Luka 24 - Mukanda Wa Zambi 1970

Uhindukilo wa Yesu

¹ Chichamene cheswe mu lumingu, mapwo yaaya ku fuka, yaambata yuma ya vumba libema yize alulikile.

² Yaawana liwe halilangumuna ku fuka,

³ yaanjila, alioze mujimba wa Mwene Yesu kaauwanyine mo.

⁴ Muze te anayambashana, malunga aali yaasolokela ni mahina akubeyima.

⁵ Mapwo waze yeevwa woma unji nikuhetama hashi. Malunga waze yaamba ngwo: “Kuchi mba nunafupu mukwa mwono mukachi ka afu?

⁶ Amuno keshimo, hahinduka. Iwulukenu chize anwambile muze te achili mu chifuchi cha Galilea, ngwenyi:

⁷ ‘Chatamba kukunjika Mwana Mutu ku moko ja yivulumunyi akamuhate ha kulusu, mba ha tangwa lia muchitatu kumakahinduka.’ ”

⁸ Hohene yeewuluka maliji ja Yesu,

⁹ yaakatuka ku fuka, yaaya ni kwambulwila tumbaji kumi ni kashi, ni akwo eswe yuma yize.

¹⁰ Mapwo waze majina jo: Maria Kamandala, ni Yoana, ni Maria naye ya Tiangu (Jake). Wano hamwe ni mapwo akwo yaambulwila tunganda twa Yesu.

¹¹ Alioze e tunganda yaanyonga ngwo, yeswe yize ambulwile yili yuma ya mahuza, kaafulielele ko.

¹² Alioze Petulu yakatuka, yazomboka fuji ku fuka, yahetama, kamwene nichimwe shina mahina atoma, mba yahiluka ku mahienyi nikulishimwoka ha yize yeswe.

Yesu yasolokela tumbaji aali mu jila ku Emause

¹³ Ha tangwa lizeliene, aali Hakachi ko yaaya ku limwe limbo, jina lialio Emause. Chabwile ngwe kilometro kumi ni yimuwika ku Yerusaleme.

¹⁴ Te kaanalihanjekesa ha yize yeswe yabwile.

¹⁵ Shimbu te analihanjekesa ni kulihula, Yesu iye mwene yakundama, yaya hamwe no.

¹⁶ Yaamumona, alioze chimwe Chuma chaakinjile ha kumunyingika.

¹⁷ Yesu yaahula ngwenyi: “Yika nunalihula muze nunende?” No yaamana kikilii nikuhombola ku meso.

¹⁸ Umwe hakachi ko, jina lienyi te Kleofase, yamuhula ngwenyi: “Kuma yena wika mu Yerusaleme kuwanyingikine yuma yize yinakabwa mo matangwa wano, nyi?”

¹⁹ Yahula ngwenyi. “Yuma yika?” No yaamukumbulula ngwo: “Yize ya Yesu Kanazare, te mukwa munanyi wa Zambi wa ndundo ku yitanga ni ku maliji ku meso ja Zambi ni ku meso ja atu eswe.

²⁰ Mahako a lutwe ni makulwana jetu anakamukunjika ha kumushiha ni kumuhachila ha kulusu.

²¹ Tunakasa mbunge ngwetu, kali yoze makula Aisraele. Alioze kuwezela ku yino yeswe, musono lie tangwa lia muchitatu chize ku kabutu ka yuma yino.

²² Amwe mapwo a ku mbunga yetu atushimwokesanga. Kaayanga chichamene cheswe ku fuka,

²³ alioze kaamwene mujimba wenyi. Yaahiluka ni kutwambulwila ngwo: Twamona Usolwelo wa tunganda a mwilu waze atwambulwilanga ngwo: ‘Kali ni mwono.’

²⁴ Amwe a ku mbunga yetu kaayanga ku fuka, kaamonanga yeswe ngwe chize ambanga mapwo, alioze Yesu kaamumwene.”

²⁵ Mba Yesu yaamba ngwenyi: “Mhmm, yenu atu kunushi malinjekela, nuli akwa kukokoloka ha kufuliela yize yeswe ambujolele akwa munanyi a Zambi!

²⁶ Kuchatambile Chilamwina yoze Zambi alakenyene kwivwa lamba ngwe chino ni kunjila mu uhenya wenyi, nyi?”

