Luka 19 - Mukanda Wa Zambi 1970

Yesu ni Zakeu

¹ Yesu yanjila ni kubalika ndusu mu limbo lia Yeriku.

² Mwata wa akwa kulambwisa lijimu wabwile ko, jina lienyi Zakeu, te pichi.

³ Yazanga kumona Yesu chize abwa. Alioze wabwile mwihi ni kahashile kumumona mumu ha mbunga.

⁴ Mba yazomboka kulutwe, yanyina ku mutondo musuwa, hanga amone Yesu muze mabalika ko.

⁵ Muze Yesu haheta ko, yahetuka, yamona Zakeu, yamwamba ngwenyi; “Lipupwise usunuke, Zakeu, mumu Changutamba kubwa ku mahie musono.”

⁶ Zakeu yalipupwisa kusunuka, yamutambula ni chiseke.

⁷ Eswe achimwene, yaalinyenyeta ngwo: “Mutu yono haya maha chivulumunyi!”

⁸ Alioze Zakeu yamana kikilii, yambila Mwene ngwenyi: “Talenu, Mwene! Munguhana Chihanda cha hakachi cha yikumba yami kuli yiswale. Nyi natambwile kuli umwe mbongo ni kaliongelo, mungumuhilwishila jo yisuho yiwana.”

⁹ Yesu yamba ngwenyi: “Musono uno akwa jiko lino haalamwina, mumu mutu yono neye kali mwana wa Abrahama.

¹⁰ Mumu Mwana Mutu haneza mu kufupa ni kulamwina akwa kutoka.”

Chishima cha mbongo kumi

¹¹ Yesu yaatela chishima waze te anabanjika maliji wano, mumu wabwile hakamwihi ni Yerusaleme, ni atu yaanyonga ngwo, Wanangana wa Zambi himuusoloka shimbu lizeliene.

¹² Neye yamba ngwenyi: “Umwe mutu wa lufuma wayile ku chimwe chifuchi kusuku ha kutambula wanangana, akahiluke nawa.

¹³ Shimbu kanda achiya, yatambika tuvumbi twenyi kumi. Mutu mweswe yamwaha lumbongo wa oru, ngwenyi: ‘Sepenu najo ndoo mungukahiluka.’

¹⁴ Alioze atu ja mu chifuchi chenyi yaamuvutwokela, yaatuma tunganda kunyima lienyi ni kumwamba ngwo: ‘Kutusolo mutu yono kubwa mwanangana wetu.’

¹⁵ “Mutu yoze yatambula wanangana, yahiluka mu chifuchi chenyi. Mba yatambika tuvumbi waze ahele mbongo, hanga anyingike jize afumbwile.

¹⁶ Mutangu yeza nikwamba ngwenyi: ‘Mwanangana, lumbongo yoze wanguhele hinafumbula nenyi mbongo kumi ja oru.’

¹⁷ Mwanangana yamwamba ngwenyi: ‘Walinga kanawa, kavumbi mubema! Mumu washishika ha yuma yikepe, ngunakupwisa mukwa kuyula wa membo kumi.’

¹⁸ Kavumbi wa muchaali yeza nikwamba ngwenyi: ‘Mwanangana, lumbongo yoze wanguhele hinafumbula nenyi jitano ja oru.’

¹⁹ Mwanangana yamwamba ngwenyi: ‘Ngunakupwisa mukwa kuyula wa membo atano.’

²⁰ Kavumbi mukwo yeza, nikwamba ngwenyi: ‘Mwanangana, lumbongo we wa oru yono. Namufungile ni kumusweka mu chitambala.

²¹ Nevwike kwami woma, mumu uli mutu mukalu. Wakwanda chize hi cha yena ko, wakuhela chize kuwatumbile.’

²² Mwanangana yamwamba ngwenyi: ‘Kavumbi mubi, mungukubatwila nikulita ni maliji je. Kuma te Unanyingika ngwe, nguli mutu mukalu ni kwanda chize hi cha yami ko ni kuhela chize chatumbile.

²³ Mba kuchi kuwahanyine lumbongo wami kuli mukwa kufumbula mbongo? Kachi ha kuhiluka chami hinajitambula ni mbwezo.’

²⁴ Mba yambila waze abwile ko ngwenyi: ‘Mutambulenu lumbongo yoze wa oru, mwehenu yo yoze uli ni kumi.’ [

²⁵ No yaamwamba ngwo: ‘Mwanangana, yoze kali kulu ni mbongo kumi!’]

