Luka 12 - Mukanda Wa Zambi 1970

Yesu yakanyamisa kukeyela ulembekese

¹ Shimbu lize, muze atu haakunguluka tununu ni tununu ni kuliliata, Yesu yahanga kulongesa tumbaji twenyi ngwenyi: “Keyelenu yitumbo ya mbolo ya Afariseu—kafwa ngwe ulembekese wo.

² Chize cheswe chaswamanyine, makachisolola, chize cheswe chakuhengeka, makachinyingikisa.

³ Kashika, yize yeswe nwahanjikile mu milima, maakayivwa mu pangu, ni yize yeswe nwahanjikile mu matwi ja atu mu chibatulo cha muchima, maakayambulula ha mafulumba ja mazuwo.”

Yoze chatamba kuvwila woma

⁴ “Ngunanwambe yenu masepa jami ngwami, kanda nuvwila woma waze akushiha mujimba, alioze kulutwe keeshi ni chize maahasa kulinga nawa.

⁵ Mungunulweza yoze chatamba kuvwila woma. Muvwilenu Zambi woma, yoze muze hashiha, chiyulo akwete cha kumbila mu kahia. Ewa, ngwami, mwenawo chanutamba kuvwila woma!

⁶ “Atu keeshi kulanjisa tutujila tutano ha tumbongo twaali, nyi? Chibwe chocho Zambi keshi kuvulama niumwe wa kuli ayo.

⁷ Chibwe kambu ja ku mitwe yenu hanajalula jeswe. Kashika kanda nwivwa woma, yenu kunwahiana tutujila tunji!”

Kutayiza hanji kulikala Yesu Kristu

⁸ “Ngunanwambe ngwami, yoze mangutayiza ku meso ja atu, ni yami Mwana Mutu nawa mungumutayiza ku meso ja tunganda a Zambi.

⁹ Alioze yoze mangulikala ku meso ja atu, ni yami Mwana Mutu nawa mungulikala ye ku meso ja tunganda a Zambi.

¹⁰ “Yoze malimika ni mwe Mwana Zambi, Zambi makamukonekena, alioze yoze masaula Mwiku wa Linanga, Zambi kechi kwiza kumukonekena.

¹¹ “Muze maakanutwala hanga anubatwile mu mazuwo ja kuwayila, hanji ku meso ja akwa lutwe hanji akwa kuyula, kanda nukalibikala ha chize munukakumbulula hanji chize munukamba.

¹² Mumu Mwiku wa Linanga muukanusongwela ha ola yizeyene chize chanutamba kwamba.”

Chishima cha pichi chihepuke

¹³ Hohene umwe hakachi ka mbunga yambila Yesu ngwenyi: “Longeshi ambila mwanakwetu ahanyine ni yami yikumba yize atuselele tata.”

¹⁴ Yesu ngwenyi: “Mukwetu, iya wangupwishile ngaji wa kunubatwila hanji kunwanyina yikumba yenu?”

¹⁵ Mba yambila eswe ngwenyi: “Talenu kanawa, kanyamenu hakutwala ku lwahu weswe wa mbongo. Mumu mwono wa mutu hi Chuma cha yikumba yenyi ko, chibwe kali pichi kuhiana.”

¹⁶ Mba yaatela chishima chino ngwenyi: “Minda ya umwe pichi yemine mihuko yinji.

¹⁷ Yalishinginyeka mu mbunge yenyi ngwenyi, Chishi haze mungutulikila mbuto yami. Kuchi mungulinga?

¹⁸ Mba yalihanjikisa ngwenyi: ‘Mungulinga chino: mungubuzula machila jami, mungutunga anene kuhiana, mungutulikila mo mbuto yami ni yikumba yami yeswe.

¹⁹ Mba mungwambila mbunge yami ngwami, mbunge yami yikumba yinji uli nayo yakulinduluka ha miaka yinji. Hwima, liako, nwako, Wahilila!’

