Luka 13 - Mukanda Wa Zambi 1970

Chatamba kwalumuka ku mbunge, nyi ka, muukafwa

¹ Ha ola yize, amwe atu yeeza nikwambulwila Yesu hakutwala kuli akwa Galilea waze Pilatu ashihishile ha shimbu lize alambwile Zambi mulambu.

² Yesu yaakumbulula ngwenyi: “Nunanyongo ngwenu, muze Pilatu ashihishile akwa Galilea ngwe chize, kafwa ngwe, ayo abwile yivulumunyi kuhiana akwa Galilea eswe akwo, nyi?

³ Ngwami, ka, alioze nyi kunwalumukine ku mbunge, yenu eswe munukafwa ngwe ayo.

⁴ Hanji waze kumi ni nake afwile muze zuwo lisuku lia kutalila lia Silome liabuzukile hali ayo, nunanyongo ngwenu, ayo abwile yivulumunyi kuhiana akwa Yerusaleme eswe akwo, nyi?

⁵ Ngwami, ka, alioze, nyi kunwalumukine ku mbunge, eswe munukafwa ngwe ayo.”

Chishima cha mukuyu (figu) uze kuwemine mihuko

⁶ Mba Yesu yaatela chishima chino ngwenyi: “Umwe mutu watumbile mukuyu mu munda wenyi. Yeza ni kufupa mihuko, alioze kayiwanyine ko.

⁷ Mba yambila njimi ngwenyi: ‘Tala miaka yitatu neza ni kufupa mihuko ku mukuyu uno, alioze chawanyine nichimwe. Upakule! Kuchi kevwe unasekesa mavu?’

⁸ Alioze njimi yamukumbulula ngwenyi: ‘Mwata, achi weche kama nawa mwaka uno. Mungufula wina mu sesa ni kusa mo pinga.

⁹ Nyi muukema mihuko mwaka wa kulutwe, chibema. Nyi ka, mba muuhasa kuupakula.’ ”

Yesu yawuka umwe pwo wafumbama ha tangwa lia kuhwima

¹⁰ Limwe tangwa lia kuhwima, Yesu te kanalongesa mu zuwo lia kuwayila.

¹¹ Kuma umwe pwo wabwile mo, te wayiza miaka kumi ni nake. Yabwa ni mwiku wa luchisa uze wamufumbamishine, kahashile nichimwe kuhetuka.

¹² Muze hamumona, Yesu yamutambika nikwamba ngwenyi: “Yena mama, unatusuka ku yikola ye!”

¹³ Yamusa moko. Hazehene yoloka. Mba yabutuka kuchichimieka Zambi.

¹⁴ Alioze mukwa kuyula zuwo lia kuwayila yevwa wuli ha chize Yesu awukile mutu ha tangwa lia kuhwima. Mba yambila mbunga ngwenyi: “Tukwete matangwa asambano a milimo. Tweyenu, kashika, ni kunuwuka ha matangwa waze, alioze hi ha tangwa lia kuhwima ko!”

¹⁵ Mwene yamukumbulula ngwenyi: “Mhmm! Yenu yilembekese! Mutu mweswe hakachi kenu kakujitula ngombe yenyi hanji chimbulu chenyi ku chililo nikumutwala ku meya ha tangwa lia kuhwima, hi chocho ko?

¹⁶ Pwo yono, wa ku vungu lia Abrahama, yoze Sakwonga akashile miaka kumi ni nake, kuchatambile kumujitula ku ngoji jenyi ha tangwa lia kuhwima, nyi?”

¹⁷ Kumbululo lino lia Yesu yilivwisa akwa kole jenyi sonyi, alioze mbunga yeswe yaawahilila ha yitanga yeswe yakulishimwoka yize alingile Yesu.

Chishima cha lunona wa chibuta cha mostarde

¹⁸ Yesu ngwenyi: “Wanangana wa Zambi walifwa ni Chuma chika? Ngwe Chuma chika munguutakenya?

¹⁹ Kuwalifwa ni lunona wa chimwe chibuta cha mostarde, yoze anjile mutu nikumutumba mu munda wenyi. Mwenawo yasoka, yabwa chibuta. Tujila yaatunga yaswa ku mitango yacho.”

Chishima cha yitumbo ya mbolo

²⁰ Yesu yamba nawa ngwenyi: “Ni Chuma chika mungutakenya Wanangana wa Zambi?

²¹ Kuwalifwa ni yitumbo ya mbolo yize anjile umwe pwo, yayichinga ni njongo jitatu ja wunga, ndoo weswe yiufutunuka.”

Chikolo chikepe

²² Yesu yendangana mu membo ni mu yihunda nikulongesa muze te anayi ku Yerusaleme.

²³ Umwe mutu yamuhula ngwenyi: “Mwene, kukuli lume akepe waze makaalamwina, nyi?” Yesu ngwenyi:

²⁴ “Litachikenu kunjila ku chikolo chikepe, mumu ngunanwambe ngwami, anji maakazanga kunjila mo, alioze keechi kahasa.

²⁵ “Muze mwenya zuwo makakatuka ni kwajila ku zuwo, yenwene munukamana haze. Munukabutuka kungongwela ku chajilo nikwamba ngwenu: ‘Mwene, Mwene, twazulwile!’ Neye makanukumbulula ngwenyi: ‘Chanyingikine kuze nunakatuka.’

²⁶ Mba munukamukumbulula ngwenu: ‘Twalile ni twanwine hamwe ni yena, ni yena walongesele mu mikala ya limbo lietu.’

²⁷ Neye makanwamba nawa ngwenyi: ‘Chanyingikine kuze nunakatuka. Ngukatukenu yenu eswe nwakulinga uhenge!’

²⁸ Kwenako munukalila nikulicheka ku mazo muze munukamona Abrahama, ni Isake, ni Yakoba, ni akwa munanyi eswe mu Wanangana wa Zambi, alioze yenu makanumbila haze!

²⁹ Atu maakakatuka ku chivumbuko, ni ku chitokelo, ni ku norde, ni ku sude, ni kutwama ku mesa mu Wanangana wa Zambi.

³⁰ Mba anji waze kaali asula haliabwila maakabwa atangu, ni akwo waze kaali atangu haliabwila maakabwa asula.”

Yesu yalilila Yerusaleme

³¹ Shimbu lizeliene, amwe Afariseu yaakundama kuli Yesu nikwamba ngwo: “Katuka kuno, yako kweka, mumu Herode kanazange kukushiha.”

³² Yesu ngwenyi: “Yeenu nwambile yoze mukuza, mukwa kushiha, ngwami: ‘Tala nakutuhwisa mwiku wa luchisa, nakuwuka musono ni hamene, mba ha tangwa lia muchitatu mungukamanununa milimo yami.’

³³ Alioze Changutamba kuya mu jila yami musono, ni hamene, ni hamene alize, mumu kuchatambile mukwa munanyi wa Zambi kufwila kweka shina mu Yerusaleme.

³⁴ “Yerusaleme, Yerusaleme! Yena wakushiha akwa munanyi a Zambi, wakwasa mawe waze Zambi akukutumina! Yisuho yibwa haha nazangile kukungulula ana je, ngwe chize chali cha kasumbi akukungulula ana jenyi mu mapulwa, alioze kunwachitayijile!

³⁵ Talenu zuwo lienu haalihichika liahululu. Ngunanwambe ngwami, kunuchi kangumona nawa nichimwe ndoo munukamba ngwenu: ‘Zambi awahise yoze uneza mu jina lia Mwene.’ ”