²⁶ Yakumbulula ngwenyi: ‘Ngunambe ngwami yoze ukwete, makamuweza alioze yoze keshi nacho, makamuchiza chibwe chize chikepe ali nacho.

²⁷ Alioze hakutwala kuli akwa kole jami, waze kaanguzangile kubwa mwanangana wo, anehenu kuno, ashihenu ku meso jami!’ ”

Yesu mwe Mwanangana yanjila mu Yerusaleme

²⁸ Muze hamba maliji wano, Yesu yatetekela kulutwe nikuya ku Yerusaleme.

²⁹ Shimbu machikundama ku yihunda ya Betfaje ni Betania, ha mwanda wa mulundu wa Olive yatuma tumbaji aali kulutwe,

³⁰ ngwenyi: “Yeenu ku chihunda chize chasulangana ni yenu. Muze munuheta ko, munuwana mwana chimbulu wakukasa, hali yoze mutu niumwe kanda achitwama ho kama nilimwe tangwa. Mujitulenu, nungunehene yo.

³¹ Nyi umwe manuhula ngwenyi: ‘Kuchi kevwe nunamujitula?’ mulumbunwinenu ngwenu: ‘Mwene kali nenyi ni chikala.’ ”

³² E tumbaji yaaya, yaawana yuma yeswe ngwe chize aambile Yesu.

³³ Shimbu lize te anajitula mwana wa chimbulu, enyaho yaahula ngwo: “Kuchi kevwe nunajitula mwana wa chimbulu yono?”

³⁴ Yaakumbulula ngwo: “Mwene kali nenyi ni chikala.”

³⁵ Mba yatwalila Yesu mwana wa chimbulu. Yaala mahina jo hali kashitu, yaanyinyisa ho Yesu.

³⁶ Muze te anayi, atu yaalala mahina jo mu jila.

³⁷ Muze himakundama ku Yerusaleme, mu jila yize yapalumuka ku mulundu wa Olive, mbunga ya tumbaji eswe yaawahilila kuhiana, yaabutuka kuchichimieka Zambi ni liji linene ha yipupu yeswe yize haamona.

³⁸ Yaambamba ngwo: “Zambi awahise Mwanangana yoze uneza mu jina lia Mwene! Uhwimino mwilu, uhenya kuli Zambi Mwilu Mwahiana!”

³⁹ Amwe Afariseu waze abwile mukachi ka mbunga yaambila Yesu ngwo: “Longeshi, ambila tumbaji twe ahole kuluu!”

⁴⁰ Yesu yakumbulula ngwenyi: “Ngunanwambe ngwami, nyi ahola, e mawe wano maakololoka!”

Yesu yalilila Yerusaleme

⁴¹ Muze Yesu hakundama ku limbo, yalimona, yalililila

⁴² nikwamba ngwenyi: “Nyi wanyingikine, chibwe musono uno, yuma yize muyihasa kukwaha uhwimino! Alioze haliabwila yinaswamana ku meso je!

⁴³ Mumu matangwa makeza muze akwa kole je maakakujingilika, maakakuseleka ku mambango eswe.

⁴⁴ Maakakwonona pundu yena ni ana je mu chipanga cha limbo lienu. Keechi kakuhichikila liwe nilimwe liakubalakenya ni likwo, mumu te kuwanyingikine mwaka uze Zambi ejile ni kukulamwina!”

Yesu yabemesa zuwo lia Zambi

⁴⁵ Yesu yanjila mu zuwo lia Zambi lia Ayuda, yabutuka kutuhwisa akwa kulanjisa ni akwa kulanda.

⁴⁶ Yaamba ngwenyi: “Hichinasonewa mu Mukanda wa Zambi ngwo: ‘Zuwo liami mulikabwa zuwo lia kuwayila.’ Alioze yenu hinunalipwisa chivwenge cha eji!”

⁴⁷ Tangwa ha tangwa Yesu yalongesa mu zuwo lia Zambi. Mahako a lutwe a Zambi, ni alongeshi a Shimbi, ni akwa lutwe ja atu yaazanga kumushiha.

⁴⁸ Alioze kaahashile kuchilinga, mumu atu eswe yaamwivwa ni mbunge jeswe.