²⁰ Alioze Zambi yamwamba ngwenyi: ‘Yena chihepuke! Ufuku unowene muufwa, Mba yuma yize unalitumbikila yaya muyikabwa?’ ”

²¹ Yesu yawezaho ngwenyi: “Chenacho muchikabwa hali yoze wakulitulikila ubite iye mwene, alioze keshi ubite ku meso ja Zambi.”

Kanda nulibikala

²² Mba Yesu yambila tumbaji twenyi ngwenyi: “Kashika ngunanwambe ngwami, kanda nulibikala ha mwono wenu, chize munulia, hanji ha mijimba yenu, chize munuzala.

²³ Mumu mwono kuwahiana yakulia, ni mujimba kuwahiana mahina.

²⁴ Talenu yikwakwalo: keeshi kutumba, ni keeshi kuhela, chibwe keeshi machila muze matulikila, hindu Zambi kakwalisa. Yenu kunwahianyine tujila, nyi?

²⁵ Iya hakachi kenu ha kulibikala chenu mahasa kuweza miaka ku mwono wenyi?

²⁶ Nyi kevwe kunushi kuhasa ku yize yikepe yahiana kuchi mba nwakulibikala hakutwala ku yize yikwo?

²⁷ Talenu chize yitemo ya mu yambu yakutatuka; kuyishi kuhondangana, kuyishi kulitungila mahina. Alioze ngunanwambe ngwami, chibwe Solomone, mu uhenya wenyi weswe, kazalile ko ngwe chimwe cha yitemo yino.

²⁸ Nyi Zambi kakujika mwambu uze unasoloka musono ni hamene maaumbila mu jiko lia kahia kuma kechi kanujika nyi? Ufulielo wenu ukepe!

²⁹ Kashika, kanda nulibikala ha kufupafupa chize munulia hanji mununwa.

³⁰ (Waze hi akwa Kristu ko kaakufupafupa yuma yino yeswe.) Tatenu kananyingika ngwenyi, nuli nayo chikala.

³¹ Shinoho achinyongenu hatangu Wanangana wenyi, mba Zambi makanuwezela yuma yize yeswe.”

Ubite mwilu

³² “Mbunga yikepe, kanda nwivwa woma! Mumu hichinawahila Tatenu kunwaha Wanangana.

³³ Lanjisenu yikumba yenu, ni ahenu yiswale ubite uze munutambula. Litungilenu yibakumuna yize kuyishi kufwa. Tulikilenu ubite mwilu, muze kuuchi kahwa nichimwe, muze mwiji kechi kuhasa kunjila, chibwe ndulu kechi kuwonona.

³⁴ Mumu kweswako kuli ubite we, kwenako nawa mukubwa mbunge ye.”

Tuvumbi kanyamenu

³⁵ “Lijichikenu miya yenu ha kulinga milimo. Ndeya jenu jiyile ni kahia.

³⁶ Bwenu ngwe tuvumbi waze anashimbwila mwata wo muze mahiluka ku umbachiso. Muze meza ni kungongwela, hazehene maamwazulwila chajilo.

³⁷ Kaawaha tuvumbi waze, muze mwata meza, maawana kaanakanyama! Chamwenemwene ngunanwambulwila ngwami: makalijichika muya, makaatwamisa hanga akalie, mba makaavumbika.

³⁸ Kaawaha, nyi maawana nikukanyama, chibwe meza ha muchima ufuku hanji kuhiana.

³⁹ Nyingikenu chino ngwenu, nyi mwenya zuwo te kananyingika ha ola yize meza mwiji, kachi kamutayijile ko kulokola zuwo lienyi.

⁴⁰ Ni yenu nawa kanyamenu, mumu ha ola yize kunushi kunyonga mwe Mwana Mutu meza.”

Kavumbi wakushishika hanji keshi kushishika

⁴¹ Mba Petulu yahula ngwenyi: “Mwene, chishima chino unachitela yetu wika, nyi? Hanji atu eswe?”

