Luka 2 - Mukanda Wa Zambi 1970

Kusemuka cha Yesu Kristu

¹ Ha matangwa waze, Mwanangana wa Aroma, Augustu, yahana Shimbi ya kusoneka atu eswe waze te atwama mu chifuchi cha Aroma.

² Chino che Chisoneko chitangu muze te Kirinu ayulile mu Siria.

³ Atu eswe yaaya akaasoneke, mutu mweswe ku limbo lienyi.

⁴ Josefe yakatuka ku limbo lia Nazare mu chifuchi cha Galilea, yaaya ku Yudea, ku limbo lize analivuluka ngwo, Betleheme. Kwenako asemukinyine mwanangana David. Josefe yaya mumu te wa ku vungu lia David.

⁵ Yaya akamusoneke hamwe ni pwo lienyi wakwambisa, Maria, te kafumbakaji.

⁶ Muze abwile mu Betleheme, matangwa a kusema chenyi yaaheta.

⁷ Yasema mwanenyi mutangu, wa lunga. Yamuvunga mu mahina, yamubombesa mu chililo cha yimuna, mumu kaabwile ko ni muhela mu zuwo lia ngeji.

Tufunga ni tunganda a mwilu

⁸ Yikubwa tufunga mu chifuchi chize, te anafungu chendo cha mapanga jo mu yambu ha ufuku.

⁹ Susumuku kanganda ka mwilu yamana hehi no. Uhenya wa Mwene Zambi yiuhenya hali ayo. No yeevwa woma unji.

¹⁰ Alioze kanganda ka mwilu yaamba ngwenyi: “Kanda nwivwa woma, mumu ngunanwambulwila Sango Jibema jize mujikawahisa atu eswe.

¹¹ Ufuku unowene, mu limbo lia David, Chilamwina hanusemukina, iye Kristu mwe Mwene!

¹² Chino che chilayi: Munuwana mwe mwana kemba wakuvunga mu mahina, kanabombo mu chililo cha yimuna.”

¹³ Susumuku yikubwa hamwe ni kanganda chizavu cha tunganda twa mwilu. Yaachichimieka Zambi ngwo:

¹⁴ “Fumanyisenu Zambi Mwilu Mwahiana! Hano hashi uhwimino hakachi ka atu waze akumuwahila!”

¹⁵ Muze tunganda a mwilu akatukile ni kuhiluka mwilu, tufunga yaalihanjikisa ngwo: “Tuyenu haliabwila ndoo ku Betleheme, tutale Chuma chino hichabwa, chize Mwene Zambi hatunyingikisa.”

¹⁶ No yaaya nikawashi, yaawana Maria ni Josefe, yaamona mwe mwana kemba, te kanabombo mu chililo cha yimuna.

¹⁷ Ha kumumona, tufunga yaalumbununa yuma yize evwile yakutwala kuli mwe mwana.

¹⁸ Eswe waze ayivwile, yaalishimwoka ha maliji waze tufunga aambulwilile.

¹⁹ Alioze Maria yafunga yuma yino yeswe ni kuyizewula mu mbunge yenyi.

²⁰ Tufunga yaahiluka ni kufumanyisa ni kuchichimieka Zambi ha yuma yeswe yize heevwa ni yize haamona. Yuma yeswe yiilita ngwe chize tunganda twa mwilu aalwezele.

Yaamuluka jina ngwo, Yesu

²¹ Ha tangwa lia muchinake, ha kumupwisa ngalami, yaamuluka jina ngwo, Yesu, lienalio amulukile kanganda ka mwilu muze te kanda achiseseka mu jimo lia naye.

Yaakunjika Yesu kuli Zambi

²² Muze matangwa a kujilula, nikulita ni Shimbi ja Mose, haamanunuka, yaaneha Yesu ku Yerusaleme amukunjike kuli Mwene Zambi.

²³ Chenacho hichinasonewa mu Shimbi ja Mwene Zambi ngwo: “Mwana lunga mweswe malianga kusemuka maakamuvuluka ngwo, Munangi wa Mwene Zambi.”

²⁴ Yaalambula nawa mulambu nikulita ni Shimbi ja Mwene Zambi ngwo: “Ana a membe aali hanji tutele aali.”

²⁵ Mu Yerusaleme yimubwa umwe lunga, jina lienyi te Simone, mukwa ululi, mukwa kuwayila Zambi. Te kakushimbwila ulamwino wa Israele. Mwiku wa Linanga yiubwa muli iye.

