Luka 18 - Mukanda Wa Zambi 1970

Chishima cha ngaji ni twamishi

¹ Yesu yaatela chishima chino ha kwalweza ngwenyi: chaatamba kulemba matangwa eswe, kanda ahonga.

² “Yimubwa ngaji mu limwe limbo, te keshi kuvwila Zambi woma, ni keshi kulemesa mutu niumwe.

³ Yimubwa nawa umwe pwo yoze te hanafwisa lunga. Mwe pwo yezaza kanji kuli ngaji ha kumubatwila mulonga wenyi, ngwenyi: ‘Ngukale kama kuli mukwa kole yami!’

⁴ Mwe ngaji yalituna yisuho yinji, alioze mwabwamuze yalihanjikisa ngwenyi: ‘Chamwenemwene Chishi kuvwila Zambi woma, ni Chishi kulemesa mutu niumwe,

⁵ alioze mumu twamishi yono wakunguhongesa, mungumukala hanga kechi keza nawa tangwa ha tangwa ni kunguketeka!’ ”

⁶ Mba Mwene Yesu yawezela ngwenyi: “Achivwenu chize anambe ngaji yoze wa uhenge.

⁷ Kuma Zambi kechi kakala waze atongwele iye mwene, waze akukololoka mwalwa ni ufuku, nyi? Kuma makashimbula ha kwakwasa, nyi?

⁸ Ngunanwambulwila ngwami, makaakala nikawashi. Alioze, muze mwe Mwana Mutu makeza, makawana ufulielo hano hashi, nyi!”

Chishima cha Kafariseu ni mukwa kulambwisa lijimu

⁹ Yesu yatela chishima chino waze te akulinyonga ngwo, tuli akwa ululi, ni akulelesa akwo.

¹⁰ Ngwenyi: “Atu aali akandukile ni kulemba mu zuwo lia Zambi, umwe te Kafariseu, mukwo mukwa kulambwisa lijimu.

¹¹ Kafariseu yamana ha ukawenyi, yalilembela ngwenyi: ‘Zambi, ngunakusakwila, mumu Chishi ngwe atu akwo: akwa mbenga, ni yihenge, ni yitanji, hanji ngwe yono mukwa kulambwisa lijimu.

¹² Nakulitwamina kulia yisuho yaali ha semane yimuwika mu kuwayila Zambi, nakukwaha Chihanda cha muchikumi cha yize yeswe nakuyuka.’

¹³ Mukwa kulambwisa lijimu yamana kusuku. Kahamukine chibwe kuhetuka, alioze yalilamba ha bambo ngwenyi: ‘Aa Zambi! Nguvwile kama keke, yami Chivulumunyi!’ ”

¹⁴ Yesu yawezaho nwenyi: “Ngunanwambulwila ngwami, mutu yono yahiluka ku mahienyi mukwa kusamba ku meso ja Zambi, alioze hi yoze mukwo ko. Mumu yoze malilemesa, Zambi makamulelesa; ni yoze malilelesa, Zambi neye makamulemesa.”

Yesu yawahisa ana

¹⁵ Amwe atu yaanehena Yesu ana akemba, hanga aase moko. Tumbaji yaamona, yaakanjisa atu waze.

¹⁶ Alioze Yesu yatambika ana, yamba ngwenyi: “Tayizenu ana eze kuli yami. Kanda nwakanjisa, mumu Wanangana wa Zambi wa atu ngwe wano.

¹⁷ Chamwenemwene ngunanwambulwila ngwami, yoze keshi kutambula Wanangana wa Zambi ngwe mwana mukepe kechi kanjila mo nichimwe.”

Pichi mukwa kuyula

¹⁸ Umwe mukwa kuyula, Kayuda, yahula Yesu ngwenyi: “Longeshi mubema, Chuma chika Changutamba kulinga hanga ngukabwe ni mwono wa miaka yeswe?”

¹⁹ Yesu ngwenyi: “Kuchi unanguvuluka ngwe, mubema? Wakuhi mubema niumwe, shina Zambi wika.

