Luka 4 - Mukanda Wa Zambi 1970

Sakwonga yeseka Yesu hanga amuvulumwise

¹ Yesu nikuzala ni Mwiku wa Linanga, yakatuka ku Yordau, yahiluka. Mba Mwiku wa Linanga, yiumutwala mu puya.

² Kwenako Sakwonga yamweseka matangwa makumi awana. Yesu kalile nichimwe. Kashika muze matangwa waze haabalika, Yesu yevwa zala.

³ Mba Sakwonga yamwamba ngwenyi: “Nyi mwe Mwana Zambi yena, amba liwe lino lialumuke mbolo.”

⁴ Yesu ngwenyi: “Hichinasonewa mu Mukanda wa Zambi ngwo: ‘Mutu kahashile kubwa ni mwono ku mbolo wika.’ ”

⁵ Mba Sakwonga yamutwala helu kuhiana, yamulweza, ha shimbu likepe, mawanangana eswe a hashi.

⁶ Yamwamba ngwenyi: “Mungukwaha chiyulo chino cheswe ni upichi wa mawanangana wano. Yize yeswe hanangukunjika yo ngunahase kuyihana kuli yoze ngunazange.

⁷ Nyi muuzondama ha makungunwa unguwayile, ayize muyibwa niye.”

⁸ Yesu ngwenyi: “Hichinasonewa mu Mukanda wa Zambi ngwo: ‘Ukawayile Mwene Zambi ye, ukamulingile iye wika!’ ”

⁹ Sakwonga yamutwala ku Yerusaleme, yamutumbika ha kasonga ka zuwo lia Zambi lia Ayuda, nikwamba ngwenyi: “Nyi mwe Mwana Zambi yena, liechelele, uholoke hashi,

¹⁰ mumu hichinasonewa mu Mukanda wa Zambi ngwo: ‘Zambi makambila tunganda twenyi a mwilu ha kukufunga.’

¹¹ Nawa ngwo: ‘Maakakuzundula ha moko jo, hanga kuuchi kuhukana ku liwe.’ ”

¹² Yesu ngwenyi: “Mukanda wa Zambi unambe ngwo: ‘Kanda ukeseka Mwene Zambi ye.’ ”

¹³ Muze Sakwonga hamanununa kweseka Yesu mu yuma yeswe, yamukatuka ndoo ku tangwa likwo.

Yesu yabutuka milimo yenyi

¹⁴ Yesu yahiluka ku chifuchi cha Galilea, ni ndundo ja Mwiku wa Linanga. Lufuma wenyi yafumana mu chifuchi chize cheswe.

¹⁵ Yalongesa mu mazuwo jo a kuwayila. Atu eswe yaamuchichimieka.

Akwa Nazare yaalituna Yesu

¹⁶ Yesu yahiluka ku Nazare kuze akolelele. Ha tangwa lia kuhwima yanjila mu zuwo lia kuwayila lia Ayuda nikulita ni ndako yenyi. Yakatuka atange Mukanda wa Zambi.

¹⁷ No yaamwaha mukanda wa mukwa munanyi wa Zambi, Izaya. Neye yavungulula chivungo cha mukanda uze, yawana muma muze mwasonewene ngwo:

¹⁸ “Mwiku wa Mwene Zambi uli muli yami. Hananguwayisa mu kwambujolela yiswale Sango Jipema, hanangutumu mu kunyingikisa utuswilo kuli funge, mu kulawisa meso ja tupuputa, mu kutusula waze akumona lamba,

¹⁹ mu kunyingikisa mwaka wa utu wa Mwene Zambi!”

²⁰ Mba Yesu yavunga mukanda, yauhilwisa kuli kavumbi, yatwama. Eswe waze te anatwama mu zuwo lia kuwayila yaamuhulikila meso.

²¹ Neye yabutuka kwaambila ngwenyi: “Chisoneko chino cha mu Mukanda wa Zambi, musono hichamanunuka, ha shimbu linoliene hinwachivwa.”

²² Eswe yaashindakenya, yaalishimwoka ha maliji abema waze ahanjekele, yaahula ngwo: “Awu hi mwana wa Josefe ko, nyi?”

