu yanyingika manyonga jo, yambila mukwa kwoko liasosewa ngwenyi: “Katuka, umane mukachi ka atu eswe.” Neye yakatuka, yamana mukachi.

⁹ Mba Yesu yaahula ngwenyi: “Ngunanuhula ngwami: Shimbi jetu kuchi jinatayiza kulinga ha tangwa ha kuhwima? Kulinga yibema hanji kulinga yibi? Kulamwina mutu hanji kumwonona?”

¹⁰ Yaatala eswe nee. Mba yambila mwe mutu ngwenyi: “Olola kwoko lie.” Neye yaliolola, hazehene yilibwa nawa lingunu.

¹¹ Alioze ayo yeevwa ufwatulo, yaabutuka kufupa mana hakachi ko chize maahasa kulinga Yesu.

Yesu yatongola tunganda kumi ni aali

¹² Ha matangwa waze Yesu yakanduka ha mulundu mu kulemba, yahwishila ko ufuku weswe ni kulemba Zambi.

¹³ Muze hikwacha, yatambika tumbaji twenyi, yatongola kumi ni aali mukachi ko, yaaluka ngwenyi: “Tunganda.”

¹⁴ Majina jo wano: Simone (yoze Yesu yamuluka jina likwo, Petulu), ni mwanakwo Andre, ni Tiangu (Jake,) ni Yoano, ni Filipe ni Bartolomeu,

¹⁵ ni Mateu, ni Tomase, ni Tiangu (Jake) mwana wa Alfeu, ni Simone (mukwa kuzanga utuswilo wa chifuchi),

¹⁶ ni Yudase mwana wa Tiangu (Jake), ni Yudase Kakeriote, yoze wakunjikile Yesu kuli akwa kole jenyi.

Yesu yalongesa mbunga, yawuka mieji

¹⁷ Yesu yapalumuka ha mulundu hamwe no. Yamana hamwe homa hasalama, haze habwile mbunga yinene ya tumbaji twenyi. Yihabwa nawa mbunga Yinene ya atu a mu chifuchi cheswe cha Yudea, ni a mu Yerusaleme, ni a mu membo ja Tiru ni Sidone, ku mbumbulu ya kalunga lwiji.

¹⁸ Yeezaza ha kumwivwa ni hanga awuke ku misongo yo. Waze abinjishile kuli mwiku wa luchisa yaahindwoka.

¹⁹ Atu eswe yaazanga kumukwata mumu ndundo yijimutuhwoka, yijiwuka eswe.

Yiwape ni lamba

²⁰ Yesu yatala tumbaji twenyi nee, yaamba ngwenyi: “Kunwawaha yenu yiswale, mumu Wanangana wa Zambi niwenu!

²¹ “Kunwawaha yenu nwakwivwa zala haliabwila, mumu munukakuta! “Kunwawaha yenu nwakulila haliabwila, mumu munukaseha!

²² “Yenu kunwawaha muze atu maanuvutwokela, muze maanulituna, muze maanuchoka, muze maanulelesa ngwe nuli abi, mumu hali yami Mwana Mutu.

²³ Wahililenu muze yize yeswe muyikanuwana. Tumbwokenu ni uwahililo, mumu chawana chinene chinanutwaminyina mwilu. Mumu Chenacho tushakulu two ahungumionene akwa munanyi a Zambi.

²⁴ “Alioze lamba lienu yenu pichi, mumu hinunawaha kulu.

²⁵ “Lamba lienu yenu nwakukula haliabwila, mumu munukevwa zala! “Lamba lienu yenu nwakuseha haliabwila, mumu munukanenganyana, munukalila!

²⁶ “Lamba lienu muze atu eswe maanuchichimieka, mumu Chenacho tushakulu two achichimiekene akwa munanyi a mahuza.”

Zangenu akwa kole

²⁷ “Alioze yenu nwakungwivwa, ngunanwambe ngwami: zangenu akwa kole jenu, lingilenu yibema waze akunuvutwokela,

²⁸ wahisenu waze akunushinga, lembelenu waze akunuhungumiona.

²⁹ Nyi umwe makulamba ha tafu, mutewulwile nawa likwo. Nyi umwe makwanda mbinja ye (kazaku ke) mwechele nawa chikuto che.

