Luka 20 - Mukanda Wa Zambi 1970

Chihula hakutwala ku chiyulo cha Yesu

¹ Limwe tangwa, muze te Yesu analongesa atu mu zuwo lia Zambi lia Ayuda nikwambujola Sango Jibema, mahako a lutwe a Zambi, ni alongeshi a Shimbi hamwe ni makulwana yaakundama,

² yaamwamba ngwo: “Twambulwile, ni chiyulo chaya wakulinga nacho yuma yino? Iya wakuhele chiyulo cha kuyilinga?”

³ Yesu ngwenyi: “Ni yami nawa mungunuhula chihula. Ngwambulwilenu:

⁴ chiyulo cha Yoano ha kupapachisa, cha kwilu nyi? Shina cha hashi?”

⁵ No yaabutuka kulihangujola ngwo: “Nyi twakumbulula ngwetu: ‘Cha kwilu,’ iye matuhula ngwenyi: ‘Kuchi mba kunwamufulielele?’

⁶ Alioze, nyi twakumbulula ngwetu: ‘Cha hashi,’ mbunga maatwasa mawe ni kutushiha, mumu haanakunuka ngwo, Yoano kali mukwa munanyi wa Zambi.”

⁷ Mba yaakumbulula ngwo: “Kutwanyingikine.”

⁸ Yesu ngwenyi: “Ni yami nawa chichi kunwambulwila ni chiyulo chaya nakulinga nacho yuma yino.”

Chishima cha njimi abi

⁹ Hohene Yesu yaatela chishima chino ngwenyi: “Umwe mutu watumbile munda wa vinyu, yaukunjika ku moko ja njimi, mba yaya mu wenyi matangwa anji.

¹⁰ Muze mwaka wa kuhela hiwaheta yatuma umwe kavumbi kuli njimi hanga akatambule yimwe mihuko. Alioze e njimi yaalamba mwe kavumbi, yaamukatwisa mokomoko.

¹¹ Mwenya munda yatuma nawa kavumbi mukwo. No yaamulamba, yaamutuka, yaamukatwisa mokomoko.

¹² Yatuma nawa kavumbi wa muchitatu. Njimi yaamulemeka, yaamumbila haze.

¹³ Mba mwenya munda yamba ngwenyi: ‘Kuchi mungulinga? Mungutuma mwanami yoze nazanga kuhiana, hanji maakamusa vumbi.’

¹⁴ Alioze muze e njimi amumwene, yaalihanjikisa ngwo: ‘Awu mwe swana. Tumushihenu, hanga munda wa vinyu ukabwe niwetu!’

¹⁵ Yaamumbila haze lia munda, yaamushiha.” Yesu yahula ngwenyi: “Mwenya munda kuchi mba makalinga njimi waze?

¹⁶ Makeza ni kwashiha, mba makakunjika munda ku moko ja njimi eka.” Muze haachivwa, atu yaamba ngwo: “Kanda chikabwa kama nilimwe tangwa.”

¹⁷ Yesu yaatala nee, yahula ngwenyi: “Maliji wano a mu Mukanda wa Zambi kuchi analumbunuka? Ngwo: ‘Liwe lize alitunyine tungi hiliabwa liwe lia mu mbango, lize liakolesa zuwo.’

¹⁸ “Mutu yoze malimbukila ha liwe lino, kumakamakuka. Nyi lie liwe muliholokela hali umwe, kumulikamufwenuna ngwe fufuta.”

Chihula hakutwala ku lijimu lia mwanangana wa Aroma

¹⁹ Alongeshi a Shimbi ni mahako a lutwe a Zambi yaafupa mana a kukwata Yesu ha shimbu lizeliene, mumu yaanyingika ngwo, kata chishima chino ha kwahisa, alioze yeevwila atu woma.

²⁰ Kashika yaabutuka kulaa Yesu ni kumutumina ngendeshi. Wano yaalionga kubwa ni mbunge jibema, alioze yaatela Yesu muheto ni yihula. Yaafupa tangwa lia kumukunjika ku chiyulo cha mukwa kuyula,

²¹ yaamuhula chihula chino ngwo: “Longeshi, tunanyingika ngwetu, yize wakwamba ni yize wakulongesa yinalite. Kuushi woma ha yize akunyonga atu, alioze wakulongesa umwenemwene nikulita ni Shimbi ja Zambi.

²² Twambulwile kama, muchilita ni Shimbi jetu kulambula lijimu kuli mwanangana wa Aroma, nyi ka?”