²³ Yesu ngwenyi: “Chamwenemwene munungutela chishima chino ngwenu: ‘Mbuki, liwuke yena mwene.’ Munungwamba nawa ngwenu: ‘Linga nawa chizechene kuno ku limbo lie chize twevwile ngwo, walingile ku Kafarnaume.’ ”

²⁴ Yesu yaweza ho ngwenyi: “Chamwenemwene ngwami, mukwa munanyi niumwe akutambula mu limbo lienyi mwene.

²⁵ Ngunanwambulwila ni umwenemwene ngwami, mapwo anji waze te haanafwisa malunga, abwile mu Israele ha matangwa ja Eliya muze vula kanokene ko miaka yitatu ni Chipinji. Zala yinji yabwile mu chifuchi cheswe.

²⁶ Alioze Zambi katumine ko Eliya kuli niumwe wa kuli ayo shina lume kuli twamishi wa pwo wa maha Sarepta ku kanda ya Sidone.

²⁷ Mu Israele yimubwa nawa akwa mbumba anji ha mwaka wa mukwa munanyi wa Zambi, Elisha. Alioze niumwe wa kuli ayo wabemene shina Namane, Kasiria.”

²⁸ Ha kwivwa maliji wano, eswe mu zuwo lia kuwayila yeevwa ufwatulo,

²⁹ yaakatuka, yaamumbila haze lia limbo, yaamutwala ha mungilingili wa mulundu haze atungilile lie limbo, hanga akamuniase ho.

³⁰ Alioze yasewunuka ko, yaya kwenyi.

Yesu yatuhwisa mwiku wa luchisa

³¹ Yesu yaya ku Kafarnaume, limbo lia mu Galilea. Kwenako alongeselele atu ha tangwa lia kuhwima.

³² No yaalishimwoka kuhiana ha longeso lienyi, mumu te kakulongesa ni chiyulo.

³³ Mu zuwo lia kuwayila yimubwa mutu wa mwiku ubi wa luchisa. Yakololoka kuhiana ngwenyi:

³⁴ “Aa! Kuchi yetu ni yena, Yesu Kanazare? Hiuneza mu kutwonona, nyi? Ngunakunyingika kanawa, mwe munangi yoze atumine Zambi!”

³⁵ Yesu yakalukila mwiku wa luchisa ngwenyi: “Haa! Hola, tuhuka muli mutu yono!” Mwiku yiulimbwisa mwe mutu hashi ku meso ja eswe, yiumutuhuka; kuwamulemekene ko nichimwe.

³⁶ Atu eswe yaalishimwoka kuhiana, yaalihula ngwo: “Lino liji lika? Mutu yono kakwamba ni chiyulo ni ndundo kuli mwiku wa luchisa, newo muutuhuka!”

³⁷ Lufuma wa Yesu yafumana kweswe mu chifuchi chize.

Yesu yawuka mieji anji

³⁸ Yesu yakatuka mu zuwo lia kuwayila, yanjila mu zuwo lia Simone. Naye weno ya Simone te kanayiji kachiki munji. No yaamwambulwila yo.

³⁹ Yesu yamukundama, yamuzulamina, yakanjisa kachiki. Kachiki yamuhwa. Hazehene naye weno ya Simone yakatuka, yabutuka kwalingila yakulia.

⁴⁰ Muze tangwa hilianjila kulu eswe waze abwile ni mieji a misongo yeka ni yeka yaatwala kuli Yesu. Neye yasa moko hali mutu ni mutu, yaawuka eswe.

⁴¹ Mwiku wa luchisa yiutuhwoka muli mieji anji ni kukololoka ngwo: “Mwe Mwana Zambi yena!” Alioze Yese yaukanjisa, yawaha koki, mumu yiunyingika ngwo kali Chilamwina yoze Zambi alakenyene.

Yesu yambujola mu Yudea

⁴² Muze kwilu hikwacha, Yesu yatuhuka mu limbo, yaya ha ukawenyi. Mbunga ya atu yaabutuka kumufupa. Muze haamuwana, yaamukinda ngwo, kanda aahichika.

⁴³ Alioze Yesu yaamba ngwenyi: “Changutamba kwambujola Sango Jibema ja Wanangana wa Zambi mu membo akwo nawa, mumu Zambi hanangutumu ha chikuma chino.”

⁴⁴ Kashika, yambujola mu mazuwo a kuwayila a mu chifuchi cha Yudea.