Luka 17 - Mukanda Wa Zambi 1970

Uvulumwino

¹ Yesu yambila tumbaji twenyi ngwenyi: “Yuma yakuvulumwisa atu muyikabwa matangwa eswe, alioze lamba lienyi mukwa kuvulumwisa!

² Chinalite amukase liwe linene ha kota, ni kumumbila mu kalunga lwiji, kuhiana chize mavulumwisa umwe wa kuli wano akepe.

³ Kanyamenu yenwene! “Nyi mukwenu makuvulumuna, muukumike. Nyi malumuka ku mbunge, mukonekene.

⁴ Nyi makuvulumuna yisuho shimbiali ha tangwa limuwika, ni yisuho yeswe meza kuli yena nikwamba ngwenyi: ‘Ngukonekene kama’, chatamba kumukonekena.”

Ufulielo

⁵ Tunganda yaambila Mwene ngwo: “Kolesa kama ufulielo wetu.”

⁶ Neye ngwenyi: “Nyi nuli ni ufulielo ngwe lunona wa mostarde, kachi munuhasa kwambila mutondo uno ngwenu: ‘Tangumuka, ulitumbe mu kalunga lwiji,’ newo kumuunwononokena.”

Milimo ya ngamba

⁷ “Nyi umwe hakachi kenu mabwa ngamba yoze wakulima hanji wakufunga mapanga, mba muze mwe ngamba anakatuka ku minda, kuma mamwamba ngwenyi: ‘Tweya nikawashi utwame ku mesa,’ nyi?

⁸ Ka! Alioze mamwamba ngwenyi: ‘Lulika chize mungulia, mba zala mahina eka, unguvumbike shimbu lize ngunali ni ngunanu. Hohene ni yena muuhasa kulia ni kunwa.’

⁹ Mwata masakwila ngamba yenyi kuhiana mumu yalinga chize amwambile, nyi? Ka!

¹⁰ Chimuwika nawa ni yenu. Muze hinwalinga yize yeswe anwambile, ambenu ngwenu: ‘Tuli kwetu ngamba. Hitwalinga lume chize chatutamba kulinga.’ ”

Yesu yabemesa malunga kumi

¹¹ Muze te Yesu anayi ku Yerusaleme, yabalikila mu ngiza ya Samaria ni Galilea,

¹² yanjila mu limwe limbo. Kuma akwa mbumba kumi yaatakana nenyi, yaamana kusuku,

¹³ yaabutuka kukololoka ngwo: “Yesu! Mwata! Tuvwile kama keke!”

¹⁴ Yesu yaamona, yaamba ngwenyi: “Yeenu nulilweze kuli mahako a Zambi.” Shimbu lize te anayi, yaabema.

¹⁵ Umuwika hakachi ko, muze hamona chize habema, yahiluka nikuchichimieka Zambi ni liji linene,

¹⁶ yafulamana ku molu ja Yesu, yamusakwila. Mutu yoze te Kasamaria.

¹⁷ Mba Yesu yahula: “Ngwami, eswe kumi kaabemanga, nyi? Mba akwo livwa alihiyo?

¹⁸ Kuchi te niumwe kanyongene kuhiluka ni kuchichimieka Zambi shina yono chilambala?”

¹⁹ Mba Yesu yamwamba ngwenyi: “Katuka, yako kwe. Ufulielo we hiwakuwuka.”

Kwiza cha Wanangana wa Zambi

²⁰ Amwe Afariseu yaahula Yesu ngwo: “Wanangana wa Zambi shimbu lika muukeza?” Neye ngwenyi: “Wanangana wa Zambi kuushi kwiza ni yinyingi yakuulayila.

²¹ Atu keechi kamba ngwo: ‘Talenu, hano hiuli!’ hanji ngwo: ‘Kuuli akuze!’ Alioze nyingikenu ngwenu, Wanangana wa Zambi mukachi kenu uli.”

²² Mba yambila tumbaji ngwenyi: “Matangwa maakeza muze munukazanga kumona limwe tangwa lia Mwana Mutu, alioze kunuchi kalimona.

²³ Atu maakanwamba ngwo: ‘Talenu akuze!’ hanji ngwo: ‘Talenu kuno!’ Alioze kanda nukaya ko, kanda nuzomboka ko.

²⁴ Mumu ngwe muhenyo muuhenya mwilu, chize ku sali limuwika ndoo ku sali likwo, Chenacho muchikabwa ha tangwa lia Mwana Mutu.

²⁵ Alioze hatangu chamutamba kumona lamba linji, ni kulituna ye kuli atu ja mwakono.

²⁶ Ngwe chize chabwile ha matangwa ja Noa Chenacho muchikabwa nawa ha matangwa ja Mwana Mutu.

²⁷ Atu yaahaha, yaanwanwa, yaalimbatambata, yaalihangisahangisa ku malo, ndoo tangwa lize Noa anjilile mu ulungu. Mba sanga ha meya yiliza, yilionona eswe.

²⁸ Muchikabwa ngwe ha matangwa ja Lote. Atu yaahaha, yaanwanwa, yaalandalanda, yaalanjisalanjisa, yaatumbatumba, yaatungatunga mazuwo.

²⁹ Alioze ha tangwa lize Lote atuhukile mu limbo ha Sodome, kahia ni fundanga yibutuka kunoka kwilu, yiiyonona eswe.

³⁰ Muchikabwa nawa chizechene ha tangwa lize Mwana Mutu makasoloka.

³¹ “Ha tangwa lize, yoze makabwa ha fulumba lia zuwo lienyi akasunuke, alioze kanda akanjila mu zuwo ha kwanda yuma yize yili mo. Chimuwika nawa yoze makabwa ku minda, kuchamutambile kuhiluka mu zuwo lienyi.

³² Iwulukenu pwo ha Lote!

³³ Yoze makafupa kulamwina mwono wenyi, kumakautokesa. Alioze yoze makatokesa mwono wenyi, kumakaulamwina.

³⁴ Ngwami, ha ufuku uze, atu aali maakabwa ha muhela umuwika. Tunganda twa mwilu maakachiza umuwika, maakahichika mukwo.

³⁵ Mapwo aali maakatwa hamuwika. Maakachiza umuwika, maakahichika mukwo. [

³⁶ Malunga aali maakabwa mu munda. Maakachiza umuwika, maakahichika mukwo.]”

³⁷ Tumbaji yaamuhula ngwo: “Kulihi, Mwene?” Yesu ngwenyi: “Kuze kuli kashitu unafu, kwenako nawa maakakunguluka pupa.”