Luka 10 - Mukanda Wa Zambi 1970

Yesu yatuma tumbaji makumi shimbiali ni aali

¹ Mwabwamuze Mwene Yesu yatongola atu akwo makumi shimbiali ni aali. Yatuma aali aali kulutwe lienyi mu membo eswe ni kuma kweswe kuze iye mwene ambile kuya.

² Yamba ngwenyi: “Mihuko yili yinji, alioze akwa milimo akepe. Kashika, liumbenu kuli mwenya minda hanga atume akwa milimo ni kuhela mihuko yenyi.

³ Yeenu kwenu! Ngunanutumu ngwe ana mapanga hakachi ka tungunga.

⁴ Kanda nwanda chibwe ngonga, chibwe chibakumuna, chibwe sapato. Kanda numanamana mu jila ni kumeneka umwe.

⁵ Muze munukanjila mu limwe zuwo, nukalianga kwameneka ngwenu: ‘Akwa zuwo lino tambulenu uhwimino.’

⁶ Nyi umwe matela kutambula uhwimino, kumeneka chenu cha uhwimino chikabwe mu zuwo lize. Nyi ka, chikanuhilukile.

⁷ Twamenu mu zuwo lizeliene, lienu ni nwenu yize maanusela mo, mumu mukwa milimo katela fweto yenyi. Kanda nututujoka mu zuwo ni zuwo.

⁸ Muze munukanjila mu limwe limbo, nyi maakanutambula, lienu yize yeswe maakanwaha.

⁹ Wukenu mieji a mu limbo lize. Ambilenu atu jamo ngwenu: ‘Wanangana wa Zambi hiwakundama.’

¹⁰ Alioze muze munukanjila mu limwe limbo nyi keechi kanutambula, tuhukenu mu zuwo, endenu mu majila nikwamba ngwenu:

¹¹ ‘Tunakukumuna fufuta ya mu limbo lienu yize yinalalaminya ku yiliato yetu. Alioze nyingikenu kanawa ngwenu, Wanangana wa Zambi hiwakundama!’

¹² Ngunanwambe ngwami, ha tangwa lia ubatwilo lamba mulikabwa likalu ha limbo lize kuhiana lia Sodome!”

Akwa membo waze te keeshi kufuliela

¹³ “Lamba lienu akwa Korazine! Lamba lienu akwa Betsaida! Mumu, nyi yipupu yize alingile muli yenu, ayilingile nawa mu Tiru ni Sidone, kachi atu jamo haanatwama kulu hashi ni kuzala mwanji ni kulikwita uto ha kulweza ngwo, haanalumuka ku mbunge.

¹⁴ Ha Tangwa lia Ubatwilo lamba lienu mulikabwa likalu, kuhiana lize lia akwa Tiru ni akwa Sidone.

¹⁵ Ni yenu akwa Kafarnaume, nunanyongo ngwenu, maakanuzundula ndoo kwilu, nyi? Kumaakanuhulumuna ndoo mu kahia!”

¹⁶ Yambila tumbaji twenyi ngwenyi: “Yoze manwivwa, mangwivwa yami. Yoze malituna yenu, malituna yami. Ni yoze malituna yami, malituna yoze wangutumine.”

Kuhiluka cha tumbaji makumi shimbiali ni aali

¹⁷ Tumbaji waze makumi shimbiali ni aali yaahiluka ni chiseke. Ngwo: “Mwene, chibwe mwiku wa luchisa unatwononokena, muze tunawambila mu jina lie!”

¹⁸ Yesu ngwenyi: “Namwene Sakwonga yaholoka kwilu ngwe muhenyo.

¹⁹ Achivwenu! Hingunanwehe chiyulo cha kuliata tupela ni tuvwanda, ni chiyulo cha kukumba tachi jeswe ja Mukwa Kole. Nichimwe muchihasa kunulinga chibi.

²⁰ Alioze kanda nuwahilila ha chize mwiku wa luchisa unanwononokena. Shinoho wahililenu mumu majina jenu haanasonewa mwilu.”

Yesu yawahilila

²¹ Ha ola yizeyene Yesu yawahilila kuhiana ni uwahililo wa Mwiku wa Linanga, yamba ngwenyi: “A Tata, Mwenya lilu ni hashi! Ngunakusakwila mumu hiwasolwela waze kaalilongesele yuma yize waswekelele akwa mana ni waze haanalilongesa. Ewa Tata, Chenacho wazangile yena mwene.

