Luka 5 - Mukanda Wa Zambi 1970

Yesu yatambika tumbaji atangu

¹ Limwe tangwa Yesu yamana ku mbumbulu ya chitende cha Genezare mbunga yaamukunguluka mu kwivwa maliji a Zambi.

² Yesu yamona mato aali ku mbumbulu ya chitende. Akwa kutela yishi te haatuhuka mo, te kaanakoso manda jo.

³ Yesu yanjila mu wato uze te wa Simone, yaliumba kuli iye asosoloke ku mbumbulu. Yesu yatwama mu wato nikulongesa e mbunga.

⁴ Muze hamanununa kuhanjika, yambila Simone ngwenyi: “Shinjika wato haze hasuku, mba yena ni masepa je sunwisenu manda jenu nukwate yishi.”

⁵ Simone ngwenyi; “Mwata, twahondangananga ufuku weswe, kutwakwachile nichimwe. Alioze ha liji lie mungusunwisa manda.”

⁶ Yaasunwisa, yaakwata yishi anji, mba manda jo yabutuka kutanwoka.

⁷ Yaatekula masepa jo waze abwile mu wato ukwo hanga eze aakwase. No yeeza, yaazalisa mato aali ni yishi, e mato yaabutuka kushimbama.

⁸ Ha kuchimona, Simone Petulu yafulamana ku molu ja Yesu nikwamba ngwenyi; “Mwene ngukatuke mumu nguli Chivulumunyi!”

⁹ Yalishimwoka, ni waze eswe abwile nenyi, mumu ha yishi anji waze akwachile.

¹⁰ Chimuwika nawa, masepa ja Simone, Tiangu (Jake) ni Yoano, ana a Zebedeu a malunga. Alioze Yesu yambila Simone ngwenyi: “Kanda wivwa woma, chize ku haliabwila muukatela atu.”

¹¹ Mba yaaneha mato jo ku mbumbulu, yaahichika yeswe, yaakaula Yesu.

Yesu yabemesa mukwa mbumba

¹² Muze Yesu abwile mu limwe limbo, kuma yimubwa umwe mutu wange ni musongo wa mbumba. Ha kumona Yesu, yafulamana ku molu jenyi, yaliumba ngwenyi: “Mwene nyi unazange muuhasa kama kungubemesa!”

¹³ Yesu yolola kwoko, yamukwata nikwamba ngwenyi: “Ngunazange, bwako mubema!” Hazehene misongo yiimuhwa.

¹⁴ Yesu yamwaha koki ngwenyi: “Kanda ukambulwila niumwe. Alioze yako ukalilweze kuli hako wa Zambi. Mba ukalambule mulambu uze ambile Mose wa kulweza eswe ngwe, hiwabema.”

¹⁵ Alioze lufuma wa Yesu yamwangana kuhiana, mbunga ya mieji yaamukunguluka ni kumwivwa ni hanga awuke misongo yo.

¹⁶ Alioze Yesu yayaya ukawenyi kuze te akulembela.

Yesu yawuka mukwa kalepa

¹⁷ Limwe tangwa Yesu yabutuka kulongesa. Afariseu ni alongeshi a Shimbi yaatwama ko. Yaakatwoka ku membo eswe a mu Galilea, ni a mu Yudea, ni ku Yerusaleme. Ndundo ja Mwene Zambi yijimukwasa kuwuka mieji.

¹⁸ Kuma amwe malunga yaamunehena mukwa kalepa, te kanabombo ha muhela. Yaazanga kumunjisa mu zuwo ni kumutumbika ku meso ja Yesu.

¹⁹ Alioze kaahashile kumunjisa mumu ha kwoka cha mbunga. Mba yaanyina ha fulumba, yaalokola ho chitutulu, yaamusunwishina ha muhela wenyi mukachi ka mbunga ku meso ja Yesu.

²⁰ Ha kumona ufulielo wo, Yesu yambila mukwa kalepa ngwenyi: “Mukwetu, milonga ye hiyakonekenewa.”

²¹ Alongeshi a Shimbi ni Afariseu yaabutuka kunyonga ngwo: “Iya mutu yono unasaula Zambi? Iya mahasa kukonekena milonga? Zambi wika mwe mahasa.”

²² Yesu yanyingika manyonga jo, yaahula ngwenyi: “Kuchi kevwe nuli ni manyonga wano?

²³ Chashi chika, shina kwamba ngwami: ‘Milonga ye hiyakonekenewa,’ hanji kwamba ngwami: ‘Katuka, wende’?

²⁴ Alioze ngunazange nunyingike ngwenu, Mwana Mutu, chiyulo akwete hano hashi cha kukonekena milonga.” Mba yambila mukwa kalepa ngwenyi: “Ngunakwambe ngwami: Katuka, anda muhela we, yako ku mahie!”

²⁵ Hazehene mwe mutu yakatuka ku meso ja atu eswe, yanda muhela uze te abomba, yaya ku mahienyi nikuchichimieka Zambi.

²⁶ Eswe yaalishimwoka kuhiana, yeevwa woma unji, yaachichimieka Zambi nikwamba ngwo: “Musono hitwamona yipupu!”

Yesu yatambika Levi

²⁷ Mabwamuze Yesu yatuhuka yamona umwe mukwa kulambwisa lijimu, jina lienyi Levi te kanatwama mu zuwo lia kulambwishila lijimu. Yamwamba ngwenyi: “Ngukaule.”

²⁸ Levi yakatuka, yahichika yeswe, yamukaula.

²⁹ Hohene Levi yamulingila chiteleka chinene mu zuwo lienyi. Yimubwa mbunga yinene ya akwa kulambwisa lijimu ni atu akwo ku mesa hamwe no.

³⁰ Afariseu ni alongeshi a Shimbi a ku mbunga yo yaalinyenyeta hali tumbaji twa Yesu ngwo; “Kuchi kevwe nunali ni nunanu hamwe ni akwa kulambwisa lijimu ni akwa lufuma mubi?”

³¹ Yesu yaakumbulula ngwenyi: “Ahinduka keeshi kufupa mbuki, alioze shina waze akuyiza enoo akumufupa.

³² Chejile mu kutambika akwa ululi, alioze akwa lufuma mubi, hanga alumuke ku mbunge.”

Chihula hakutwala ku kulitwamina kulia

³³ Amwe atu yaambila Yesu ngwo: “Yisuho yinji tumbaji twa Yoano akulitwamina kulia mu kuwayila Zambi. Chimuwika nawa ni tumbaji twa Afariseu. Alioze tumbaji twe kaakulialia ni kaakunwanwa.”

³⁴ Yesu ngwenyi: “Nunanyongo kwambila masepa ja sandungi kulitwamina kulia shimbu sandungi achili hamwe no, nyi? Ka!

³⁵ Alioze tangwa mulikeza muze maakachiza sandungi, mba maakalitwamina kulia.”

³⁶ Yesu yaatela nawa chishima chino ngwenyi: “Mutu niumwe matanuna chando cha hina liaha ni kuchinuka ha hina likulu. Mumu, nyi machilinga, hina likulu mulitanuka, ni chando cha hina liaha kuchichi kulita ni chikulu.

³⁷ Niumwe malonga vinyu yaha mu tuku jikulu ja malambu. Mumu, nyi machilinga, vinyu yaha muyimengununa tuku, nejo mujifwa, ni vinyu muyimwangana.

³⁸ Hi chocho ko, chatamba kulonga vinyu yaha mu tuku jaha!

³⁹ Niumwe mazanga kunwa vinyu yaha ni hanwa kulu yikulu. Mumu mamba ngwenyi: ‘Yikulu shinoho.’ ”