³⁰ Hanenu kuli waze maanwita chimwe Chuma. Nyi umwe wakwanda Chuma che, kanda umuhula cho nawa.

³¹ Lingilenu akwo chize nunazange ayo anulingile.

³² “Nyi nwakuzanga lume waze akunuzanga, chawana chika nwakusa mbunge ha kutambula? Chibwe yivulumunyi kaakuzanga waze akwazanga!

³³ Nyi nwakulingila yibema shina waze akunulingila yibema, chawana chika nwakusa mbunge ha kutambula? Chibwe yivulumunyi no kaakulinga chizechene!

³⁴ Nyi nwakusondamisa shina waze nunase mbunge ha kunuhilwishila chawana, chika munukatambula? Chibwe yivulumunyi no kaakulilingila chizechene hanga akaahilwishile!

³⁵ Shinoho zangenu akwa kole jenu, alingilenu yibema, asondamisenu, hi kusa ko mbunge ha kunuhilwishila yo. Munukatambula chawana chinene. Munukabwa ana ja Zambi ya Mwilu Mwahiana, mumu kakulweza akwa kaleleso ni yingulungulu utu.

³⁶ Bwenu akwa keke ngwe chize abwa Tatenu.”

Kanda nuhisa akwenu

³⁷ “Kanda nubatwila akwenu, Zambi neye kechi kanubatwila. Kanda nuhisa akwenu, Zambi neye kechi kanuhisa. Konekenenu akwenu, Zambi neye makanukonekena.

³⁸ Ahenu akwenu, Zambi neye makanwaha: njongo yibema, yakukona, yakunyikumuna hamwe, yakusupwoke mu yikashi yenu. Mumu ni cheseko chize nwakwesekela nacho, che Zambi neye makanwesekela.”

³⁹ Yesu yaatela nawa chishima ngwenyi: “Kapuputa mahasa kusongwela kapuputa mukwo, nyi? Nyi machilinga, eswe aali keechi kuholokela mu wina nyi?

⁴⁰ Kambaji keshi kuhiana longeshi yenyi. Alioze kambaji mweswe, muze halilongesa, mabwa ngwe longeshi yenyi.

⁴¹ Kuchi unatale kachiba kaze kali mu liso lia mukwenu, alioze kuushi kwalula mukambo uze uli mu liso lie?

⁴² Ngwe kuchi muuhasa kwambila mukwenu ngwe: ‘Mukwetu, ngutayize nguchize kachiba mu liso lie,’ alioze kuushi kumona mukambo uze uli mu liso lia yena mwene? Chilembekese! Hatangu chiza mukambo uze uli mu liso lie, mba muumona zwalala ha kuchiza kachiba mu liso lia mukwenu.”

Mutondo ni mihuko yawo

⁴³ “Mutondo Ubema kuushi kwima mihuko yibi, ni mutondo ubi kuushi kwima mihuko yibema.

⁴⁴ Mutondo weswe kanaunyingika ku mihuko yawo. Atu keeshi kuhela makuyu ku yibuta ya mingonga, keeshi kuhela uvwa ku mikalale.

⁴⁵ Mutu mubema kakutuhwisa yuma yibema mu mbunge yenyi yibema. Mutu mubi kakutuhwisa yuma yibi mu mbunge yenyi yibi. Mumu kanwa lia mutu mulihanjika yize yinalumbama mu mbunge.”

Tungi aali

⁴⁶ “Kuchi kevwe nwakunguvuluka ngwenu: ‘Mwene, Mwene,’ alioze kunushi kulinga yuma yize ngunanwambe?

⁴⁷ Yoze meza kuli yami, ni mevwa maliji jami, ni maalinga, mungunulweza yoze alifwa nenyi.

⁴⁸ Kalifwa ni mutu yoze watungile zuwo. Yafula Chipinji chisuku, yasa fundamentu ha liwe. Muze mihuji yejile, yilundumukina ha zuwo lize, kuyahashile kulinyikisa mumu yalitunga kanawa.

⁴⁹ Yoze Unevu maliji jami, alioze keshi kwalinga, kalifwa ni mutu yoze watungile zuwo lienyi ha mavu amokomoko, kulishi fundamentu. Muze mihuji yejile, yilundumukina ha zuwo lize, mba yilibuzuka. Kubuzuka chalio yichibwa chinene!”