²² “Tata hanangukunjika yuma yeswe. Niumwe wanyingika mwe Mwana shina Tata, chibwe niumwe wanyingika Tata, shina Mwana ni waze Mwana akuzanga kumusolwela.”

²³ Mba Yesu yatewulukila kuli tumbaji twenyi, yaamba ku tenga ngwenyi: “Kunwawaha yenu nwakumona yuma yino!

²⁴ Mumu ngunanwambulwila ngwami, akwa munanyi a Zambi anji ni mianangana anji azangile kumona yuma yize nwakumona yenu, alioze kaa yimwene ko; ni kwivwa yize nwakwivwa, alioze kaayivwile ko.”

Chishima cha Kasamaria mubema

²⁵ Hohene umwe longeshi ya Shimbi yeza ni kutela Yesu muheto, yamuhula ngwenyi: “Longeshi, kuchi Changutamba kulinga hanga ngubwe ni mwono wa miaka yeswe?”

²⁶ Yesu yamukumbulula ngwenyi: “Kuchi chinasonewa mu Shimbi jetu? Kuchi unatange?”

²⁷ Mwe mutu yakumbulula ngwenyi: “ ‘Zanga Mwene Zambi ye ni mbunge ye yeswe, ni mwono we weswe, ni ngolo je jeswe, ni manyonga je eswe’; nawa: ‘Zanga mwenyembo we ngwe chize wakulizanga yena mwene.’ ”

²⁸ Yesu ngwenyi: “Wakumbulula kanawa. Linga Chenacho, mba ubwe ni mwono.”

²⁹ Alioze mwe longeshi ya Shimbi yazanga kulisambisa, mba yahula Yesu ngwenyi: “Mwe mwenyembo wami iya?”

³⁰ Yesu ngwenyi: “Umwe mutu wakatukile ku limbo lia Yerusaleme ni kuya ku limbo lia Yeriku. Mihuza yaamukwata, yaamuzula mahina jenyi, yaamulamba, yaamuhichika ni chonono, yaaya kwo.

³¹ Mba umwe hako wa Zambi yeza mu jila yize. Muze hamona mwe mutu, yabalikila sali likwo.

³² Chimuwika nawa, umwe Kalevi yaheta kuma kuze, yakundama, yamona mutu yoze, yabalikila sali likwo.

³³ Alioze umwe Kasamaria, yoze wabalikile jila yizeyene, yamuheta. Muze hamumona, yamuvwila keke kuhiana,

³⁴ yamukundama, yatehwina maji ni vinyu ha yilonda yenyi, yayikasa. Mba yamusa hali kashitu kenyi mwene, yamutwala ku zuwo lia ngeji, yamuwukila ko.

³⁵ Muze hikwacha, yanda mbongo jaali, yajaha mwe mukwa zuwo nikwamba ngwenyi: ‘Mutu yono umufunga kanawa. Muze mungukahiluka kuno, mungukakukundulula yize yeswe muukahwisa hali iye.’ ”

³⁶ Yesu yawezaho ngwenyi: “Iya wa kuli wano atatu unanyongo wabwile mwenyembo wa mutu yoze alambile mihuza?”

³⁷ Longeshi ya Shimbi yakumbulula ngwenyi: “Yoze wamuvwilile keke.” Mba Yesu yamwamba ngwenyi: “Ni yena yako ulinge chizechene.”

Yesu maha Marta ni Maria

³⁸ Muze Yesu ni tumbaji twenyi te ali mu jila, yaaheta mu chimwe chihunda. Umwe pwo yamuzumbula, jina lienyi Marta.

³⁹ Neye yabwa ni mwanakwo umuwika, jina lienyi Maria. Neye yatwama ku molu ja Mwene, yevwavwa yize te analongesa.

⁴⁰ Marta yalibikala ni milimo yinji ya yakulia. Kashika yakundama nikwamba ngwenyi: “Mwene, nichimwe kuli yena, nyi? Mwanakwetu hanguhichika ku milimo ya yakulia ukawami. Mwambe kama angukwase.”

⁴¹ Mwene yamukumbulula ngwenyi: “Marta, Marta! Wakulibikala ni kulihapisa ha yuma yinji.

⁴² Alioze Chuma chimuwika unahono. Maria hatongola Chihanda chibema, chize keechi kamuchiza cho.”