²³ Alioze Yesu yanyingika ulembekese wo, yaakumbulula ngwenyi:

²⁴ “Ngulwezenu mwe lumbongo. Chizulie chino ni Chisoneko chino yaya?” No yaakumbulula ngwo: “Ya mwanangana wa Aroma.”

²⁵ Mba Yesu yaamba ngwenyi: “Nyi chocho, hilwisenu mwanangana wa Aroma yize niyenyi ni Zambi yize niyenyi.”

²⁶ Kaahashile kumukwata ku liji nilimwe ku meso ja atu. Kashika yaahola kuluu, yaalishimwoka ha kumbululo lienyi.

Chihula hakutwala ku uhindukilo wa afu

²⁷ Amwe Asaduseu yeeza kuli Yesu. (Waze akwamba ngwo: “Afu keechi kahinduka.”) Yaamwamba ngwo:

²⁸ “Longeshi, Mose hanatusonekena Shimbi yino ngwenyi: ‘Nyi umwe lunga hafwa, alioze hahichika pwo keshi mwana, mwanakwo chamutamba kumbata pwo yoze hanga asemene yayo ana.’

²⁹ Yikubwa asongo ni atu shimbiali. Mutangu yambata pwo. Mwe lunga yafwa, kahichikile ko mwana;

³⁰ ni chihata chenyi chizechene,

³¹ ni wa muchitatu. Chenacho eswe shimbiali yaafwafwa, kaahichikile ko ana.

³² Hakusula mwe pwo neye yafwa.

³³ Ha tangwa lia uhindukilo wa afu, makabwa pwo liaya? Mumu eswe shimbiali yaamumbata.”

³⁴ Yesu ngwenyi: “Miaka yino hano hashi, malunga ni mapwo kaakulimbata ni kaakulihangisa malu,

³⁵ alioze malunga ni mapwo waze anatela kuhinduka ku kufwa ni kubwa ni mwono ku mwaka uze muwiza ho, keechi kulimbata chibwe kulihangisa ku malo.

³⁶ Kaahashile kufwa nichimwe, mumu kaali ngwe tunganda a mwilu. Kaali ana ja Zambi, mumu hanaahindwisa ku kufwa.

³⁷ Mose kanashindakenya pundu ngwenyi, afu kumaakahinduka. Mu Chihanda chize chinahanjika hakutwala ku chibuta chize chawemene, kanavuluka Mwene ngwenyi: ‘Zambi ya Abrahama, ni ya Isake, ni ya Yakoba,’

³⁸ Kulumbunuka ngwo: Zambi kali Zambi ya akwa mwono, hi Zambi ya afu ko, mumu eswe kaali ni mwono ha kumulemesa.”

³⁹ Amwe alongeshi a Shimbi yaamba ngwo: “Longeshi, hiwahanjika kanawa!”

⁴⁰ Kashika mutu niumwe kahamukine nawa kumuhula yihula yikwo.

Chihula hakutwala kuli David ni Chilamwina yoze Zambi alakenyene

⁴¹ Yesu yaahula ngwenyi: “Ngwe kuchi alongeshi a Shimbi maahasa kwamba ngwo: ‘Chilamwina yoze Zambi alakenyene kali mwana wa David’?

⁴² Mumu David iye mwene kanambe mu mukanda wa Miaso (Masamu) ngwenyi: ‘Mwene Zambi hanambila Mwene wami ngwenyi: Twama ku chindume chami

⁴³ ndoo mungukasa akwa kole je ngwe Chuma cha kunangika molu je!’

⁴⁴ David yamuvuluka ngwenyi: ‘Mwene wami.’ Mba ngwe kuchi Chilamwina yoze Zambi alakenyene mahasa kubwa mwanenyi?”

Yesu yatungununa alongeshi a Shimbi

⁴⁵ Muze te mbunga anamubanjika, Yesu yambila tumbaji ngwenyi:

⁴⁶ “Kanyaminenu alongeshi a Shimbi waze akuzanga kwendangana ni mahina a lubula, waze akuzanga atu kwameneka ni vumbi mu yitanda, waze akuzanga yitwamo ya kulutwe mu mazuwo a kuwayila ni mihela ya vumbi mu yiwanyino.

⁴⁷ Kaakwiya yuma ya mu mazuwo ja mapwo waze haanafwisa malunga, Kaakulemba Chipinji chisuku ha kulisolola ngwo, tuli abema. Lamba liahiana maakamona!”