⁴² Mwene ngwenyi: “Iya kevwe, kavumbi wakushishika kanda wakukanyama? Yoze mwata wenyi hanamwehe chiyulo cha kutetela tuvumbi ni akwo, a ku zuwo lienyi, yakulia ha ola yize yinalite.

⁴³ Kawaha kavumbi yoze, nyi mwata wenyi muze mahiluka, mamuwana kanalingi Chenacho!

⁴⁴ Chamwenemwene ngunanwambulwila ngwami, mwata makamwaha kavumbi yoze yilemu ya yikumba yenyi yeswe.

⁴⁵ Alioze, nyi kavumbi yoze malihanjikisa ngwenyi: ‘Mwata wami kanashimbula,’ mba mabutuka kulamba tuvumbi ni akwo a malunga ni a mapwo, ni kulialia, ni kunwanwa, ni kuzengewa,

⁴⁶ hohene mwata wa kavumbi yoze kumeza ha tangwa lize mwe kavumbi kachinyongene, ni ha ola yize kachinyingikine. Neye makabatwila kavumbi yoze chikolo, nikumumbila mukachi ka waze keeshi kufuliela.

⁴⁷ “Kavumbi yoze wanyingika upale wa mwata wenyi, alioze keshi kulilulika, ni keshi kuulinga, mwe mwata makalamba kavumbi yoze ni mijiji yinji.

⁴⁸ Alioze kavumbi yoze kanyingikine upale wa mwata wenyi, ni kanalingi yitanga yize yinatela kumulamba, mamulamba ni mijiji yikepe. Kuli yoze hanahe yinji, mamuhula nawa yinji. Kuli yoze hanakunjika yinji yahiana, mamuhula nawa yinji yahiana.”

Yesu mukwa kuhandununa atu

⁴⁹ “Nejile ni kuwika kahia hano hashi; ngunazange kachi hikakwata kulu!

⁵⁰ Chatamba kungupapachisa; ngunanenganyana chinji ndoo muukamanunuka!

⁵¹ Nunanyongo ngwenu, nejile ni kuneha uhwimino hano hashi, nyi? Ka, hi uhwimino ko, alioze uhandunwino.

⁵² Chize ku haliabwila atu atano a jiko limuwika maakalihandununa. Atatu maakalihandununa ni aali, aali maakalihandununa ni atatu.

⁵³ Tato makalihandununa ni mwanenyi wa lunga, mwana lunga makalihandununa ni tato. Naye makalihandununa ni mwanenyi wa pwo, mwana pwo makalihandununa ni naye. Naye weno makalihandununa ni tembwa mwanenyi, tembwa mwana makalihandununa ni naye weno.”

Kunyingika yinyingi ya mwakono

⁵⁴ Yesu yambila nawa mbunga ngwenyi: “Muze nwakumona lelwa linakakumuka ku chitokelo, hazehene nwakwamba ngwenu: ‘Vula kumanoka,’ Chenacho chakubwa.

⁵⁵ Muze nwakwivwa fuji yinahehuka ku sude, nwakwamba ngwenu: ‘Chivukuminya muchibwa ko,’ Chenacho cha kubwa.

⁵⁶ Yilembekese! Nunahase kulumbununa kusoloka cha yuma ya mwilu ni hashi. Alioze kuchi kevwe kunwahashile kulumbununa yuma ya mwakono!”

Kulitesa ni mukwa kole ye

⁵⁷ “Kuchi kunushi kubatula yenwene chize chinalite?

⁵⁸ Nyi umwe kanakusumu mulonga, nyi munuya hamuwika kuli mukwa kuyula, eseka kulitesa nenyi nikawashi shimbu nuchili mu jila. Nyi ka, mukwa kole ye makakukunjika kuli ngaji, ni ngaji makakukunjika kuli kafunga, ni kafunga makakumbila mu zuwo lia lamba.

⁵⁹ Ngunakwambe ngwami, kuuchi katuhuka mo nichimwe ndoo hiwafweta kalumbongo ka kusula.”