Luka 23 - Mukanda Wa Zambi 1970

Yesu ku meso ja Herode

¹ Mbunga yeswe yaakatuka, yaatwala Yesu ku meso ja Pilatu,

² yaabutuka kumusuma ngwo: “Tunakawana lunga yono nikubinjisa atu jetu, ngwenyi: ‘Kanda nulambula mwanangana wa Aroma lijimu.’ Ni kakulipwisa iye mwene Kristu, mwanangana.”

³ Pilatu yamuhula ngwenyi: “Mwe mwanangana wa Ayuda yena, nyi ka?” Yesu ngwenyi: “Kuwamba.”

⁴ Mba Pilatu yambila mahako a lutwe a Zambi ni mbunga ngwenyi: “Chawanyine chitela nichimwe cha kuhishila mutu yono.”

⁵ Alioze yaashindakenya kuhiana ngwo: “Kakuvundula atu ni longeso lienyi! Hanabutuka mu chifuchi cha Galilea, hanabalika mu chifuchi cheswe cha Yudea, ni haliabwila haneza ndoo kuno.”

Yesu ku meso ja Herode

⁶ Muze Pilatu hevwa maliji wano, yahula ngwenyi: “Mutu yono Kagalilea, nyi?”

⁷ Muze hevwa ngwo, Yesu kali wa ku chifuchi cha Herode, yamutuma kuli Herode yoze te uli ku Yerusaleme ha matangwa waze.

⁸ Herode yawahilila kuhiana kumona Yesu, mumu hanevu hakutwala kuli iye, ni yazanga kulu kumumona. Yatala tala kumona chimwe chilayi.

⁹ Yamuhula yihula yinji, alioze Yesu kakumbulwile nichimwe.

¹⁰ Mahako a lutwe ni alongeshi a Shimbi yaakatukila Yesu nikumusuma chikolo.

¹¹ Herode ni tujita twenyi yaamukekuna, yaamulelesa, yaamujika hina lia lubula, yaamuhilwisa maha Pilatu.

¹² Tangwa lizeliene Herode ni Pilatu yaalikata. Hatangu te abwile akwa kole.

Pilatu yakunjika Yesu ku kufwa

¹³ Pilatu yakungulula mahako a lutwe a Zambi, ni akwa kuyula, ni atu,

¹⁴ yaamba ngwenyi: “Nwangunehenanga mutu yono ngwenu, kakuvundula atu. Alioze namuhulanga ku meso jenu. Chawanyine chitela nichimwe chize nunamusumina nacho.

¹⁵ Chibwe Herode ka, mumu katutuminanga ye. Mutu yono kalingile nichimwe cha kutela kufwa.

¹⁶ Mungumulambisa fimbo (shikote), mba mungumutusula.” [

¹⁷ Ha chiwanyino cheswe cha Kubalika, Pilatu te chamutamba kwatuswila umwe funge.]

¹⁸ Alioze mbunga yaakololoka ngwo: “Mushihe! Tutuswile Baraba!”

¹⁹ (Baraba te haanamuse mu zuwo lia lamba ha Vunda jize jabwile mu limbo, ni mumu washihile atu.)

²⁰ Pilatu yazanga kutusula Yesu, kashika yahanjika nawa ku mbunga.

²¹ Alioze ayo yaakololoka ngwo: “Muhachile ha kulusu! Muhachile ha kulusu!”

²² Pilatu yaakumbulula chisuho cha muchitatu nikwamba ngwenyi: “Chibi chika kevwe anakalinga? Chamuwanyine ni chitela chimwe cha kutela kufwa! Mungumulambisa ni fimbo (shikote), mba mungumutusula.”

²³ Alioze yaakololoka kuhiana ngwo: “Muhachile ha kulusu, muhachile ha kulusu.” Yaakumba ni maliji jo.

²⁴ Pilatu yatayiza, yabatwila Yesu,

²⁵ yatusula mutu yoze echile, yoze asele mu zuwo lia lamba mumu ha Vunda ni ha kushiha atu, yaakunjikila Yesu amulinge chize azangile.

Tujita yaahata Yesu ha kulusu

²⁶ Muze te anatwala Yesu, yaatakana ni umwe mutu wa ku Sirene, jina lienyi Simone, te ku minda anakatuka. Tujita yamukwata ni tachi, yaamutwika kulusu ayimbate kunyima lia Yesu.

²⁷ Mbunga yinene ya atu amukawile. Mukachi ko mapwo te analili mbimbi ni kulilambalamba ha matulo.

²⁸ Yesu yatewuluka kuli ayo, ngwenyi: “Yenu amama a mu Yerusaleme, kanda nungulila yami, shinoho lililenu yenwene ni ana jenu.