²⁶ Newo yiumulweza ngwenyi, kechi kafwa ndoo makamona Chilamwina yoze Zambi alakenyene.

²⁷ Ku tachi ja Mwiku wa Linanga, Simone yanjila mu zuwo lia Zambi lia Yuda, shimbu yisemi anehene mwe mwana kemba Yesu, akamulinge nikulita ni ndako ya Shimbi,

²⁸ Simone yamutambula mu moko jenyi, yachichimieka Zambi ngwenyi:

²⁹ “Mwene Zambi, haliabwila chilakenyo che hichamanunuka. Kavumbi ke mahasa kufwa ni uhwimino

³⁰ mumu meso jami haamona ulamwino we

³¹ uze hiunalulika ku meso ja atu eswe.

³² Ulamwino uno lie pangu lia kutemwina waze hi Ayuda ko, we ulemu wa atu je Aisraele.”

³³ Tato ni naye yaalishimwoka ha yuma yize Simone ahanjikile hakutwala kuli Yesu.

³⁴ Simone yaawahisa, yalweza naye Maria ngwenyi: “Yono Zambi hanamuse ha kulimbwisa anji ni ha kuhindwisa anji mu Israele. Makabwa chilayi chize maakachihamikina,

³⁵ hanga askasolole manyonga a mu mbunge ja atu anji. Ewa, ni chinyengo ngwe mukwale unene muchikakutuwa mu mbunge ye.”

^36-37 Yikubwa nawa umwe pwo mukwa munanyi, Ana, mwana wa Fanwele, wa ku vungu lia Asere. Yabwa ku ulo miaka shimbiali, mba yatwama twamishi miaka makumi nake ni yiwana ndoo ku ushinakaji wenyi. Te keshi kukatuka mu zuwo lia Zambi, alioze yanyongonona mu kuwayile mwalwa ni ufuku, ni kulitwamina kulia, ni kuliumba.

³⁸ Neye yaheta ha ola yizeyene, yasakwila Zambi, yalumbununa yikuma ya mwe mwana kuli atu eswe waze te akusa mbunge ku ukule wa Yerusaleme.

Yaahiluka ku Nazare

³⁹ Muze te yisemi jenyi haamanununa yuma yeswe nikulita ni Shimbi ja Mwene Zambi, yaahiluka ku Galilea ku limbo lia Nazare.

⁴⁰ Mwe mwana yatatuka, yakola, yakula ni mana anji; ni Zambi yamuwahisa.

Mukweze Yesu mu zuwo lia Zambi lia Ayuda

⁴¹ Yisemi ja Yesu te kaakuya mwaka ha mwaka ku Yerusaleme ha Chiwanyino cha Kubalika.

⁴² Muze te Yesu habwa ni miaka kumi ni yaali, iye ni yisemi jenyi yaaya ku chiwanyino nikulita ni ndako yo.

⁴³ Muze chiwanyino hichahwa, yisemi yaahiluka, alioze mukweze Yesu yasala ku Yerusaleme. Yisemi jenyi te kaachinyingikine.

⁴⁴ Yaanyonga ngwo, Yesu mu chendo ali. Yeenda tangwa heswe lia muundu. Mba yaabutuka kumufupa mukachi ka usoko wo ni masepa jo,

⁴⁵ alioze kaamuwanyine mo. Hohene yaahiluka ku Yerusaleme ni kumufupa.

⁴⁶ Ha tangwa lia muchitatu, yaamuwana mu zuwo lia Zambi lia Ayuda. Te kanatwama mukachi ka alongeshi ja Ayuda, ni kwabanjika ni kwahula yihula.

⁴⁷ Eswe waze amuvwile, yaalishimwoka ha malinjekela jenyi ni yikumbululo yenyi.

⁴⁸ Muze yisemi jenyi haamumona, yaalishimwoka kuhiana. Naye yamwamba ngwenyi: “Aa mwanami, kuchi kevwe unakatulinga chize? Tatenu ni yami tunakevwa chinyengo kuhiana ha kukufupa.”

⁴⁹ Neye yaakumbulula ngwenyi: “Yika te nunangufupila? Kuma kunwanyingikine ngwenu, Changutamba kubwa mu zuwo lia Tata, nyi?”

⁵⁰ Alioze liji lia Yesu kuliaalumbunukinyine ko.

⁵¹ Mba yahiluka no ku Nazare, yoononokena. Naye yafunga yuma yize yeswe mu mbunge yenyi.

⁵² Yesu yatatuka mu mujimba, yakula ni mana, yabemena ku meso ja Zambi ni atu.