Luka 3 - Mukanda Wa Zambi 1970

Yoano Chipapachisa yambujola

¹ Ha mwaka kumi ni wa muchitano wa kuyula cha mwanangana wa Aroma, Tiberiu. Ponteu Pilatu te kali mukwa kuyula wa mu Yudea, Herode te kakuyula mu Galilea, mwanakwo Filipe mu chifuchi cha Iturea ni cha Trakonite, Lisania te kakuyula chifuchi cha Abilinia.

² Anase ni Kaifa te miata ja mahako. Ha mwaka uze Zambi yatambika Yoano, mwana wa Zakaria, mu puya

³ Neye yendangana mu chifuchi cheswe cha kusulangana ni lwiji Yordau, nikwambujola ngwenyi: “Alumukenu ku mbunge, anupapachise, mba Zambi manukonekena milonga yenu.”

⁴ Chenacho mukwa munanyi wa Zambi, Izaya asonekene mu mukanda wenyi ngwenyi: “Mutambi wa mutu yoze wakukololoka mu puya ngwenyi: ‘Lulikenu jila ya Mwene, lulamisenu yikoka yenyi!

⁵ Mbongo jeswe mujikashikiwa, milundu yeswe ni mindundena yeswe muyikanyikumuka. Yikoka yahenga muyikalulama, majila abi kumaakasalama.

⁶ Akwa hashi eswe maakamona ulamwino wa Zambi!’ ”

⁷ Mbunga te kaakwiza kuli Yoano hanga akaapapachise. Yoano yaamba ngwenyi: “Yenu vungu lia yihili, iya unakanulongesa kuchina ufwatulo wa Zambi uze muukeza?

⁸ Lingenu yitanga yize muyisolola chize hinwalumuka ku mbunge. Kanda nubutuka kulisamba ngwenu: ‘Abrahama kali kashakulu ketu.’ Mumu ngunanwambe ngwami, Zambi mahasa kwalumuna mawe wano ni kwapwisa vungu lia Abrahama,

⁹ Zambi hasa kulu njimbu ku miji ya mitondo. Mutondo weswe uze kuushi kwima mihuko yibema, maupakula ni kuumbila mu kahia.”

¹⁰ Hohene mbunga yaamuhula ngwo: “Mba kuchi chatutamba kulinga?”

¹¹ Yaakumbulula ngwenyi: “Yoze uli ni yikuto yaali chamutamba kuhana chimuwika kuli yoze keshi nacho, ni yoze uli ni yakulia chamutamba kulinga chizechene.”

¹² Akwa kulambwisa lijimu yeeza hanga aapapachise, yaahula Yoano ngwo: “Longeshi, kuchi yetu chatutamba kulinga?”

¹³ Neye yaakumbulula ngwenyi: “Kanda nulambwisa kuhiana chize Shimbi jinambe.”

¹⁴ Tujita yaamuhula ngwo: “Ni yetu, kuchi chatutamba kulinga?” Yaamba ngwenyi: “Kanda nutambula mbongo kuli niumwe ni tachi hanji mbenga. Yukenu ni fweto yenu.”

¹⁵ Atu yaabutuka kutalatala, yaanyonga ngwo, kota Yoano mwe Chilamwina yoze Zambi alakenyene.

¹⁶ Kashika Yoano yambila eswe ngwenyi: “Yami, ngunanupapachisa ni meya, alioze umwe unanguhiana yami kumeza. Yami, chatelele nichimwe kujitula sapato jenyi. Iye makanupapachisa ni Mwiku wa Linanga ni kahia.

¹⁷ Kali ni lwalo mu kwoko lienyi wa kufuza nacho mbuto. Makakungila tiriku mu chila yenyi, alioze yizungu makayocha mu kahia kaze kukeshi kujima nichimwe!”

¹⁸ Yoano yashinjila nawa yuma yinji yikwo muze alongesele atu Sango Jibema.

¹⁹ Alioze yakumika mukwa kuyula Herode mumu wambachile Herodia, pwo lia mwanakwo, ni mumu ha yitanga yinji yikwo yibi yize alingile.

²⁰ Mba Herode yawezela nawa chibi chikwo chahiana ha kusa Yoano mu zuwo lia lamba.

Yoano yapapachisa Yesu

²¹ Muze hapapachisa atu eswe, Yoano yapapachisa nawa Yesu. Muze te analembe, lilu yiliazuluka,

²² ni Mwiku wa Linanga yiumuhulumukina nikulifwa ngwe liembe. Yeevwa liji mwilu ngwo: “Yena mwe Mwanami, nakukuzanga kuhiana. Nakuwahilila ne.”

Tushakulu twa Yesu

²³ Yesu te habwa ni miaka ngwe makumi atatu muze abutwile milimo yenyi. Atu yaanyonga ngwo, kali mwana wa Josefe, mwana wa Heli,

²⁴ mwana wa Matata, mwana wa Levi, mwana wa Melichi, mwana wa Janai, mwana wa Josefe,

²⁵ mwana wa Matatiasa, mwana wa Amose, mwana wa Nahume, mwana wa Esli, mwana wa Nagai,

²⁶ mwana wa Maata, mwana wa Matatiasa, mwana wa Semene, mwana wa Joseke, mwana wa Joda,

²⁷ mwana wa Joanane, mwana wa Resa, mwana wa Zerubabele, mwana wa Shealtiele, mwana wa Neri,

²⁸ mwana wa Melki, mwana wa Adi, mwana wa Kozama, mwana wa Elmodama, mwana wa Ere,

²⁹ mwana wa Yoshua, mwana wa Eliezere, mwana wa Jorime, mwana wa Matata, mwana wa Levi,

³⁰ mwana wa Simone, mwana wa Yuda, mwana wa Josefe, mwana wa Jonana, mwana wa Eliakime,

³¹ mwana wa Malea, mwana wa Mena, mwana wa Matata, mwana wa Natane, mwana wa David,

³² mwana wa Jese, mwana wa Obede, mwana wa Boaze, mwana wa Salmone, mwana wa Nasone,

³³ mwana wa Aminadabe, mwana wa Admine, mwana wa Ami, mwana wa Esrone, mwana wa Pereze, mwana wa Yuda,

³⁴ mwana wa Yakoba, mwana wa Isake, mwana wa Abrahama, mwana wa Tera, mwana wa Nahore,

³⁵ mwana wa Seruge, mwana wa Reu, mwana wa Pelege, mwana wa Ebere, mwana wa Shela,

³⁶ mwana wa Kenane, mwana wa Arfashede, mwana wa Sheme, mwana wa Noa, mwana wa Lameke,

³⁷ mwana wa Matusela, mwana wa Enoke, mwana wa Jarade, mwana wa Malelele, mwana wa Kenane,

³⁸ mwana wa Enose, mwana wa Sete, mwana wa Samutu, mwana wa Zambi.