²⁰ Unanyingika Shimbi ngwo: ‘Kanda Ulinga utanji, kanda ushiha mutu, kanda wiya, kanda ushindakenya mahuza, lemesa tatenu ni noko.’ ”

²¹ Mwe lunga yakumbulula ngwenyi: “Shimbi jino jeswe hingunajifungu chize ku wanuke wami.”

²² Ha kwivwa chino, Yesu yamwamba ngwenyi: “Hindu chimuwika unahono. Lanjisa yeswe yize uli nayo, utetele yiswale mbongo jize, muukabwa ni ubite mwilu. Mba Wize ungukaule.”

²³ Alioze lunga yoze, muze hachivwa, yevwa chinyengo chinji, mumu te pichi.

²⁴ Yesu yamona chize evwile chinyengo, yamba ngwenyi: “Chikalu pichi kunjila mu Wanangana wa Zambi!

²⁵ Chikalu kashitu munene, kamelu, kubalika ndusu mu chituwa cha ndongo. Alioze chikalu kuhiana pichi kunjila mu wanangana wa Zambi.”

²⁶ Waze achivwile yaamuhula ngwo: “Nyi chocho, iya kevwe mahasa kulilamwina?”

²⁷ Yesu ngwenyi: “Chize atu akusa kenu, Zambi kakuchihasa.”

²⁸ Hohene Petulu, yamba ngwenyi: “Tala yetu hitunahichika yeswe, hitunakukaula.”

²⁹ Yesu yaamba ngwenyi: “Chamwenemwene ngunanwambe ngwami, nyi umwe mahichika zuwo, chibwe pwo, hanji ayayo ni anakwo, chibwe yisemi, hanji ana mumu ha Wanangana wa Zambi,

³⁰ makatambula kuhiana ha mwakono, ni makabwa ni mwono wa miaka yeswe ha mwaka uze muwizaho.”

Yesu yambulula chisuho chamuchitatu kufwa chenyi ni uhindukilo wenyi

³¹ Yesu yatwala tumbaji kumi ni aali ku tenga, yaamba ngwenyi: “Banjikenu! Tunayi ku Yerusaleme. Kwenako muyimanunukina yeswe yize asonekene akwa munanyi a Zambi ha chikuma cha Mwana Mutu.

³² Maakamukunjika kuli yilambala. No maakamukekuna, maakamuluka, maakamufwila mate,

³³ maakamulamba ni fimbo (shikote), maakamushiha. Alioze ha tangwa lia muchitatu kumakahinduka.”

³⁴ Alioze tumbaji maliji wano ahanjikile Yesu kaanyingikine ko ni kaalumbunukinyine ko, yaayambashana.

Yesu yalawisa meso ja kapuputa

³⁵ Muze Yesu hakundama ku limbo lia Yeriku, umwe kapuputa te kanatwama ku sesa lia jila nikuunjila.

³⁶ Yevwa mbunga kaanabalika, yaahula ngwenyi: “Yika?”

³⁷ No yaamukumbulula ngwo: “Yesu Kanazare kanabalika.”

³⁸ Mba yakololoka ngwenyi: “Yesu, Mwana wa David! Nguvwile kama keke!”

³⁹ Waze te anatetekela, yamukanjesa ngwo: “Hola!” Alioze yakololoka kuhiana ngwenyi: “Mwana wa David, nguvwile kama keke!”

⁴⁰ Yesu yamana, yamba hanga amunehene yo. Muze mwe kapuputa heza, Yesu yamuhula ngwenyi:

⁴¹ “Yika unazange ngukulingile?” Neye ngwenyi: “Mwene, ngulaule kama ku meso.”

⁴² Yesu yamwamba ngwenyi: “Laula! Ufulielo we hiwakuwuka.”

⁴³ Hazehene yalaula, yakaula Yesu ni kuchichimieka Zambi. Muze mbunga haachimona, yaachichimieka Zambi.