Luka 22 - Mukanda Wa Zambi 1970

Akwa lutwe ja Ayuda yaatwama Yesu punga

¹ Chiwanyino cha Mbolo Yize Kuyishi Yitumbo, te akuvuluka ngwo, Kubalika, yichikundama.

² Mahako a lutwe a Zambi ni alongeshi a Shimbi yaafupafupa mana a kushiha Yesu, mumu te anevwila atu woma.

Yudase yatayiza kukunjika Yesu kuli akwa kole jenyi

³ Hohene Sakwonga yanjila muli Yudase, umwe wa kuli tumbaji kumi ni aali, yoze te akuvuluka ngwo, Kakeriote.

⁴ Mba Yudase yaya hanga ahanjike ni mahako a lutwe a Zambi ni makulwana ja tufunga twa zuwo lia Zambi ngwe chize mahasa kwakunjika Yesu.

⁵ No yaawahilila. Yaamulakenya kumwaha mbongo.

⁶ Yudase yatayiza, yabutuka kufupa mana a kwakunjika Yesu muze mbunga keechi kunyingika.

Yesu yalia chiwanyino cha Kubalika (Pake)

⁷ Tangwa lia chiwanyino cha Mbolo Yize Kuyishi Yitumbo yilikundama, lize te chatamba kulambula milambu ya ana mapanga ya kwiwuluka Kubalika.

⁸ Yesu yatuma Petulu ni Yoano ngwenyi: “Yeenu nutululikile yakulia ya kwiwuluka kubalika.”

⁹ No yaamuhula ngwo: “Kulihi unazange tukululikile yo.”

¹⁰ Neye yaamba ngwenyi: “Talenu! Shimbu lize mununjila mu limbo, munutakana ni mutu unambata mulondo wa meya. Mukaulenu.

¹¹ Kuze manjila, nulweza mwenya zuwo ngwenu: ‘Longeshi kanahula ngwenyi, chilihi chibatulo muze mungulila hamwe ni tumbaji twami yakulia ya kwiwuluka Kubalika?’

¹² Neye manulweza zuwo lia kwilu, chibatulo chinene ni yuma yeswe yinasu mo. Mwenamo munutululikila yakulia.”

¹³ No yaaya, yaawana yuma yeswe ngwe chize ambile Yesu, yaalulika yakulia ya kwiwuluka Kubalika.

Mesa ya Mwene Yesu

¹⁴ Muze ola hiyeza, Yesu yatwama ku mesa hamwe ni tunganda twenyi,

¹⁵ yaamba ngwenyi: “Ni usona unji hingunazange kulia yakulia yino ya kwiwuluka Kubalika hamwe ni yenu shimbu kanda nguchimona lamba!

¹⁶ Mumu ngunanwambulwila ngwami, chichi kuyilia nawa nichimwe ndoo ni muze ulumbunwiso wayo muukamweneka zwalala mu wanangana wa Zambi.”

¹⁷ Mba yanda musenge, yasakwila Zambi, yamba ngwenyi: “Wenu, lisumwinenu wo hakachi kenu.

¹⁸ Mumu ngunanwambulwila ngwami, chichi kanwa nawa vinyu yino ndoo ku tangwa lize Wanangana wa Zambi muukeza.”

¹⁹ Mba yanda mbolo, yasakwila Zambi, yayibalula, mba yayaha tumbaji twenyi nikwamba ngwenyi: “Mbolo yino yili mujimba wami [uze ngunahane mumu hali yenu. Lingenu chino ni kungwiwuluka.”

²⁰ Muze haalia, Yesu yaaha nawa musenge chizechene, ngwenyi: “Musenge uno wa vinyu uli Usendo Waha wa Zambi wa manyinga jami waze anamwangana mumu hali yenu.]

²¹ “Alioze Talenu! yoze unangukunjika kuli akwa kole jami hano hali ku mesa hamwe ni yami!

²² Chamwenemwene Mwana Mutu kumafwa ngwe chize Zambi hanachibatula, alioze lamba lienyi mutu yoze unamukunjika!”

²³ No yaabutuka kulihulahula ngwo: “Iya mukachi ketu malinga chino?”

Tumbaji yalihamika ngwo: “Iya munene Wahiana?”

²⁴ Tumbaji yaabutuka kulihamika ngwo: “Iya munene Wahiana?”