²⁷ Mba Yesu yaalumbunwina Mukanda wa Zambi weswe hakutwala kuli iye mwene, butu ku Mikanda ya Mose ndoo ku mikanda yeswe ya akwa munanyi a Zambi.

²⁸ Muze haakundama ku limbo kuze te anayi, Yesu yalinga ngwe kanahiana.

²⁹ Alioze yaamushinjila ngwo: “Tweya ubombe, mumu tangwa hiliaya ni ufuku hiweza.” Neye yanjila no.

³⁰ Yatwama ku mesa hamwe no, yanda mbolo, yasakwila Zambi, yabalula mbolo, mba yaaha yo.

³¹ Hohene meso jo yaalaula, yaamunyingika. Alioze yatoka ku meso jo.

³² No yaalihanjikisa ngwo: “Mbunge jetu kujevwile kahia muchima lietu muze te anatuhanjikisa mu jila ni kutulumbunwina Mukanda wa Zambi, nyi?”

³³ No yaakatuka hazehene, yaahiluka ku Yerusaleme, yaawana kumi ni kashi kaanalikungulula hamwe ni akwo,

³⁴ waze te anambe ngwo: “Chamwenemwene Mwene hahinduka! Kasolokelanga Simone!”

³⁵ Ni ayo nawa yaambulwila yize yabwile mu jila, ni chize anyingikine Yesu ha shimbu lize abalwile mbolo.

Yesu yasolokela tumbaji twenyi

³⁶ Shimbu maachihanjika, Yesu mwene yasoloka mukachi ko, yaamba ngwenyi: “Hwimenu mbunge.”

³⁷ Tumbaji yaatungumuka, yeevwa woma, mumu anyongene ngwo, mujimu anamono.

³⁸ Alioze Yesu yaamba ngwenyi: “Kuchi kevwe nunalibikala? Kuchi mba nunayambashana mu mbunge jenu?

³⁹ Talenu moko jami ni molu jami. Yami mwene. Ngupapatenu nutale, mumu mujimu keshi musunya ni yifwaha ngwe chize nunangumono nayo yami.”

⁴⁰ Yamba maliji wano, mba yaalweza moko jenyi ni molu jenyi.

⁴¹ Chibwe chocho hindu kaafulielele ko, yeevwa chiseke chinji ni kulishimwoka. Ha chino, Yesu yaahula ngwenyi: “Nuli ni chimwe Chuma hano cha kulia, nyi?”

⁴² Yaamwaha Chipinji cha yishi wakwocha.

⁴³ Neye yachitambula, yachilia ku meso jo.

⁴⁴ Mba yaamba ngwenyi: “Wano e maliji nanwambile muze nabwile hamwe ni yenu, ngwami, yize yeswe yasonewene hakutwala kuli yami mu Shimbi ja Mose, ni mu mikanda ya akwa munanyi a Zambi, ni Miaso (Masamu) chatamba yikamanunuke.”

⁴⁵ Mba yaakwasa hanga anyingike Mukanda wa Zambi,

⁴⁶ yaamba ngwenyi: “Chenacho hichinasonewa ngwo: Chilamwina yoze Zambi alakenyene chamutamba kumona lamba, ni kuhinduka ku kufwa ha tangwa lia muchitatu.

⁴⁷ Ni chatamba kwambujola mu jina lienyi sango jino kuli mavungu eswe butu ku Yerusaleme. Ngwenu: ‘Alumukenu ku mbunge, mba Zambi manukonekena milonga yenu.’

⁴⁸ Yenu nuli yela ja yuma yize.

⁴⁹ Mungukanutumina yami mwene chawana chize Tata hanalakenya. Alioze chanutamba kushimbwila ku limbo ndoo ndundo ja mwilu mujinuhulumukina.”

Yesu yazezuka mwilu

⁵⁰ Mba Yesu yaatwala haze lia limbo ndoo ku chihunda cha Betania. Kwenako yolola moko, yaawahisa.

⁵¹ Shimbu te maachawahisa, yalihandununa no, yamuzundula kwilu.

⁵² Alioze ayo yaamuwayila, yaahiluka ku Yerusaleme, ni chiseke chinji.

⁵³ Matangwa eswe yaabwabwa mu zuwo lia Zambi ni kuchichimieka Zambi.