Luka 16 - Mukanda Wa Zambi 1970

Chishima cha kaselo mukwa kukanyama

¹ Yesu yambila tumbaji twenyi ngwenyi: “Umwe pichi wabwile ni kaselo kenyi. Atu yaamwambulwila ngwo: ‘Kaselo yoze kakumwanga ubite we.’

² Mwe mwata yamuhula ngwenyi: ‘Acho chika ngunevu hakutwala kuli yena? Ngulumbunwine uselo we, mumu kuuchi kuhasa kubwa nawa kaselo kami.’

³ Mwe kaselo yalihanjikisa ngwenyi: ‘Mwata wami kumanguchiza ku milimo. Kuchi mungulinga? Ngolo ja kulima Chishi najo, sonyi ngunevu ja kuunjila.

⁴ Aha! Ngunanyingika chize mungulinga, hanga muze manguchiza ku milimo, atu akangutambule mu mazuwo jo.’

⁵ Mba yatambika umuwika umuwika waze abwile ni kongo kuli mwata wenyi, yahula mutangu ngwenyi: ‘Kongo lingahi uli nalio kuli mwata wami?’

⁶ Neye ngwenyi: ‘Kulakaji ja njongo ja maji.’ Mwe kaselo yamwamba ngwenyi: ‘Twama hashi. Soneka ngwe, makumi atano.’

⁷ Mba yahula mukwo ngwenyi: ‘Yena kongo lingahi uli nalio?’ Yakumbulula ngwenyi: ‘Kulakaji jitano ja tuku ja tiriku.’ Mwe kaselo ngwenyi: ‘Anda mukanda we. Soneka kulakaji jiwana.’

⁸ Mwata wa kaselo yoze wa uhenge yamuchichimieka mumu walingile ni ukanyame. Mumu akwa hashi hano kaakukanyama ha milonga mukachi ko kuhiana akwa pangu.”

⁹ Yesu yaweza ho ngwenyi: “Yami ngunanwambe ngwami, lingilenu ni ubite wa hano hashi ha kubwa ni masepa, hanga muze kunushi ni chikala nawa cha ubite, akanutambule muma mwa miaka yeswe.

¹⁰ Yoze mashishika ni chize chikepe, mashishika nawa ni chize chinene. Yoze mahengesa ni chize chikepe, mahengesa nawa ni chize chinene.

¹¹ Kevwe nyi kunwashishikile ni ubite wa hano hashi, iya manukunjika ubite wamwenemwene?

¹² Hanji, nyi kunwashishikile ni uze wa mbala, iya makanwaha uze wa yenwene?

¹³ “Kavumbi niumwe mahasa kulingila miata aali, mumu mavutwokela umuwika ni mazanga mukwo, malihana kuli umuwika ni malelesa mukwo. Kunwahashile kulingila Zambi ni mbongo hamuwika.”

Maliji eka ni eka a Yesu

¹⁴ Afariseu yeevwa maliji waze eswe, yaaseha Yesu, mumu te akuzanga ubite.

¹⁵ Yesu yaamba ngwenyi: “Yenu nuli waze akulisambisa ku meso ja atu, alioze Zambi kananyingika mbunge jenu. Mumu yize akunyonga atu ngwo, yilemu, ku meso ja Zambi yili yamokomoko.

¹⁶ “Shimbi ja Mose ni mikanda ya akwa munanyi a Zambi hiyinalinduluka ndoo ku tangwa lia Yoano Chipapachisa. Chize ku mwaka uze, atu kaakwambujola Sango Jibema ja wanangana wa Zambi. Mutu ni mutu kakunjila mo ni tachi.

¹⁷ Chikalu lilu ni hashi kuhwa, alioze chikalu kuhiana Chihanda cha lusona wa Shimbi kuhwa.

¹⁸ “Lunga yoze malakula pwo lienyi ni kumbata weka, malinga utanji. Ni yoze mambata pwo yoze lunga lienyi hamulakula, neye malingi utanji.”

Pichi ni Lazaru

¹⁹ “Yikubwa umwe pichi te wakuzala mahina a lubula, a ubite unji. Tangwa ha tangwa te kakusehejela ha yiteleka yibema.

²⁰ Yikubwa nawa umwe chiswale, jina lienyi te Lazaru, mujimba wenyi weswe yiubwa wa yilonda ha yilonda. Atu te kaakumubombesa kulutwe lia chikolo cha pichi.

²¹ Yazanga kulia yifwenyufwenyu yize te yakuholoka ku mesa ya pichi. Tuwa yeza ni kulesa yilonda yenyi.

²² Mwe chiswale yafwa. Tunganda a mwilu yaamutwala, yaamusa hehi ni Abrahama mwilu. Pichi neye yafwa, yaamufunda.

²³ Pichi yabindabinda chinji muma mwa afu, yahetuka, yamona Abrahama kusuku ni Lazaru hehi nenyi.

²⁴ Mba yakololoka ngwenyi: ‘Kaka Abrahama! Nguvwile kama keke, utume Lazaru hanga achubike songo lia munwe wenyi mu meya akekemese kama limi liami, mumu ngunabinji chinji mu mulengi wa kahia kano!’

²⁵ Alioze Abrahama ngwenyi: ‘Mwanami, iwuluka ngwe, yena watambwile yuma yibema ha matangwa ja mwono we, alioze Lazaru lamba linji amwene. Haliabwila kanamulembejeka hano, alioze yena uli mu ubinjilo.

²⁶ Chikwo nawa, mbongo yinene yili mukachi ketu, waze maazanga kubalika koko kuli yenu keechi kuhasa. Chibwe umwe wa koko kechi kuhasa kuzauka kuno kuli yetu.’

²⁷ Pichi yamba ngwenyi: ‘Kaka ngunakulembe, utume kama Lazaru ku zuwo lia tata,

²⁸ kuli anakwetu atano. Aye hanga akaatoweze, kuchina ayo nawa maakeza muma muno mwa kubinda.’

²⁹ Abrahama ngwenyi: ‘Anakwenu kaali ni mikanda ya Mose ni ya akwa munanyi a Zambi ha kwatoweza, aabanjike.’

³⁰ Mwe pichi yamba ngwenyi: ‘Ka, kaka Abrahama! Alioze nyi umwe mahinduka ku kufwa, maya kuli ayo, mba maalumuka ku mbunge.’

³¹ Alioze Abrahama yamwamba ngwenyi: ‘Nyi kasolo kwivwa Mose ni akwa munanyi a Zambi, keechi kakunuka chibwe umwe mahinduka ku kufwa.’ ”