²⁵ Yesu yaamba ngwenyi: “Mianangana ja hashi kaakuyula atu jo, ni e atu kaakwavuluka ngwo: ‘Tangia yibema.’

²⁶ Alioze hi chocho ko ni yenu. Mumu yoze munene Wahiana hakachi kenu chamutamba kubwa ngwe kanuke, ni mukwa lutwe chamutamba kubwa ngwe mukwa kuvumbika.

²⁷ Iya munene Wahiana, yoze unatwama ku mesa hanji yoze unavumbika: Ngwami, yoze uli ku mesa, nyi? Alioze yami nguli mukachi kenu ngwe yoze unavumbika.

²⁸ “Hinunanyongonona hamwe ni yami mu yeseko yami.

²⁹ Ngwe Tata hanangusela Wanangana, chimuwika nawa ngunanusela Wanangana.

³⁰ Munukalia ni munukanwa ku mesa yami mu Wanangana wami. Munukatwama ha yitwamo ya mianangana ni kubatwila mavungu kumi ni aali a Israele.”

Yesu ngwenyi: “Yena Petulu muulikala yami.”

³¹ “Simone, Simone, tala! Sakwonga hanahula chiyulo cha kunusala mu musalo ngwe chize atu akusala tiriku.

³² Alioze naliumbile hakutwala kuli yena, hanga kuuchi kahona ufulielo. Mba muze muukahiluka kuli yami, kolesa akwenu.”

³³ Petulu yamwamba ngwenyi: “Mwene, ngunalulika kuya chibwe ku zuwo lia lamba, chibwe ku kufwa hamwe ni yena!”

³⁴ Yesu ngwenyi: “Petulu, ngunakwambulwila, ngwami, musono, shimbu ndemba kanda achitambika, kumuulikala yami katatu, ngwe, kuwangunyingikine.”

Chibakumuna, ni tuku, ni mukwale

³⁵ Mba Yesu yaahula ngwenyi: “Muze nanutumine te kunushi chibakumuna, chibwe tuku, chibwe sapato, nwahonene chimwe Chuma, nyi?” Yaakumbulula ngwo: “Nichimwe.”

³⁶ Mba Yesu yaamba ngwenyi: “Alioze haliabwila yoze uli ni chibakumuna hanji tuku chamutamba kuyimbata, ni yoze keshi mukwale chamutamba kulanjisa chikuto chenyi ni kuulanda.

³⁷ Mumu ngunanwambulwila ngwami, chatamba chimanunuke chize Mukanda wa Zambi unambe hakutwala kuli yami, ngwo: ‘Yamwalula hamwe ni yivulumunyi.’ Mumu chize chasonewene ha chikuma cha yami chimanunuke.”

³⁸ Tumbaji yamwamba ngwo: “Mwene, tala mikwale yaali yino!” Yaakumbulula ngwenyi: “Chinalite!”

Yesu yalemba mu munda wa Getsemane

³⁹ Yesu yatuhuka yaya, nikulita ni ndako yenyi, ha mulundu wa Olive. Tumbaji twenyi yaamukaula.

⁴⁰ Muze haheta ko, yaamba ngwenyi: “Lembenu hanga kunuchi kunjila mu cheseko.”

⁴¹ Mba Yesu yasenya kulutwe ngwe kachipinji ka kukonga cha liwe, yasa makungunwa hashi, yalemba

⁴² ngwenyi: “Tata, nyi unazange nguchize kama musenge uno wa lamba. Hindu kanda chibwa ngwe chize ngunazange yami, alioze ngwe yena unazange.” [

⁴³ Mba kanganda ka mwilu yamusolokela ha kumukolesa.

⁴⁴ Yesu yabinda kuhiana nikulemba ni mbunge yeswe. Matukuta jenyi yaasotwoka hashi ngwe manyinga.]

⁴⁵ Muze halemba, yakatuka, yeza kuli tumbaji, yaawana mu tulo mumu ha chinyengo.

⁴⁶ Yaamba ngwenyi: “Kuchi kevwe nuli mu tulo? Hindukenu, lembenu hanga kunuchi kunjila mu cheseko.”

Yudase yakunjika Yesu

⁴⁷ Shimbu te Yesu machihanjika, mbunga yaaheta. Yudase, umwe wa kuli tumbaji kumi ni aali, yaatwala, yakundama kuli Yesu mu kumumbeja.