²⁹ Mumu matangwa maakeza muze maakamba ngwo: ‘Kawaha miumba, waze kasemene ni kamwishine nilimwe tangwa!’

³⁰ Mba atu maakambila milundu ngwo: ‘Tuuzukilenu!’ ni mikandu ngwo: ‘Tuswekenu!’

³¹ Mumu nyi maalinga chocho ha mutondo wa wisu, kuchi muchikabwa ha mutondo umu?”

³² Tujita yaatwala nawa malunga akwo aali, yingulungulu, hanga ashihe hamwe ni Yesu.

³³ Muze haaheta kuma kuze akuvuluka ngwo: “Balanga lia Mutwe,” yaahachila ko Yesu ha kulusu, yaahata nawa yingulungulu aali ha makulusu, umuwika ku chindume, mukwo ku chimeso.

³⁴ Yesu yalemba ngwenyi: “Tata, akonekene kama, mumu kaanyingikine chize analingi.” No yalitetela mahina jenyi ni kuta chela.

³⁵ Atu yaamana nikutala. Miata ja Ayuda yaamukekuna ngwo: “Hanalamwina atu akwo, alilamwine mwene, nyi kali Chilamwina yoze Zambi alakenyene, yoze atongwele Zambi!”

³⁶ Tujita no yamukekuna, yaakundama nikumwaha vinaigre,

³⁷ yaamba ngwo: “Nyi mwe mwanangana wa Ayuda yena, lilamwine yena mwene!”

³⁸ Helu lienyi hasonewene ngwo: “Yono mwe Mwanangana wa Ayuda.”

³⁹ Umwe wa kuli yingulungulu waze ahachiwile ha makulusu yamusaula ngwenyi: “Mwe Chilamwina yoze Zambi alakenyene yena, nyi? Lilamwina yena mwene ni yetu nawa!”

⁴⁰ Alioze chingulungulu mukwo yamukanjisa ngwenyi: “Yena kuushi kuvwila Zambi woma, nyi? Yetu tuli nenyi mu ubatwilo umuwika,

⁴¹ ni ubatwilo wetu unatute, mumu tunatambula yize yinalite ni yitanga yetu. Alioze awu kalingile chibi nichimwe.”

⁴² Mba yambila Yesu ngwenyi: “Yesu, Ungwiwuluka kama muze muukeza mu Wanangana we!”

⁴³ Neye ngwenyi: “Chamwenemwene ngunakwambulwila ngwami, musono uno kumuubwa hamwe ni yami muma mwa uwahililo.”

Kufwa cha Yesu

^44-45 Tangwa ngwe ha muchima, chifuchi cheswe yichibwa ni milima bwii, yiisala ndoo ola jitatu. Mba chikalakala cha hina lia mu zuwo lia Zambi yichibulika mukachi.

⁴⁶ Yesu yakololoka chikolo ngwenyi: “Tata ngunakunjika mwono wami mu moko je!” Muze te hamba maliji wano, yasutula mwono wenyi.

⁴⁷ Mwata wa tujita, muze hamona yize yabwile, yachichimieka Zambi, ngwenyi: “Chamwenemwene mutu yono mukwa ululi!”

⁴⁸ Mbunga jeswe waze alikungulwile ni kutala, muze haachimona, yaahiluka nikulambalamba ha mabambo.

⁴⁹ Masepa ja Yesu eswe, ni mapwo waze te akumukaula chize ku Galilea yaamana kusuku, yaamona yize yeswe.

Kufunda cha Yesu

^50-51 Yikubwa umwe lunga, jina lienyi Josefe, wa ku Arimatea, limwe limbo lia Ayuda. Mutu mubema ni mukwa ululi, te kakutwaminyina kwiza cha wanangana wa Zambi. Neye wa ku Mbunga ya Ngaji ja Ayuda, alioze katayijile ko ubatwilo wo ni yize alingile.

⁵² Neye yaya maha Pilatu nikumwita mujimba wa Yesu.

⁵³ Mba yausunwisa ha kulusu, yauvunga mu hina litoma, yausa mu fuka liakutota mu liwe, fuka lize te kanda achifunda mo mutu niumwe.

⁵⁴ Lienalio lie tangwa lia muchitano lia semane, tangwa lia kuhwima te himulibutuka.

⁵⁵ Mapwo waze akawile Yesu chize ku chifuchi cha Galilea, yeeza hamwe ni Josefe ni kutala fuka, yaamona chize afunjile Yesu.

⁵⁶ Mba yaahiluka ku mahio, yaalulieka maji ni yuma ya vumba libema mu kuwayisa mujimba wenyi. Ha tangwa lia kuhwima yaanama nikulita ni Shimbi.