Luka 15 - Mukanda Wa Zambi 1970

Chishima cha panga wakutoka, yasoloka nawa

¹ Akwa kulambwisa lijimu eswe ni akwa lufuma mubi yaakundama kuli Yesu ni kumubanjika.

² Afariseu ni alongeshi a Shimbi yaalinyenyeta ngwo: “Mutu yono kakutambula akwa lufuma mubi, kakulia hamwe no.”

³ Kashika Yesu yaatela chishima chino ngwenyi:

⁴ “Nyi umwe hakachi kenu mabwa ni mapanga kulakaji, kachi matokesa umwe mukachi ko, kuchi malinga? Kechi kuhichika makumi livwa ni livwa mu ulishilo ni kuya ni kufupa yoze watokanga ndoo mamuwana, nyi?

⁵ Muze hamuwana, mawahilila, malitwika ye ha yipaya yenyi,

⁶ mahiluka ku mahienyi. Mba matambika masepa jenyi ni enyembo jenyi ni kwalweza ngwenyi: ‘Wahililenu hamwe ni yami, mumu hinawana panga yami yoze watokanga!’

⁷ Chimuwika nawa ngwami, chiseke chinji muchikabwa mwilu mumu hali Chivulumunyi umuwika yoze malumuka ku mbunge, kuhiana waze makumi livwa ni livwa akwa ululi, keeshi kwo ni Chuma cha kwalumuka ku mbunge.”

Chishima cha lumbongo wakutoka, yasoloka nawa

⁸ “Hanji, nyi umwe pwo mabwa ni mbongo kumi, nyi matokesa umuwika, kuchi malinga? Kechi kuwika ndeya ni kukomba mu zuwo ni kuhengula hengula ndoo mamuwana, nyi?

⁹ Muze hamuwana, matambika masepa jenyi ni enyembo jenyi, nikwamba ngwenyi: ‘Wahililenu hamwe ni yami, mumu hinawana lumbongo wami yoze wangutokanga!’

¹⁰ Chimuwika nawa ngwami, tunganda a Zambi kaakwivwa chiseke mumu hali Chivulumunyi umuwika yoze malumuka ku mbunge.”

Chishima cha mwana wakutoka, yasoloka nawa

¹¹ Yesu yawezaho ngwenyi: “Umwe mutu wabwile ni ana aali a malunga.

¹² Kanuke yambila tato ngwenyi: ‘Tata, ngwehe Chihanda chami cha yikumba chize munguhinga.’ Mba tato yaatetela yikumba yenyi.

¹³ Muze matangwa akepe haabalika, mukweze yalanjisa Chihanda cha yikumba yenyi, yakwata jila, yaya ni mbongo jenyi ku chifuchi kusuku. Kwenako ahungumukine mu yibi nikumwanga mbongo jenyi.

¹⁴ Muze hamwanga jeswe, zala yinji yejile mu chifuchi chize, yabutuka kuhona yuma yeswe.

¹⁵ Neye yaya, yalikata ni umwe mwenyaho. Neye yamutuma ku minda yenyi mu kufunga ngulu.

¹⁶ Yazanga kulia yizungu yize te akulia ngulu, alioze mutu niumwe wamuhele yo.

¹⁷ Muze hakwata mana, yalihanjikisa ngwenyi: ‘Ngamba ja tata eswe kaali ni yakulia yinji, alioze yami kuno ngunafu ni zala!

¹⁸ Mungukatuka, munguhiluka kuli tata, mungukamwamba ngwami: tata, hingunavulumuna kuli Zambi ni kuli yena.

¹⁹ Chatelele unguvuluke nawa ngwe mwane. Ngupwise kama ngwe umwe wa kuli ngamba je.’

²⁰ Neye yakatuka nikuhiluka kuli tato. “Shimbu te achili kusuku, tato yamumona, yamuvwila keke, yazomboka ni kumutakana, yamulimbukila ha kota, yamushisa.

²¹ Mwe mwana yamwamba ngwenyi: ‘Tata, hingunavulumuna kuli Zambi ni kuli yena. Chatelele nawa kunguvuluka ngwe mwane.’

²² Alioze tato yambila ngamba jenyi ngwenyi: ‘Tambukenu nunehe mahina abema, numujike, musenu kazeya ku munwe, mujikenu sapato ku molu.

²³ Nehenu mwana ngombe yoze tunakatunguna, mushihenu, tulienu, tusehejelenu!

²⁴ Mumu yono mwanami wabwile mufu, alioze hahinduka. Watokele, alioze hasoloka nawa.’ Mba yaabutuka kusehejela.

²⁵ “Yayo te ku minda ali. Muze anafunu ni kukundama hakamwihi ni zuwo, yevwa yisaji ni kuhangana.

²⁶ Yatambika umwe wa kuli ngamba, yamuhula ngwenyi: ‘Zungo alio liaka?’

²⁷ Mwe ngamba ngwenyi: ‘Mwanakwenu heza. Tatenu hamushihila mwana ngombe yoze tunakatunguna, mumu hawana mwanenyi wangungungu.’

²⁸ Yayo yatenuka, yalituna kunjila mu zuwo. Tato yatuhuka mu kumulembejeka hanga anjile.

²⁹ Alioze mwe mwana yamukumbulula ngwenyi: ‘Achivwa, miaka yibwa haha hingunakulingila, Chakolemene Shimbi ye niyimwe. Hindu kuwanguhele nichimwe, chibwe mwana pembe, hanga ngusehejele hamwe ni masepa jami.

³⁰ Alioze muze yono mwane heza, yoze wamwangine yikumba ye yeswe ni yitanji, hiwamushihila mwana ngombe yoze tunakatunguna!’

³¹ Tato ngwenyi: ‘Mwanami, yena uli hamwe ni yami matangwa eswe. Yuma yami yeswe yili niye.

³² Chatutamba kuwahilila ni kusehejela, mumu mwanakwenu yono wabwile mufu, alioze hahinduka; watokele, alioze hasoloka!’ ”