⁴⁸ Alioze Yesu yamwamba ngwenyi: “Yudase, unakunjika Mwana Mutu ni mbeju, nyi?”

⁴⁹ Muze tumbaji twa Yesu amwene yize muyibwa, yaamuhula ngwo: “Mwene, tulambe ni mikwale yetu, nyi?”

⁵⁰ Umuwika hakachi ko yalamba kavumbi ka mwata wa mahako, yamubatula litwi lia chindume.

⁵¹ Alioze Yesu yamba ngwenyi: “Kalenu! Echenu, kunahu!” Mba yakwata litwi lia lunga yoze, yamuwuka.

⁵² Mba Yesu yambila mahako a lutwe, ni makulwana ja tufunga twa zuwo lia Zambi ni makulwana waze ejile ni kumukwata ngwenyi: “Nuneza ni mikwale ni kanda ni kungukwata ngwe nguli muhuza, nyi?

⁵³ Tangwa ha tangwa nabwile hamwe ni yenu mu zuwo lia Zambi, hindu kunwangukwachile ko, alioze ola yino yili ni yenu ni ya tachi ja milima.”

Petulu yalikala Yesu

⁵⁴ No yaakwata Yesu, yaamutwala maha mwata wa mahako. Petulu yakaula kanonajila kapinji kasuku.

⁵⁵ Atu te haawika kahia mu yiize. Petulu neye yatwama mukachi ka waze te anoto kahia.

⁵⁶ Umwe mwana pwo, te ngamba, yamumona kanoto kahia, yamutala nee, ngwenyi: “Lunga yono nawa kabwanga hamwe nenyi.”

⁵⁷ Alioze Petulu yalikala ngwenyi: “Yena pwo, chamunyingikine kwami!”

⁵⁸ Ha shimbu likepe, umwe lunga yamumona, yamba ngwenyi: “Ni yena nawa uli wa kuli ayo!” Alioze Petulu ngwenyi: “Yena lunga, hi yami ko!”

⁵⁹ Ha shimbu lia ola yimuwika, mukwo yashindakenya ni hamu ngwenyi: “Chamwenemwene, lunga yono kabwanga hamwe nenyi, mumu kali Kagalilea!”

⁶⁰ Alioze Petulu yakumbulula ngwenyi: “Yena lunga, Chanyingikine chize unambe!” Ha shimbu lizeliene, muze te machihanjika, ndemba yatambika.

⁶¹ Mwene yatewuluka, yatala Petulu nee. Mba Petulu yewuluka liji lize amwambile Mwene ngwenyi: “Shimbu ndemba kanda achitambika musono uno, kumuulikala yami katatu ngwe: ‘Chamunyingikine kwami.’ ”

⁶² Hohene Petulu yatuhuka, yalila kuhiana.

Tufunga yaakekuna Yesu, yaamulamba

⁶³ Tufunga yaakekuna Yesu, yaamulamba,

⁶⁴ yaamufuka ku meso nikumuhula ngwo: “Tumbula, iya wakulamba?”

⁶⁵ Yaamushililika ni maliji akwo anji.

Yesu ku meso ja Mbunga ya Ngaji ja Ayuda

⁶⁶ Muze hikwacha, makulwana ja Ayuda ni mahako a lutwe a Zambi ni alongeshi a Shimbi yaalikungulula, yaatwala Yesu ku meso ja Mbunga yo ya Ngaji,

⁶⁷ yaamuhula ngwo: “Mwe Chilamwina yoze Zambi alakenyene yena, nyi ka? Twambulwile.” Neye yaakumbulula ngwenyi: “Nyi nanwambulwila, kunuchi kungufuliela nichimwe.

⁶⁸ Ni kachi nanuhula chimwe chihula, kunuchi kungukumbulula.

⁶⁹ Alioze chize ku haliabwila Mwana Mutu makatwama ku chindume cha Zambi Mukwa Ndundo Jeswe.”

⁷⁰ Eswe yaamuhula ngwo: “Kuma, mwe Mwana Zambi yena, nyi ka?” Neye yaakumbulula ngwenyi: “Chochene nwamba.”

⁷¹ Hohene yaamba ngwo: “Mba kuchi tunafupu nawa yela akwo? Hitwalivwila yetwene kuhanjika chenyi!”